15
Manetualain atan hitu leme nusa-sodak mai, leni soe inahuuk hitu neni daebafok mai
1 Basa ndia, boe ma au ita dedeꞌak esa ana seli nai lalai, losa au heran alan seli. Hambu ata hitu leme nusa-sodak mai, esa-esako toꞌu koasa, fo haitua soe inahuuk neni daebafok mai. Soe kahitu kala ia, na soe mateꞌe nala sila so. Mete ma basa sala dadi so, na ndandaan nae, Manetualain dalen makasufu so, losa Ana ta namanasa hataholi daebafok kala so bali.
2 Boe ma au ita tasi mana mbilak leo titilok, fo nana seseok no haꞌi. Au boe oo ita hataholi noꞌu kala lambadeik lai tasi ndia bifin. Sila ndia, hataholi la ta mana tungga banda manggalauk ndia, ta songgo ndia bua nana dokik ndia, ma ta simbok ndia kee-deden. Sila basa sala toꞌu bua musik, sama leo sasanu, fo ala simbon neme Manetualain mai. 3 De ala soda sosodak esa neme baꞌi Musa mai, fo ndia Manetualain hataholi nadedenu lele ulun. Hataholi la sila soda sosodak esa, fo ala koa-kio neu Yesus boe. Te makahulun hataholi la tao lisa Ndia, sama leo hataholi hala biꞌilombo ana nai Manetualain Uma Huhule-haladoin, fo tao makasufu Ndia dalen. Ala soda lae,*Musa sulak nala sosodak ndia, neu faik fo Manetualain nuni no hataholi Israel asa kalua leme Masir mai, fo sila mamana doidoso nala.
“Ou Manetualain!
Ai soꞌu dema-demak Manetualain naden!
Huu Manetualain koasan, ana seli.
Ma Manetualain nula-nambun heran nalan seli.
Manetualain toꞌu palenda neu basa nusa kala manai daebafok so.
Manetualain dadik Manek, neu basa leo la manai daebafok so.
Manetualain tatao-nonoꞌin, ana seli!
Manetualain ue-osan neulaun seli!
Manetualain dalan, ndoos nalan seli!
Manetualain sodan, tetebes seli!✡Kalua neme Masir mai 15:1-18
4 Basa hataholi la soꞌu dema-demak Manetualain naden,
basa hataholi la koa-kio Manetualain malolen.
Huu kada Manetualain mesa kana malalaok.
Kada Ndia mesa kana ta kasalak.
Neu ko basa hataholi nusa kala mai lakaluku-lakatele neu Manetualain.
Neu ko basa leo la loke makasi neu Manetualain.
Te basa hataholi la lita Manetualain tatao-nonoꞌi malolen so.
Ma basa hataholi la bubuluk Manetualain dalen ndoos.”✡Yermia 10:7; Sosoda Koa-kio kala 86:9
5 Ledoeik hataholi la sila soda lateꞌe, boe ma au ita Kama Malalaok Nalan Seli ndia, nai Manetualain Uma Huhule-haladoin nai nusa-sodak. Tema lilindin, nana soik maloa.✡Kalua neme Masir mai 38:21 6 Basa de au ita ata kahitu kala mana leni soe kahitu kala sila. Ala kalua leme Uma Huhule-haladoik mai. Ala pake baloꞌa fula masaꞌak, malalao ndoos, ma lasaa lane lafa lilo mbila isik. 7 Boe ma au ita esa neme banda kahaa kala, fo mana lai Manetualain kadela mana palendan ndia boboan. Ana baꞌe bokor lilo mbilas hitu, fee ata kahitu kala sila. Bokor kahitu kala sila, esa-esako nana isik huhukuk neme Manetualain mai. Ndia, kasodak nakandondoo henin. Te, Ana nahehele fo nggangga Ndia nasan neni daebafok mai. 8 Ta dook bali boe ma, Uma Huhule-haladoik ndia henuk no haꞌi masuk, fo ana kalua neme Manetualain nula-nambun ma Ndia koasan mai. Ta hambu hataholi esa boe, bisa maso neni ndia neu. Ata kahitu kala sila, ala musi nggangga labasa soe kahitu kala leni daebafok mai, bei fo hataholi bisa maso leni ndia leu.✡Kalua neme Masir mai 40:34; 1 Mane-mane kala 8:10-11; 2 Israꞌel no Yahuda Tutuin 5:13-14; Yesaya 6:4
*15:3 Musa sulak nala sosodak ndia, neu faik fo Manetualain nuni no hataholi Israel asa kalua leme Masir mai, fo sila mamana doidoso nala.
✡15:3 Kalua neme Masir mai 15:1-18
✡15:4 Yermia 10:7; Sosoda Koa-kio kala 86:9
✡15:5 Kalua neme Masir mai 38:21
✡15:8 Kalua neme Masir mai 40:34; 1 Mane-mane kala 8:10-11; 2 Israꞌel no Yahuda Tutuin 5:13-14; Yesaya 6:4