2
Maria bonggi Lamatuak Yesus
(Mateos 1:18-25)
1-2 Laꞌi esa, faik fo Kirenius dadik malangga nusa Siria, boe ma mane inahuuk nade Agustus, fee palenda, nae, “Basa hataholi la malai mana toꞌu palenda Roma koasan, musi ala fali leni nggolo nala leu, suek ala tungga sulak nadek!” Ndia sososan fo mana toꞌu palenda Roma hingga ndia lau-inggu nala leo ndiak. 3 De, basa hataholi la fali leni nggolo nala leu, suek ala tungga sulak nadek.
4-5 Faik ndia, Yusuf leo nai nggolo Nasaret, fo nai propinsi Galelea. Ana nafufudik no inanak esa nade Maria, fo kaꞌilus so. Yusuf ndia, na mane Dauk numbu-sadun ndia, de ana musi fali neni Dauk kotan Betlehem neu, nai propinsi Yudea fo ana tungga sulak nadek.
Huu ndia de, dua sala laꞌo leni kota Betlehem leu. 6 Ledoeik ala bei lai ele, boe ma Maria fai bobonggin losa so. 7 Tehuu nai ndia, ta hambu kama uma sesebak. Huu ndia de, ala leni lalae biꞌi dale leu. Basa boe ma, ana bonggi Ana sososan, touanak. Boe ma ala lalusen temak, ma ala lakambembeꞌun neu banda la haꞌo nanaꞌan dale neu.
Manetualain nafada manahoo la
8 Leꞌodaen ndia, manahoo hida beꞌe lanea sila biꞌiae-biꞌilombo nala lai mook kota deak.
9 Kada nggengge neuk, ala lita Manetualain atan neme nusa-sodak mai. Boe ma, Lamatuak manggaledon nasaꞌa ndule sala, de ala bii lalan seli. 10 Tehuu ata ndia nafada, nae, “Ei boso bii dei! Mamanene neulalau, baa! Huu au ia, mai afada ei hala malole esa.
Basa mana mamanene hala malole ia, neu ko lamahoko.
11 Hala malole ia liin leo iak:
Faik ia, inak esa bonggi Karistus so, nai Betlehem, fo mane Dauk kotan.
Karistus ndia, na hataholi fo, Manetualain helu mema kana, neme makahulun mai so.
Lamatuak haituan mai, fo Ana fee sodak neu hataholi la, leme sala nala mai!
Ndia ia, fo dei fo hataholi la loken na lae, ‘Lamatuak!’
12 Dei fo ei bisa malelak Ndia leo iak: ei matonggo mia Kakanak mbimbilanak esa, lalusen nenik temak. Ana sunggu nai banda la, haꞌo nanaꞌan dalek.”
13 Ana kokolak nateꞌe boe ma, nggengge neuk Manetualain ata nala makadotok leme nusa-sodak mai, de lakabubua lo ndia. Boe ma ala koa-kio Manetualain, de soda lae,
14 “Ai soꞌuk mamadedema Manetualain naden!
Ndia fo, mana manggatuuk palenda nai lalai aten.
Manetualain nau fee dame, neu hataholi la malai daebafok,
fo manatao namahoko Ndia dalen!”
15 Basa boe ma, Lamatuak ata nala fali leni nusa-sodak leu. Boe ma manahoo la sila lakokola, lae, “Wei! Mai fo teni Betlehem teu, fo teu tita kakanak ndia dei! Huu Lamatuak haitua fee ita halak ndia.”
16 Boe ma ala laꞌok lai-lai leni Betlehem leu. De ala latonggo lo Maria ma Yusuf. Ala lita Kakanak mbimbilanak ndia boe, sunggu nai banda la haꞌo nanaꞌan dalek.
17 Ledoeik ala lita kakanak ndia, boe ma ala tui, lae, “Isinaak Lamatuak ata nala leme nusa-sodak mai, de lafada ai so, laꞌeneu Kakanak ia!” Boe ma ala tui basan losa mateꞌen.
18 Basa hataholi la, heran lalan seli, lamanene manahoo la tutui nala sila. 19 Tehuu Maria mbeda basa dedeꞌa manadadi kala sila so, neu dalen. De ana duduꞌa neneek fo ana sangga bubuluk dedeꞌak ia ndandaan nae leobee. 20 Basa boe ma, manahoo la fali leni sila biꞌiae-biꞌilombo nala leu. De, ala soꞌu lamadedema Manetualain naden. Ala loke makasi neu Ndia, huu lamanene ma litan, nandaa leo hata fo Lamatuak ata nala kokola nala sila.
Ala foi kakanak mbimbilanak ndia, nadeYesus
21 Bonggi heni Kakanak ndia faik falu, boe ma ala sunat kakana mbimbilanak ndia, tungga baꞌi Musa heti-heun. Boe ma, ina-aman foin nade, “Yesus”. Nadek ndia, fo ata nusa-sodak nafada sila so, neu faik fo Ndia inan bei ta naꞌilu Ndia.✡Lukas 1:31; Malangga Anggama la Heti-heun 12:3
Ala loo kakana mbimbilanak Yesus, neni Uma Ina Huhule-haladoik neu
22 Hambu baꞌi Musa heti-heun esa nae, inak fo bonggi basa faik hahulu, na ana musi neu tao tungga hadak, fo tao nalalao aon nai Uma Ina Huhule-haladoik. No leo ndiak, na, ala bisa maso leni uma huhule-haladoik leu, leo basa faik. Huu ndia de, Yusuf ma Maria leni kota Yerusalem leu, fo ala sangga tao tungga hadak ndia. Boe ma ala loo sila ana mbimbilanan ndia, neni Uma Ina Huhule-haladoik dalek neu, fo ala fee Ndia dadik neu Lamatuak enan.✡Malangga Anggama la Heti-heun 12:1-8 23 Ala tungga Lamatuak heti-heun fo nae, “Inak fo ana bonggi ana ulun, mete ma touk, na, ana musi fee kakanak ndia dadik Lamatuak enan.”✡Kalua neme Masir mai 13:2, 12 24 Tungga Lamatuak heti-heun, na, mete ma fee kakanak ndia neu Lamatuak, na, ina-aman musi fee tunu-hotuk mbui kateu pasan esa, do lunda mulik dua. Huu ndia de, Yusuf no Maria tao tungga heti-heuk ndia boe.✡Malangga Anggama la Heti-heun 12:6-8
Tou lasik Simeon nae Kakana mbimbilanak Yesus ndia, na, Karistus ndia ndia
25-26 Faik ndia, tou lasik esa, nade Simeon, fo ana leo nai kota Yerusalem. Ndia ndia, hataholi dale ndoos, ma ana dokodoe neu Lamatuak. Lamatuak Dula Dale Malalaon nafada ndia so, nae, dei fo ana bisa nita Karistus dei, bei fo ana mate. Karistus ndia, fo dei fo ana fee sodak neu hataholi Israel asa.
27 Faik ndia, Lamatuak Dula Dale Malalaon noo Simeon neni Uma Ina Huhule-haladoik neu boe. Ndia ndandaak no Yesus ina-ama nala loo Ndia neni ndia neu, fo ala fee Ndia dadik neu Lamatuak enan. 28 Nita kakanak ndia, boe ma toulasi Simeon koꞌo nalan, de ana soꞌuk koa-kiok neu Manetualain, nae,
29 “Koa-kiok neu Lamatuak!
Lamatuak tao natetu Ndia hehelun neu au so.
De, hatematak ia, Lamatuak bisa nakamboꞌik au so,
fo ela au bisa mate no ndoo-ndoo,
30 huu au ita Hataholi fo Lamatuak haituan mai so,
fo Ana tao nasoda ai mima ai sala nala mai!
31 Lamatuak nau pake kakanak ia,
fo tao nasoda basa hataholi nusa kala.
32 Dei fo Ndia sama leo masaꞌak,
fo neni hada-holomata neu Lamatuak hataholi nusa Israel asa.
Ndia boe oo, sama leo manggaledok,
fo natudu Lamatuak dalan
neu basa hataholi nusa feꞌe kala.”✡Yesaya 42:6; 49:6; 52:10
33 Lamanene leo ndia, boe ma Yusuf no Maria heran lalan seli, no hata fo tou lasi Simeon kokolan laꞌeneu sila anan. 34 Basa ndia, boe ma Simeon kokolak babaꞌe-babatik fee sala. Boe ma ana nafada Maria, nae, “Yesus inan aa! Dei fo hataholi luma lai Israel, timba heni ina Anan ia. Tehuu sila tataon neu Ndia ndia, dei fo natuda nasafali sala. Ina Anan ia boe oo tao namahoko hataholi luma dale nala. 35 No leo ndiak, na, dei fo Lamatuak tao nakaholak hataholi la dale nala. Tehuu o Maria, dei fo o hambu doidosok belak, sama leo tafa nana mbauk neu o mboꞌom.”
Bei Hana noke makasi neu Lamatuak huu Yesus
36-37 Nai Uma Ina Huhule-haladoik, hambu ina lasik esa nade Hana. Ndia teun teuk falu hulu haa ia so. Ndia aman, nade Fanuel, neme leo Aser mai. Ana sao teuk hitu, boe ma saon mate laꞌo elan. Bei Hana ndia, na, Manetualain mana kokolan. Ndia uen, ndia hule-haladoi, ma puasa nai Uma Ina Huhule-haladoik, fo nakaluku-nakatele neu Manetualain nai leledo-leꞌodaen.
38 Ledoeik Simeon bei nakokola no Yusuf ma Maria, tehuu ina lasik ndia neu deka-deka so. Boe ma, ana namanene neu sala, de ana soꞌuk koa-kiok neu Manetualain. Basa de, ana kokolak laꞌeneu Yesus neu basa hataholi la, fo lahahanik Manek fo Manetualain heluk ndia so, fo haituan mai, suek nakamboꞌik hataholi nusa Israel.
Ina-ama lo kakanak fali leni nggolo Nasaret leu
39 Ledoeik Yusuf no Maria tao tungga basa baꞌi Musa heti-heun, nai kota Yerusalem, boe ma, ala fali leni propinsi Galelea fo sila nggolon, Nasaret leu.✡Mateos 2:23 40 Yesus inahuu mai, de Ana boe balakai, nalelak, ma bubuluk dedeꞌak noꞌu kala. Manetualain boe oo, natudu dale malolen neu Ndia.
Tou anak Yesus nai Uma Ina Huhule-haladoik
41 Tungga-tungga teuk, na, Yusuf ma Maria laꞌo leni kota Yerusalem leu, fo laꞌa feta Paska nai ndia.✡Kalua neme Masir mai 12:1-27; Tui Seluk laꞌeneu Dala Sodak 16:1-8 42 Laꞌi esa, faik fo Yesus teun sanahulu dua, boe ma ala laꞌo noꞌu leni Yerusalem leu, fo ala tungga laꞌa feta sama leo natetemek. 43-44 Ledoeik fai-fai Paska basan so, boe ma Yusuf no Maria mulai laꞌo fali leni Nasaret leu, lo hataholi noꞌu kala mana sangga fali leni Galelea leu boe. Tehuu tala bubuluk, tehuu Yesus nana laꞌo elak nai Yerusalem. Laehetuk Ana laꞌo noꞌu no Ndia nonoo nala. Losa bobok, tehuu ta lita sana. Boe ma, ala laꞌo lafeok, leu sanggan nai sila bobonggi nala ma nonoo nala. 45 Huu ta latonggo lo Ndia, de ala fali leni Yerusalem leu seluk, fo ala nau sanggan nai ele.
46 Losa ele, boe ma ala sanggan losa faik telu, bei fo latonggo lo Ndia nai Uma Ina Huhule-haladoik dalek. Ana nanggatuuk natane-nataak no mese anggama Yahudi la. 47 Basa hataholi la mana mamanene kala sila, ala heran lalan seli, huu Ana bubuluk tebe-tebe Manetualain Susulan isin, de Ana bisa nataa sila natatane nala no malole. 48 Lita leo ndia, boe ma, ina-ama nala heran. Basa de Ndia inan nae, “Yesus! Hatina de o tao makatotoꞌak ai leo iak? O amam ma au masapangga malan seli, de, ai sangga O miu-mai!”
49 Tehuu Yesus nataa nae, “Hatina de ama no ina masambute sangga Au? Kada malelak malan leo hetu? Au kauek nai Au Amang Uman.” 50 Tehuu ta lalelak Ndia maksud.
51 Basa boe ma basa sala fali leni Nasaret leu. Yesus tungga inan no aman palenda nala. Boe ma Yesus inan mbeda basa dedeꞌa kala sila neu dalen dale. 52 Leo ndiak leo, de Yesus boe inahuu, ma Ana boe nandolu. Manetualain no hataholi la sue Ndia.✡1 Semuel 2:26; Dedeꞌa Lasik 3:4
✡2:21 Lukas 1:31; Malangga Anggama la Heti-heun 12:3
✡2:22 Malangga Anggama la Heti-heun 12:1-8
✡2:23 Kalua neme Masir mai 13:2, 12
✡2:24 Malangga Anggama la Heti-heun 12:6-8
✡2:32 Yesaya 42:6; 49:6; 52:10
✡2:41 Kalua neme Masir mai 12:1-27; Tui Seluk laꞌeneu Dala Sodak 16:1-8
✡2:52 1 Semuel 2:26; Dedeꞌa Lasik 3:4