20
Ala latane laꞌeneu Yesus hak ma koasan
(Mateos 21:23-27; Markus 11:27-33)
1 Faik esa, Yesus neni Uma Ina Huhule-haladoik neu, boe ma Ana nanoli Hala Malole nai uma ndia pasan. Boe ma malangga anggama Yahudi malangga nala, mese anggama la, ma lasi-lasi hada kala mai latane Ndia. 2 Ala latane, lae, “See fee O hak, de afik O mai tao nahuuk nai ia? Hena mafada ai dei!”
3 Boe ma Yesus nataa, nae, “Au boe oo, sangga atane dedeꞌak esa, fo basa, na, bei fo Au ataa ei. 4 Leo iak: ei malelak Yohanis Mana Salanik, hetu? See feen koasa, fo ana salani hataholi la? Manetualain do hataholi?”
5 Boe ma lakokola leu-mai, de lae, “Awii! Ita soꞌe talan ia so maa. Mete ma ita tae, ‘Manetualain ndia nadenu,’ na dei fo Ana bala nae, ‘Mete ma leo ndiak, na hatina, de ei taa mamahele Yohanis ndia?’ 6 Tehuu ita boe taa bisa tae, ‘hataholi nadenu’, huu dei fo hataholi la ia haꞌi batu, fo, mbia lisa ita. Huu ala lamahele, lae, Yohanis ndia, na, Lamatuak mana kokolan.”
7 Basa de ala lataa Yesus lae, “Ai taa bubuluk.”
8 Boe ma Yesus bala nae, “Mete ma leo ndiak, na Au boe oo, taa nau afada ae, see ndia nadenu Au.”
Tutuik laꞌeneu mana tao osi anggol
(Mateos 21:33-46; Markus 12:1-12)
9 Basa boe ma, Yesus tui hataholi noꞌu kala sila, nakandandaak esa bali, nae, “Hambu hataholi esa, sele nai osi anggol. Ana fee hataholi mana tao osi la seba osin ndia, fo labaꞌe buna-boan. Boe ma ana huꞌa neni nusa dea neu, fo leo nala dook nai ele.✡Yesaya 5:1 10 Losa fai ketu anggol boak, boe ma maosik ndia, nadenu ndia hataholi mana tao ues esa neu simbo ndia babaꞌen neme mana seba osi la ndia. Tehuu mana seba osi la sila mbomboko maosik hataholi mana tao ues ndia, de basa boe ma ala husi henin, de ana fali no lima louk. 11 Basa de maosik haitua seluk ndia hataholi mana tao ues esa bali. Tehuu mana seba osi la mbombokon, ma lakamamae kana. Basa de, ala husi fali kana no lima louk. 12 Boe ma maosik ana haitua seluk ndia hataholi mana tao ues katelun neu, tehuu ala mbomboko lahinan, boe ma ala mbia henin neni mbaꞌa deak neu.
13 Maosik ndia duduꞌa-duduꞌa nae, ‘Au musi tao leobee bali? Malolenak au haitua au ana susueng neu. Neu ko ala feen hadak ma ala simbo kana no malole.” De ana haitua ana bonggin neni ele neu.
14 Tehuu ledoeik mana seba osi la litan, boe ma ala lakokola lae, ‘Wei, ei mita dei! Huu toulasik haitua ndia ana hehelin mai. Ndia ndia, dei fo ana simbo basa toulasik pusaka nala. De mai fo ita tao tisan leo, suek ita hambu osi ia leo. 15 Ledoeik kakanak ndia ana losa, boe ma ala hela loloson, neni osi deak neu, de ala tao lisan.
Au sangga atane leo iak: ei duduꞌam, na maosik ana sangga tao leobee neu hataholi mana seba osi sila? 16 Tungga Au, na, neu ko maosik ana mai fo tao nisa basa sala, fo basa na, ana fee hataholi feꞌek ala seba osi ndia.”
Ledoeik hataholi la lamanene Yesus kokolan leo ndia, boe ma ala lataa, lae, “Mete ma bisa, na, Manetualain boso huku ai leo ndiak!”
17 Basa de Yesus suli nakabubulak neu sala, boe ma natane, nae, “Mete ma taa huku leo ndiak, na, hatina de Lamatuak mana kokola nala ala sulak so, lae leo iak:
‘Batu esa fo tuka nala nggali henin so,
tehuu hatematak ia, ana dadik neu dii inak batu neten so?’✡Sosoda Koa-kio kala 118:22
18 Hataholi fo nakatunu neu batu ndia, na, neu ko nakalulutuk, huu ana hambu huhukuk. Ma, mete ma batu ndia ana tuda laꞌe hataholi, na, ndia boe oo, nakalulutuk nalan seli, huu ana laꞌe huhukuk.
19 Faik fo mese anggama ma malangga anggama la malanggan lamanene tutuik ndia, de ala bubuluk, lae, Yesus uku bebeik sila, nenik nakandandaak ndia. Sila sama tetebes leo mana seba osi sila. De ala luli lalan seli. Boe ma ala heti kekedik fo sangga humu Ndia. Tehuu ala bii hataholi noꞌu kala fo lahiik Yesus nanonoli nala. De, ala laꞌo elan leo.
“Fee Manetualain hata fo Manetualain hak”
(Mateos 22:15-22; Markus 12:13-17)
20 Basa, boe ma Yesus musu nala ala malok Ndia. Ala sangga hataholi mana memete-mamaku kala fo bisa tao ao nala leo hataholi malalaok, fo leu lakahiak Yesus. Ala lamahena fo Yesus bisa kokolak laban mana toꞌu palenda Roma, fo basa na, leu lapor gubenol, fo suek ladenu hataholi la leu humu Yesus. 21 Boe ma ala haitua mana memete-mamakuk, fo ala leu latane Yesus, lae, “Ama Mesen! Ai bubuluk Ama dalen ndoos. Ama taa nalelak pepekok, ma taa mete matak. Ama manoli Manetualain Dedeꞌa-kokolan no teteben. 22 Hatematak ia, ai sangga matane dedeꞌak esa: tungga ita anggama Yahudi heti-heun na, meda ita bole bae bea neu mana toꞌu palenda Roma mane inahuun do taa?”
23 Tehuu Yesus bubuluk sila maksud manggalaun fo sangga ala teꞌek Ndia. Boe ma Ana nataa, nae, 24 “Soba matudu Au doi lilo fulak esa dei.” Boe ma ala latudu doik ndia neu Ndia. Basa de Ana natane, nae, “See mata-aon ia?” Ma see naden ia?”
Ala lataa, lae, “Ndia mane inahuuk Kesel.”
25 Boe ma Yesus nae, “Mete ma leo ndiak, na, fee mana toꞌu palenda hata fo sila hak. Ma fee Manetualain hata fo Ndia hak.”
26 Lamanene leo ndia, boe ma ala heran lalan seli, huu ala taa bisa teꞌek lala Ndia nai hataholi noꞌu kala matan. Boe ma ala lakatema bafa nala leo.
Lamatuak Yesus nanoli laꞌeneu nasoda fali neme mamates mai
(Mateos 22:23-33; Markus 12:18-27)
27 Basa ndia, boe ma hataholi luma leme partei anggama Saduki mai fo ala sangga teꞌek Yesus. Hataholi Saduki la lanoli lae hataholi kamate kala taa lasoda fali so, nai daebafok babasan. Ala mai latane Yesus, lae,✡Hataholi Nadedenu nala Tutuin 23:8 28 “Ama Mesen! Baꞌi Musa sulak ela ita heti-heun so, nae, mete ma hambu touk mate, tehuu ana tak, na, hataholi ndia fadin musi sao mbalu nala ina falu ndia, fo suek ana fee numbu saduk neu kaꞌan mana matek ndia so.✡Tui Seluk laꞌeneu Dala Sodak 25:5 29 Memak makahulun baꞌi Musa nanoli leo ndiak. Tehuu hatematak ia, ai sangga matane leo iak: hambu touk hitu tolanoo bonggi kala. Kaꞌak sao, tehuu maten, ma ana tak. 30 Boe ma fadin mana tungga ndia, sao mbalu nala ina falu ndia. Taa dook tehuu ndia maten boe, tehuu ana taa. 31 Leo ndiak boe, no fadi katelun. Ana sao mbalu nala ina falu ndia bali, tehuu ndia boe oo, maten, tehuu ana taa boe. Leo ndiak nakandondoo henin, losa fadi mateꞌa teisusuk ndia maten boe. 32 Boe ma ina falu ndia maten boe. 33 Naa! Hatematak ia, ai sangga matane leo iak: inak ndia sao nitak touk hitu so. Dei fo mete ma daebafok basan, fo Lamatuak tao nasoda falik hataholi mana mate kala, na, inak ndia sao teteben ndia see?”
34 Boe ma Yesus nataa, nae, “Hataholi kada lasaok lai daebafok. 35-36 Tehuu dei fo nai nusa-sodak na, hataholi la taa lasaok so. Ma nai ele, na ala taa mate so. Ala sama leo Manetualain ata nusa-soda nala. Huu faik fo Manetualain tao nasoda falik hataholi mana mate kala, na, Ana hele nala sala fo dadik neu Ndia ana nala. 37 Nai baꞌi Musa susulan, na, hambu tutuik laꞌeneu, ai kadiꞌik haꞌi naꞌan tehuu taa kaden. Neme tutuik ndia mai, na, ita bubuluk hataholi mate tehuu bisa nasoda fali. Nai ndia, Manetualain nafada baꞌi Musa, nae, “Au ia, o baꞌi-baꞌi mala Manetualain. Fo ndia, baꞌi Abraham, baꞌi Isak, ma baꞌi Yakob. Sila basa sala lakaluku-lakatele neu Au, losa hatematak ia.”✡Kalua neme Masir mai 3:6 38 Naa te baꞌi la sila mate sala so neme makahulun mai. Tehuu Manetualain nafada so, nae, Ndia bei dadik sila Lamatuan, huu ndia de ita bubuluk tae, sila bei kasodak. Huu, kada hataholi kasodak bisa nakaluku-nakatele neu Manetualain, tehuu taa hataholi kamatek, hetu?!”
39 Lamanene Yesus nataa leo ndia, boe ma, mese anggama esa kokolak nae, “Ama Mesen natataan ndia, teteben ana seli.” 40 Mulai neme faik ndia mai boe oo, taa hambu hataholi esa nambalani natane bali, huu taa hambu hataholi ana bisa teꞌek nala Ndia.
Karistus ndia, na, memak mane Dauk tititi-nonosin, ma ndia Lamatuan boe
(Mateos 22:41-46; Markus 12:35-37)
41 Basa ndia, boe ma Yesus bei nanoli hataholi la sila, nai Uma Ina Huhule-haladoik. Boe ma Ana natane nasafali sala, nae, “Tungga ei duduꞌa mala, na, leobee? Mese anggama la lanoli, na, lae Karistus ndia na ndia Hataholi fo Manetualain tudu mema kana so neme lele uluk, mai. Tungga sila, na, Ndia kada dadik mane Dauk tititi-nonosin. Tehuu ndia bei ta dai. 42 Huu makahulun, mane Dauk mesa kana sulak nai susula Sosodak Koa-kio kala, nae,
‘Manetualain nafada au Lamatuang, nae,
“Mai fo manggatuuk muu mamana nana hadak, nai Au boboa konang.
43 Huu dei fo Au tao O musu mala,
losa ala doꞌok neu O.’ ”✡Sosoda Koa-kio kala 110:1
44 Neme susulak ndia mai, ita bubuluk, tae, mane Dauk mesa kana noke Karistus ndia, na nae, ‘Lamatuak’, na ndia ndandaan, mete ma hataholi la lae, Karistus ndia, kada mane Dauk tititi-nonosin, na ndia bei ta dai! Huu Ndia boe oo, dadik mane Dauk Lamatuan!”
Mata neuk neu mese anggama la, fo lafuni sila sala nala
(Mateos 23:1-36; Markus 12:38-40)
45 Ledoeik basa hataholi la pasak ndiꞌidook, fo lamanene Yesus, boe ma Ana kokolak no Ndia ana mana tungga nala, nae, 46 “Ei musi mata neuk neu mese anggama la. Huu ala lahiik lalaꞌok pake badu naluk mana mbembek, fo leu latonggo lo hataholi noꞌu kala, fo suek hataholi la lita sala, na lae, ‘Wei! Sila ndia, hataholi inahuuk, bou!’ Ala lahiik sangga mamanak nana hadak ana seli, nai uma huhule-haladoi kala, nai feta, ma nai mamanak fo hataholi la lateme lakabubua. 47 Tehuu mata neuk, huu ala lambue pepeko lala ina falu la, fo lamoa lala sila uma nala. Tehuu nai hataholi la matan, na, ala lafuni sila manggalau nala ndia, ma ala lambadeik hule-haladoi lala dook. Ala nau fo, hataholi la lae sila, hataholi malalaok. Tehuu Lamatuak bubuluk sila sala nala, de dei fo Ana huku sala mabela nalan seli.”