21
Lamatuak Yesus natudu aon neu Ndia ana mana tungga kahitu nala
1 Basa faik hida, boe ma Yesus natudu aon seluk bali nai dano Tiberias bifin. Tutuin, leoiak: 2 Faik ndia, Yesus ana mana tungga nala hitu lakabubua. Sila ndia:
Simon Petrus,
Tomas, fo lateme lae, ‘kakana kaduak’,
Natanel, neme nggolo Kana nai propinsi Galelea mai,
Sabadeus anan dua,
ma Yesus ana mana tungga feꞌe nala dua.
3 Simon Petrus nafada ndia nonoo nala nae, “Au sangga uu mbuꞌa.”
Boe ma ala lataa lae, “Hei! Ai tungga boe.” Basa de ala leni dano bifin leu. Boe ma ala hene ofa baluk lain leu fo leu sangga iꞌak. Tehuu leꞌodaen ndia, ala taa hambu iꞌak esa boe.✡Lukas 5:5
4 Foꞌa fafain, boe ma Yesus nambadeik nai dano bifin. Tehuu Ndia ana mana tungga nala taa bubuluk Ndia ndia Yesus. 5 Boe ma Ana nanggou de natane sala nae, “Kaꞌa sala aa! Hambu iꞌak so, do?”
Ala lataa lae, “Louk, Kaꞌa! Ai taa hambu esa boe.”
6 Boe ma nafada sala nae, “Hena nggali masafali mbuꞌak neu ofa baluk boboan seli. Dei fo ei hambu.”
Boe ma ala tao tungga, de ala hambu iꞌak. Tehuu iꞌak makadotok, losa ala taa bisa hela falik mbuꞌak neni ofa baluk dale neu.✡Lukas 5:6
7 Au nai ndia boe. Au ia, ana mana tunggak fo Yesus suek. Boe ma au afada Petrus ae, “Awii! Ndia ndia, ita Lamatuan!”
Namanene au kokolang, boe ma Simon Petrus odu falik badun, de ana palaboku dano dale neu, de ana nggaꞌe madak lain neu. 8 Huu ofa baluk ndia meda kada meter natun esa neme madak lain mai. Boe ma ndia nonoo nala sefe ofak madak lain leu, ma hela leni mbuꞌak fo henuk no iꞌak ndia, nai ofa ikon.
9 Ledoeik ala losa madak lain, te lita haꞌi kaak mana mbilak nai ndia. Nai haꞌi lain, hambu iꞌak. Ma hambu loti boe. 10 Yesus nafada sala nae, “Mini iꞌak luma mai, neme bei fo ei mbuꞌa mala kala isinaak ndia.”
11 Basa boe ma Simon Petrus hene fali ofa baluk dale neu, de ana hela mbuꞌak ndia neni madak lain neu. Mbuꞌak ndia henuk no iꞌa inahuuk. Dedesin, natun esa lima hulu telu. Mae iꞌak noꞌuk leondiak, tehuu mbuꞌak taa sidan.
12 Boe ma Yesus noke sala nae, “Mai, fo miꞌa dei!”
Ala bubuluk so lae, Ndia ndia, sila Lamatuan. Huu ndia de ala taa lambalani latane lae, “Kaꞌa ia, see?” 13 Boe ma Yesus haꞌi loti ma iꞌak, de fee sala.
14 Ndia, fo kalaꞌi telun Yesus natudu Ndia aon neu Ndia ana mana tungga nala, neu faik fo Ana nasoda fali neme Ndia mamaten mai so.
Lamatuak Yesus nakokola no Petrus
15 Ledoeik laꞌa lateꞌe, boe ma Yesus natane Simon Petrus nae, “Heeh, Simon, Yohanis anan. Leobee? O sue Au lena heni nonoo mala ia sue Au, do?”
Ana nataa nae, “Tetebes! Lamatuak bubuluk so, au sue Lamatuak.”
Boe ma Yesus helun nae, “Mete ma leondiak, na, hoo neulalau Au biꞌilombo ana nggala, fo ala bisa laꞌa.”
16 Boe ma Yesus natane seluk ndia nae, “Simon, Yohanis anan. Leobee? O sue Au, do?”
Ana nataa nae, “Tetebes, Lamatuak! Lamatuak bubuluk so, au sue Lamatuak.”
Boe ma Yesus helun nae, “Mete ma leondiak, na, makaboi neulalau Au biꞌilombo nggala.”
17 Basa ndia, boe ma Yesus natane seluk ndia bali nae, “Simon, Yohanis anan. Leobee? O ia Au nonoong, do?”
Boe ma Petrus dale hedi memak, huu Yesus natanen laꞌi telu so nae, “O sue Au, do?” Basa de nataa nae, “Lamatuak bubuluk basa dedeꞌa kala so. De Lamatuak bubuluk so mae, au ia, Lamatuak nonoon.”
Boe ma Yesus helun nae, “Mete ma leondiak, na, hoo neulalau Au biꞌilombo nggala fo ala laꞌa. 18 O malelak Au maksud, do? Au boe oo nau afada leoiak: makahulun faik fo o bei taꞌeanak, na, o mateme pake aom badu, ma pake kalikee, boe ma o laꞌo sudi bee muu, tungga o hihiim. Tehuu dei fo mete ma o mamalasi so, na, o look o limam fo hataholi feꞌek mbaꞌa o, pake o kalikee hehelim. Basa boe ma ala hela loo o, muni mamanak esa fo o taa nau muu.” 19 (Yesus kokolak leondia fo nafada Petrus laꞌeneu hata fo dei fo ana dadi nai ndia aon. Huu dei fo Petrus mamaten ndia, natudu Manetualain koasa inahuun.)*Meda teu kasio hulu neen fo Yesus bonggin so (96M), hambu malangga nggalei esa, nade Klement neme kota Roma mai, fo ana sulak nae, hataholi la tao lisa Petrus. Meda teu kanatun dua sanahulu dua fo Yesus bonggin so (212M), hambu malangga nggalei feꞌek esa, nade Tertulian, ana sulak nae, ala mbaku londa Petrus nai ai ngganggek. Ma hambu nateteme nggalei feꞌek esa lae, ledoeik ala nau mbaku londa Petrus nai ai ngganggek, meda neu teu kanee hulu haa losa nee hulu liman fo Yesus bonggin so (64-65M), Petrus noke fo ala londa ndia langgan nalangga dae neu. Huu ana nameda ndia taa nandaa mate no ndia langgan nai lain, sama leo Yesus.
Basa ndia, boe ma Yesus nafada Petrus nae, “Mai dadik Au hataholing leo!”
Ana mana tunggak fo Yesus suen
20 Faik ndia, Petrus heok nasafali de ana suli dea neu. Boe ma nita au tungga sila dua sala dean. Au ia, fo ndia Yesus suek. Au boe oo anggatuuk nai Yesus boboan, faik fo ai miꞌa feta Paska. Au ia, atane Ndia ae, “Lamatuak aa! See ndia seꞌo heni Lamatuak?”✡Yohanis 13:25 21 Ledoeik Petrus nita au, boe ma natane Yesus nae, “Lamatuak aa! Isinaak Lamatuak kokolak laꞌeneu au so. Tehuu talobee no ndia?”
22 Yesus nafada Petrus nae, “Ndia o dedeꞌam taa ndia. Leo Au nau, fo kada ana nahani ia, losa Au fali maing, na, ndia dedeꞌan hata? Kasosoan ndia, o musi masaneda hata fo isinaak Au helu o ndia, fo ndia: mai fo dadik Au hataholing leo.”
23 Huu Yesus kokolak leondiak, de Ndia ana mana tungga feꞌe nala mulai lakokola lae, “Yohanis ndia, neu ko tana mate.” Naa te Yesus taa kokolak leondiak. Ana kokolak ndia, na ndia: “O dedeꞌam taa ndia. Leo Au nau, kada ana nahani ia, losa Au fali maing, na, ndia dedeꞌan hata?”
Yohanis nateꞌe ndia susulan
24 Ana mana tunggak fo Yesus kokolak ndia, na ndia au, Yohanis. Au ndia tui ei basa dedeꞌa kala ia. Au ndia ita no au mata heheling. Boe ma au ndia sulak basan. De ita bubuluk so tae, hata fo au afada ei ndia, na, tetebes.
25 Ma bei hambu dedeꞌak feꞌek noꞌuk fo Yesus taon. Mete ma hataholi soba sulak lala basan, mulai neme Yesus nakalalaꞌok Ndia uen losa basan, na, noꞌun seli de mae daebafo katemak esa boe oo taa bisa fua basa susula kala sila.
Leondiak leo,
Yohanis
*21:19 Meda teu kasio hulu neen fo Yesus bonggin so (96M), hambu malangga nggalei esa, nade Klement neme kota Roma mai, fo ana sulak nae, hataholi la tao lisa Petrus. Meda teu kanatun dua sanahulu dua fo Yesus bonggin so (212M), hambu malangga nggalei feꞌek esa, nade Tertulian, ana sulak nae, ala mbaku londa Petrus nai ai ngganggek. Ma hambu nateteme nggalei feꞌek esa lae, ledoeik ala nau mbaku londa Petrus nai ai ngganggek, meda neu teu kanee hulu haa losa nee hulu liman fo Yesus bonggin so (64-65M), Petrus noke fo ala londa ndia langgan nalangga dae neu. Huu ana nameda ndia taa nandaa mate no ndia langgan nai lain, sama leo Yesus.