1 Faik ndia, hambu hataholi neu nafada Yesus, nae, gubenol Pilatus tao nisa hataholi Yahudi hida leme Galelea, neu ledoeik ala leni tunu-hotuk neni Uma Ina Huhule-haladoik nai Yerusalem. 2 Namanene leo ndia, boe ma Yesus natane, nae, “Tungga ei, na, meda hataholi nana tao nisa kala sila, na, sala nala inahuun lena heni basa hataholi Galelea feꞌe kala do? Huu ndia de, ala hambu huhuku mate? 3 Taa! Tehuu mete ma ei taa laꞌo ela ei soda manggalaum ndia, fo fali miu tungga Lamatuak hihii-nanaun, na, ei boe oo, dei fo makalulutuk, leo sila boe. 4 Basa na, leobee bali, laꞌeneu hataholi kasanahulu falu kala mana mate kala sila, huu fain uma batu madema tuꞌu tuni nala sala leme Siloam? Sila sala nala inahuun lena heni hataholi feꞌe kala malai Yerusalem, do? 5 Taa! Tehuu mete ma ei taa laꞌo ela ei soda naputam ndia, fo fali tungga Lamatuak dala ndoon miu, na, ei boe oo, dei fo makalulutuk sama leo sila.”

6 Basa boe ma, Yesus tui seluk nakandandaak esa, nae, “Hambu hataholi esa naena ai kaboak*Dedeꞌa Indonesia pake dedeꞌa deꞌek ‘ai ara’ neme dedeꞌa Yunani nae, sukei. Tehuu Susula Malalaok natudu ai esa nai ele, fo hataholi la lateme laꞌa boan. Nai Indonesia babaꞌek dulu, hataholi la taa laꞌa ‘ai ara’ boan. De, ‘ai ara’ manai Susula Malalaok, taa sama leo ita ai aran manai iak. nai osin dale. Ana nambue mai titilo sudik, fo sangga bubuluk ai ndia naboa so, do beik. Tehuu ai ndia bei ta naboa. 7 Basa boe ma, ana nadenu ndia hataholi mana tao ues nai osi dale, nae, ‘Teuk telu ia so, au mai taa-taa fo sangga ai ia boan, tehuu au taa hambu hata esa boe. De, kekeko henin, huu ai ia kada naꞌa mamanak.’

8 Tehuu mana tao osi ndia nataa, nae, ‘Ama boso mamanasa. Fee ai ia teuk esa bali. Fo suek au fufuꞌa daen ndule huun, ma basa na, au tao pupuk neun, fo tao naꞌaon. 9 Mete ma teu mana maik, ai ia naboa, na malole. Tehuu mete ma taa, na, kekeko henin leo.’ ”

10 Laꞌi esa, nandaa no hataholi Yahudi la fai huhule-haladoin, de Yesus neu nanoli nai uma huhule-haladoik. 11 Nai ndia hambu inak esa dean mbukuk teuk sanahulu falu ia so, huu nitu tataon ndia. Ana taa bisa nambadeik natetu aon. 12 Yesus nita inak ndia, boe ma noke nalan, de nafadan, nae, “Ina! Hatematak ia ina hai ia so.” 13 Boe ma Yesus tao liman neu inak ndia, de nggengge neuk, inak ndia dea manambukun, nakandoo tutik. Boe ma ana noke makasi ma koa-kiok Manetualain.

14 Tehuu malangga uma huhule-haladoik ndia, manggalau, huu Yesus tao nahai hataholi, laꞌeneu fai huhule-haladoik. Boe ma ana nafada hataholi noꞌu kala, nae, “Sosoda ina esa, na hambu kada faik nee tao ues. De, malolenak hataholi kamahedi kala mai laꞌeneu fai tao ues, fo sangga hataholi mana tao nahai sala. Boso mai nai fai huhule-haladoik!”✡Kalua neme Masir mai 20:9-10; Tui Seluk laꞌeneu Dala Sodak 5:13-14

15 Tehuu Yesus nataan, nae, “Heh! Hataholi mana dea-mata kala. Nai fai hahaek na, ei tao ues, hetu? Huu ei miu mboꞌi ei sapi mala ma keledei, fo fee sala linu oe, hetu?! 16 Inak ia, baꞌi Abraham tititi-nonosin, sama leo ita boe. Nitu la malanggan hengge nalan teuk sanahulu falu ia so. Mete ma Au mboꞌi henin laꞌeneu fai huhule-haladoik, na, salak ndia do?”

17 Lamanene leo ndia, boe ma Yesus musu nala, mae. Tehuu hataholi noꞌu kala lamahoko lo Ndia tatao-nonoꞌi malole nala.

18 Boe ma Yesus kokolak tuti bali, nae, “Leo Au akasasamak Lamatuak hataholi nala sama leo hata bae? 19 Sososan sila kada lumak, tehuu dodoo boe ma ala lamanoꞌu. Ala mulai sama leo ai deꞌe kadiꞌi anak. Hataholi selen neu ndia osin. Boe ma ana moli mai, de dadik ai inahuuk. Boe ma mbui kala mai landunu nai baꞌe nala.”

20 Basa de, Yesus kokolak bali, nae, “Leo Au akasasamak Lamatuak hataholi nala no hata bali, bae? 21 Ndia sama leo laluteik, fo ina kala haꞌi lalan, de seseo kana no hade uu saku dua,†Dedeꞌa Yunani nae hade uu sata telu. Sata esa na meda liter sanahulu dua. De, sata telu, na liter telu hulu nee. fo tao loti noꞌuk. Boe ma hade uu nana seseok ndia, mbela mai losa ana inahuu, huu kada laluteik fa anak boe. Nakandandaak ia sosoan leo iak, Lamatuak hataholi nala leꞌa-nole lala sala, de boe nakambela leo ndiak.”

22 Basa ndia, boe ma Yesus asa mulai laꞌo leni kota Yerusalem leu. Ana singgo laꞌo-laꞌo tungga-tungga dalak nai kota ma nggolok sila, fo nanoli hataholi la. 23 Nai mamanak esa, hambu hataholi esa natanen, nae, “Ama Mesen! Meda kada hataholi luma kala ala bisa hambu sodak, do?”

24 Ana nataa, nae, “Nusa-sodak lelesun dalek neu ndia kadiꞌianak. De, mbalak eik, fo ei bisa maso tungga ndia. Huu hambu hataholi noꞌu kala, soba maso, tehuu taa bisa. 25 Mete ma maumak nggoe lelesun so, na, dei fo ei mambadeik nai deak, fo dedele lelesu, ma eki moke tulun, mae, ‘Ama! Soi lelesu dei!’

Tehuu dei fo Ana nataa, nae, ‘Ei ia, see? Au taa alelak ei maa!’

26 Boe ma ei mae, ‘Talobee de, Ama taa malelak ai? Ai ndia mateme miꞌa-minu mia Ama. Ama boe oo, mateme manoli ai, nai ai okofoo nala.’

27 Boe ma dei fo Ana nataa nae, ‘Au afada ndia isinaak so, Au taa alelak ei! Ei ia, kada hataholi fo mana tao manggalauk. De, boke malai heok ia!✡Sosoda Koa-kio kala 6:9

28 Basa boe ma, dei fo mete ma Manetualain naketu basa hataholi la dedeꞌa nala, na ei kada mamatani, ma mamanasa. Tehuu ei mita baꞌi Abraham, baꞌi Isak, baꞌi Yakob, ma basa Manetualain mana kokola nala, maso langgatuuk lai nusa-sodak so. Tehuu ei nana husi henik, mini deak miu.✡Mateos 22:13; 25:30 29 Dei fo hataholi la leme basa daebafok buꞌu nala mai, fo leme ledo sasadun mai, losa ledo tetesa neun; neme kii mai losa kona, langgatuk laꞌa noꞌu lai Manetualain uma manen.✡Mateos 8:11-12 30 Tanda matalolole dedeꞌak ia; dei fo mete ma Lamatuak naketu hataholi la dedeꞌa nala, na hambu hataholi makahuluk, nae hetuk ndia kada hataholi kadiꞌik, tehuu ana hambu hada-holomata inahuuk. Ma hambu hataholi makahuluk luma lae ndia hataholi inahuuk, naa te Lamatuak tao ndia, kada hataholi kadiꞌik.”✡Mateos 19:30; 20:16; Markus 10:31

31 Faik ndia, hambu hataholi Farisi luma, mai lasale Yesus, boe ma lafada, lae, “Malolenak Ama Mesen heok dook muni mamana feꞌek muu, huu mane Herodes sangga tao nisa Ama.”

32-33 Boe ma Yesus nataa, nae, “Heh! Toulasik ndia manggalaun ana seli! Ei miu mafadan, mae, ‘Au husi heni nitu la, ma tao ahai hataholi kamahedi kala, nai faik ia, ma foꞌa mai. Neu binesan, bei fo Au ueng ndia basan.’ Mae talobee boe oo, Au bei nau tao ues fa bali, nai dalak fo Au uni Yerusalem uu. Huu hataholi Yerusalem sila, fo lahiik tao lisa Manetualain mana kokola nala.

34 Awii, hataholi Yerusalem nala aa! Ei ia, fo mambue tao misa Manetualain mana kokola nala, ma mbia makamate hataholi nana dedenu kala, fo ala mai latudu dalak neu ei. Laꞌi noꞌuk Au nau akabubua fo anea ei so, suek babaa ala ei, mima manggalauk mai, sama leo manu ina nasulu nala ana nala, neu lidan dale. Tehuu ei taa nau. 35 Hatematak ia, Lamatuak taa mbali ei uma huhule-haladoim ndia so bali. De, mbila-binesak te louk so. Dei fo ei taa mita Au bali, losa ei manaku, mae,