8
Manetualain pake Karistus fo mbaꞌa hehelu beuk, fo malolen lena heni hehelu laak
1 De au kokolang huun leoiak: hatematak ia, ita taena malangga anggama inahuuk fo koasan lena heni malangga anggama makahulu kala. Ndia ndia, Yesus. Ana nanggatuuk toꞌu palenda nai Manetualain Manai Lain Seli boboa konan, nai nusa-sodak.✡Sosoda Koa-kio kala 110:1 2 Ma Ana nakalalaꞌok Ndia ue-ledin, nai Manetualain mamana huhule-haladoin teteben. Mamanak ndia, Manetualain mesa kana taon, te ta hataholi taon.
3 Malangga anggama inahuuk nateme neni fefeek ma tunu-hotuk fee Manetualain. Huu ndia de Yesus boe oo musi neni tunu-hotuk. 4 Tehuu Yesus ta nakalalaꞌok Ndia ue-ledin nai daebafok. Huu nai daebafok, hambu malangga anggama so, fo fee fefeek ma tunu-hotuk neu Manetualain, tungga baꞌi Musa heti-heun. 5 Ala lakalalaꞌok sila ue-ledin nai Teng Huhule-haladoik, fo namata-ao sama leo mamana huhule-haladoi teteben nai nusa-sodak. Te faik fo baꞌi Musa nau tao Teng ndia, Manetualain tao nasanenedak ndia, nae, “Masaneda neulalau! O musi tao tebe-tebe tungga mata-aok fo Au atudu neu o neme letek ndia lain!”✡Kalua neme Masir mai 25:40 6 Tehuu Yesus ue-ledin ana seli lena heni neme malangga anggama mata laa kala. Te hatematak ia, Manetualain mbaꞌa heheluk so fo malolen lena. Ndia boe, pake Yesus dadik lelete fo hataholi bisa lamolek lo Manetualain.
7 Makahulun ele, Ana mbaꞌa heheluk no baꞌi Musa, faik fo nakonda heti-heu kala sila. Mae leondiak boe, tehuu hataholi ta bisa nasoda malalaok tetebes tungga heti-heuk ndia. Huu ndi de ala ta bisa malole lo Manetualain. De hatematak ia, paluu heheluk beuk fo malolen lena bali. 8 Te makahulun, Manetualain ta hii Ndia hataholi nala, huu ala laꞌolena bali-bali Ndia heti-heu laan. Faik fo ta nakatataka bali, boe ma Ana luli, basa de Ana nafada nae,
“Mamanene matalolole, te Au ia Lamatuak!
Neu ko Au mbaꞌa hehelu beuk
ua hataholi nusak Israel,
ma leo Yahuda.
9 Heheluk ndia, fo dei fo Au mbaꞌa ua sila,
ta sama leo hehelu makahuluk fo makahulun Au mbaꞌak ndia so
ua sila bei-baꞌi nala.
Te makahulun Au toꞌu sila lima nala
fo akalalaꞌo kasa kalua mima dae Masir mai.
Tehuu, ala ta bisa tao tungga
hata fo ala heluk ndia neu Au so.
Huu ndia de Au ta nau mbali sala so bali.
10 Heheluk ndia, fo Au sangga mbaꞌan ua hataholi nusak Israel asa,
ndia isin leoiak:
“Dei fo Au tao Au heti-heung neu ei duduꞌa mala.
Dei fo Au sulak Au palendang neu ei dale mala.
Boe ma Au dadik neu ei Lamatuam,
ma ei dadik neu Au hataholing.
11 De ei basa nggei malelak neulalau Au,
mulai neme kadiꞌi anak nalan seli mai, losa inahuu nalan seli.
De ei ta paluu manoli bali ei nonoo mala
ma ei tolanoo mala lae,
‘Ei musi malelak Lamatuak!’
12 Huu Au sangga atudu Au ameda kasian neu sala,
huu ndia de Au afalende heni basa sala-singgo nala.”✡Yermia 31:31-34
13 Faik fo Lamatuak kokolak nae, Ana nau mbaꞌa hehelu beuk no sala, na ndia ndandaan, nae, hehelu laak ta nana pakek so bali. Ta dook bali, te mopo heni kana so.