19
1 Basa ndia, boe ma gubenol Pilatus nadenu ndia soldadu nala leu filo Yesus lenik fifilok.*Soldadu Roma la pake fifilok fo nana taok neme banda louk tali hida. Boe ma ala mbaꞌa mbaa dui matande, do tima matande, neu tali mbeda nala. Mete ma ala filo taa-taa pake fifilok ndia, na sii heni hataholi loun. Hataholi Yahudi la pake to fifilok losa kada laꞌi haa hulu. Tehuu soldadu Roma la filo taa no to. 2-3 Soldadu la sila boe leu haꞌi ai dilak ndanan de nanen dadik solangga. Basa de, ala neꞌe solangga dilak ndia neu Yesus langgan, fo tao lakamimina kana, sama leo sangga soꞌu mane beuk, pake solangga manek. Boe ma ala papake Yesus badu nalu mbila balanggeok esa sama leo mane kala lateme paken. Boe ma ala haumemee lakamiminak Ndia lae, “Sodak, neu hataholi Yahudi la manen!” Sila boe oo famba lakamiminak Ndia.
4 Basa ndia, boe ma gubenol kalua laꞌi esa bali, de nafada hataholi noꞌu kala nae, “Leoiak! Au ua Ndia deak mai, fo feen neu ei. Huu ei musi bubuluk, au palisak Ndia so, tehuu au taa hambu Ndia salan fa boe.” 5 Ledoeik Yesus kalua, Ana pake solangga dilak ndia, ma badu naluk mbila balanggeok ndia. Boe ma gubenol nafada hataholi noꞌu kala sila nae, “Mita dei! Hataholi ia, ndindia so.”
6 Ledoeik malangga anggama la malangga nala, ma hataholi mana manea kala lita Yesus, boe ma ala eki landaa-landaa lae, “Tao misa Ndia leo! Mbaku Ndia neu ai ngganggek!”
Tehuu gubenol nafada sala nae, “Ela kada ei mesa nggei mia Ndia fo tao misan nai ai ngganggek. Tehuu au taa hambu Ndia salan fa boe, fo nandaa huku mate Ndia.”
7 Hataholi Yahudi la lataa lae, “Ai kaheti-heuk fo ana konda neme Lamatuak mai. Tungga Heti-heuk ndia, hataholi ia musi mate, huu ana soꞌu aon dadik Manetualain Anan.”
8 Ledoeik gubenol namanene sila kokolan ndia, boe ma ana boe bii. 9 Basa de ana maso fali neni soldadu la benteng neu, boe ma natane Yesus nae, “O ia, hataholi beek?” Tehuu Yesus taa nataan.
10 Boe ma gubenol nasapalak Ndia nae, “Amaak? Hatina de O taa makokola mua au? Neu ko O bubuluk so, hetu? Au ia, aena koasa fo tao isa O, do, mboꞌi heni O.”
11 Boe ma Yesus nataa nae, “Leoiak, ama. Mete ma ama maena koasa leondiak, na, ndia huu ama hambu koasa neme Manetualain mai, nai nusa-sodak. Huu kada Ndia mesa kana fee haak neu ama, fo tao sudi hata neu Au. Tehuu hataholi mana fee Au uu ama, sila ndia lemba salak belak lena heni ama.”
12 Mulai neme ndia mai, gubenol nasanggak dalak fo mboꞌi Yesus. Tehuu hataholi Yahudi la eki landaa-landaa lae, “Huu Hataholi ndia soꞌuk aon dadik manek so, ana laban Roma mane inahuun Keser. De mete ma ama mboꞌi Hataholi ia, na, manggaledok so ama taa tao tungga mane inahuuk Keser hihii-nanaun.”
13 De ledoeik gubenol namanene sila kokola nala leondia, boe ma ana kalua heni Yesus. Boe ma ana nanggatuuk neu mana maketu dedeꞌak kadelan, nai mamanak esa fo ala foin nade, “Mook nana taok neme Batu Bebelak mai”. (Nai dedeꞌa Aram, naden, nae, Gabata.)
14 Faik ndia, Fai Sadia Feta Paska. Meda ledo namatetu, boe ma gubenol nafada hataholi Yahudi la nae, “Mita leo! Ndia ia, ei manem!”
15 Tehuu ala eki latingga lae, “Mian deak mai! Tao misan leo! Mbaku Ndia neu ai ngganggek!”
Boe ma gubenol dudunggu sala nae, “De leobee? Ei hihiim, na, au musi tao isa ei manem ia do?”
Basa de malangga anggama la malangga nala lataa lae, “Ai manen kada esak, fo ndia mane inahuuk Keser! Taa hambu feꞌek so bali!” 16a Basa boe ma, gubenol fee Yesus neu soldadu la, fo ala leu mbaku lisa Ndia nai ai ngganggek.
Ala mbaku londa Lamatuak Yesus nai ai ngganggek
(Mateos 27:32-44; Markus 15:21-32; Lukas 23:26-43)
16b Basa de, soldadu la sila simbo lala Yesus. 17 Boe ma Ana luꞌa nala Ndia ai ngganggen neni kota deak neu. Ala leni mamanak esa leu lae, “Mamana Langga Duik.” (Nai sila dedeꞌa Aram, mamanak ndia nade, Golgota.)
18 Losa ndia, boe ma ala mbaku Yesus neu ai ngganggek esa. Ala tao leondiak neu hataholi feꞌek dua boe. Ala mbaku londa esa neu Yesus boboa konan, ma esa bali neu Ndia boboa kiin, ma Yesus nai sila laladan. 19 De gubenol nadenu ndia soldadu nala sulak neu papak esa, boe ma mbakun neu Yesus langga lain. Nai papak ndia ala sulak lae,
“Ia ia, Yesus hataholi Nasaret. Ndia ndia hataholi Yahudi la Manen.”
20 Ala sulak nai papak ndia pake dedeꞌak telu. Fo ndia: dedeꞌa Aram, dedeꞌa Yunani, ma dedeꞌa Latin. Hataholi Yahudi noꞌu kala lees papak ndia, huu Yesus mamana mamaten ndia, dekak no kota Yerusalem. 21 Tehuu malangga anggama Yahudi la malangga nala taa simbok. Basa de leu lafada gubenol lae, “Ama! Boso sulak, hataholi Yahudi la Manen! Molelenak sulak mae, ‘Hataholi ia nae, ‘Ndia ndia, hataholi Yahudi la manen.’ ”
22 Tehuu gubenol nataa nae, “Au adenu sala sulak leondiak. De elan leondiak leo!”
23 Ledoeik soldadu la mbaku londa Yesus neu ai ngganggek, boe ma ala babaꞌe Ndia baloꞌan, fo taon neu mamanak haa. Babaꞌek esa, na, feen neu soldadu esa. Boe ma ala haꞌi lala Ndia badu dean, fo nana tenu katemak neme lain mai losa dae neu, fo taa nana seuk. 24 Basa de ala lakokola lae, “Wei! Boso ita sii heni Ndia badun ia. Malolenak, kada ita hela lot leo, fo sangga bubuluk see ndia hambun.” Ndia taon ana dadik tungga hata fo nana sulak nai Lamatuak Susula Malalaon nae,
“Ala baꞌe au baloꞌa papakeng,
boe ma ala hela lot fo hambu au badung.”
Basa de soldadu la tao leondiak.✡Sosoda Koa-kio kala 22:19
Lamatuak Yesus nadenu Yohanis fo nanea Ndia inan
25 Nai ndia boe oo hambu inak luma lambadeik lai ndia. Sila ndia, na ndia: Yesus inan, Yesus teꞌon, Klopas saon Maria, ma Maria maneme nggolo Magdala mai. 26 Yesus nita inan nambadeik nai ndia, sama-sama no Ndia ana mana tunggan fo Ana suek ndia, fo ndia au Yohanis. Boe ma nafada inan nae, “Ina aa. Ina anan Ndia ia.”
27 Boe ma Ana nafada au nae, “Leoiak. Hatematak ia, taok ndia leo o inam leo!” Basa de, mulai neme faik ndia mai, Yesus inan leo no au.
Lamatuak Yesus mamaten
(Mateos 27:45-56; Markus 15:33-41; Lukas 23:44-49)
28 Basa ndia, boe ma Yesus nafada nae, Ana tao basa Ndia uen so. Ndia tao natetu, basa Lamatuak Susula Malalaon nana sulak memak so neme makahulun mai. Boe ma Ana nae, “Au maa mada so.”✡Sosoda Koa-kio kala 69:22; 22:16
29 Nai ndia hambu anggol oek makeis nai nggusi kadiꞌik esa dalek. Boe ma soldadu la haꞌi lala lombu tasi de ala domben neu anggol oek ndia, boe ma ala taon neu ai kekeꞌuk esa†Dedeꞌa Yunani nae, ala nato lombu tasi ndia neu ai hussopos mbedan. Hussopos ndia, ai kaboo menik esa fo hataholi Yahudi lateme paken nai acara adat. Nalun meda senti 20 losa 40. Lees laꞌeneuhussopos nai Kalua neme Masir mai 12:22; Malangga anggama la Heti-heun 14:4, 6, 49-52; Susula Sensus 19:2-6; (nakasasaman no Ibrani 9:19); Sosoda Koa-kiok 51:7. mbedan, de ala solo kana neu Ndia bifidoon. 30 Ledoeik Yesus musi anggol oek ndia, boe ma Ana kokolak nae, “Basan basa so.” Boe ma Ana nakatele langgan, de ketu memak Ndia ani hahaen.
Soldadu la mbau Yesus nai ai ngganggek
31 Faik ndia laꞌeneu fai lima. Tungga heti-heu anggama, na, faik ndia hataholi Yahudi la musi lahehele, fo foꞌa na ala simbok fai huhule-haladoik. Huu ndia de ala taa nau hataholi kamates nana londak nakandoo nai ai ngganggek nandaa neu fai huhule-haladoik. Huu fai huhule-haladoik ndia, fai malole. De hataholi Yahudi la malangga nala, loke gubenol fo ana nadenu hataholi neu tao natepa hataholi manai ai nggangge kala ein. No leondiak, ala bisa mate lai-lai, fo lakonda sala daifai. 32 Boe ma soldadu la leni ele leu, de tao latepa hataholi esa ein. Basa ndia de ala tao latepa hataholi esa ein bali. Sila dua sala, fo ndia, hataholi nana mbaku londak sama-sama lo Yesus. 33 Tehuu ledoeik ala losa Yesus, te ala litan Ana mate tetebes so. Huu ndia de ala taa femba tepa Ndia ei dui nala. 34 Tehuu soldadu esa haꞌi nala donggi, de ana mbaun neu Yesus tenden. Boe ma daak faa, ma oe kalua boe.
35 (Hataholi esa dadik neu sakasii nita ndia, na ndia au. Au ita basan, ma au sulak no teteben nai ia. Huu au bubuluk hata fo au tuik ia, tetebes, fo suek ela ei bisa mamahele au kokolang ia.) 36 Basa dedeꞌa kala ia dadi, huu Lamatuak Susula Malalaon nana sulak nae, “Ndia dui nala taa hambu esa tepan boe.”✡Kalua neme Masir mai 12:46; Lelekek 9:12; Sosoda Koa-kio kala 34:21 37 Nai Susula Malalaok ndia, hambu nai mamana feꞌek nana sulak boe nae, “Dei fo lita hataholi ndia, fo ala mbau ndia.”✡Sakarias 12:10; Dae-bafok Mata Beuk 1:7
Ala latoi Lamatuak Yesus
(Mateos 27:57-61; Markus 15:42-47; Lukas 23:50-56)
38 Hambu hataholi esa, nade Yusuf, neme nggolo Arimatea mai. Ndia boe oo dadik Yesus ana mana tunggan. Tehuu ana tungga nafufunik Yesus, huu ana bii hataholi Yahudi la malangga nala. Ana neni gubenol Pilatus neu, fo noke nakamboꞌik ndia, fo neu haꞌi nala Yesus mbombolan. Gubenol simbok no malole. De Yusuf neu nakonda Yesus mbombolan, boe ma ana koꞌo nenin. 39 Nikodemus boe oo neu noꞌu no Yusuf. Ndia ndia, fo makahulun neu natonggo no Yesus laꞌeneu leꞌodaek. Ana hasa rampe makadotok, meda kilo telu hulu telu, fo tao neu Yesus mbombolan.‡Dedeꞌa Yunani nae, ‘litras natun esa’, fo ndia kilo 32,7. Sila rampen ndia, dedeꞌa Yunani nae, ala seseok smurna noaloe. Smurna ndia, fo ai kaboo menik esa daan. Maaloe ndia, na ai kaboo menik esa daan fo hihii leo bei maa. Lees laꞌeneu Nikodemus ia, nai Yohanis 3:1-21. 40 Boe ma ala mbomboti Yesus mbombolan lenik tema bangganaꞌuk. Tungga-tungga fefeok, na, ala tao rampe neu dei. Ala tao leondiak, tungga hataholi Yahudi la hada latoi mamate.
41 Naa, taa dook neme mamanak fo Yesus maten ndia, hambu mamana malole esa. Nai mamanak ndia, hataholi bei fo mbaꞌa lala lua lates esa. Ala bei ta lambeda litak mamate nai ndia. 42 Faik ndia, hataholi Yahudi la lahehele fo simbok sila fai huhule-haladoin sangga basa so. Huu ndia de ala mbeda Yesus mbombolan neu lates ndia dalek, huu mamanak ndia, taa dook.
*19:1 Soldadu Roma la pake fifilok fo nana taok neme banda louk tali hida. Boe ma ala mbaꞌa mbaa dui matande, do tima matande, neu tali mbeda nala. Mete ma ala filo taa-taa pake fifilok ndia, na sii heni hataholi loun. Hataholi Yahudi la pake to fifilok losa kada laꞌi haa hulu. Tehuu soldadu Roma la filo taa no to.
✡19:24 Sosoda Koa-kio kala 22:19
✡19:28 Sosoda Koa-kio kala 69:22; 22:16
†19:29 Dedeꞌa Yunani nae, ala nato lombu tasi ndia neu ai hussopos mbedan. Hussopos ndia, ai kaboo menik esa fo hataholi Yahudi lateme paken nai acara adat. Nalun meda senti 20 losa 40. Lees laꞌeneuhussopos nai Kalua neme Masir mai 12:22; Malangga anggama la Heti-heun 14:4, 6, 49-52; Susula Sensus 19:2-6; (nakasasaman no Ibrani 9:19); Sosoda Koa-kiok 51:7.
✡19:36 Kalua neme Masir mai 12:46; Lelekek 9:12; Sosoda Koa-kio kala 34:21
✡19:37 Sakarias 12:10; Dae-bafok Mata Beuk 1:7
‡19:39 Dedeꞌa Yunani nae, ‘litras natun esa’, fo ndia kilo 32,7. Sila rampen ndia, dedeꞌa Yunani nae, ala seseok smurna noaloe. Smurna ndia, fo ai kaboo menik esa daan. Maaloe ndia, na ai kaboo menik esa daan fo hihii leo bei maa. Lees laꞌeneu Nikodemus ia, nai Yohanis 3:1-21.