18
Manetualain atan, tui laꞌeneu kota Babel tutuꞌun
1 Basa ndia, boe ma au ita Manetualain ata feꞌen esa bali konda neme nusa-sodak mai. Ndia koasan ma saꞌan ana seli losa tao langgaledo basa daebafok. 2 Ana inahuhuu halan, de nafada, nae,
“Tuꞌu henin so! Tuꞌu henin so! Kota Babel tuꞌu henin so!
Ndua henin so! Ndua henin so! Kota ana seli ndia, ndua henin so!
Ana dadik neu nitu la mamana leleon so.
Ana dadik neu basa dula manggalau kala mamana dadadin.
Basa mbui kala lakabubua lai mamanak ndia, fo laꞌa mbombolak.
Ana dadik neu basa banda manggalau kala mamana lalae nala so.✡Yesaya 21:9; Yermia 51:8; Dae-bafok Mata Beuk 14:8; Yesaya 13:21; Yermia 50:39
3 Tuꞌu henin so, huu basa hataholi nusa kala malai daebafok,
lambue mai linu mafuk kota ndia anggol.
Ana ndua neu so, huu basa leo malai daebafok,
lambue mai hohongge lo kota ndia hataholi nala.
Mane-mane kala leme basa nusa kala,
mai hohongge lai ndia.
Hataholi dangga nala leme basa kota la,
mai laseꞌo, losa lamasuꞌi so.
Huu kota ndia, sama leo inak fo nahiik hasa basa hata mabeli.
Huu kota ndia sama leo ina kalabik fo nahiik hasa basa malada-malada.”✡Yesaya 23:17; Yermia 51:7
4 Boe ma au amanene hala feꞌek esa bali, nanggou neme lalai mai, nae,
“Wei! Basa Au hataholi nggalei!
Kalua malai mima ele mai leo!
Laꞌo ela kota ndia leo!
Boso tao tungga ndia hataholi nala tatao manggalaun,
fo boso hambu huhukuk boe.✡Yesaya 48:20; Yermia 50:8; 51:6, 45
5 Huu sila manggalau nala
noꞌun seli so.
Ma sala nala
latuni-tanak losa lalai so.
Hatematak ia, Manetualain ta lilii heni
sila dala soda manggalaun ndia so.
Hatematak ia Manetualain nahehele so
fo sangga huku sala.✡Tutuik laꞌeneu Sososan 18:20-21; Yermia 51:9
6 De, ei musi bala sila manggalau nala,
sama leo ala tao manggalauk neu hataholi feꞌe kala so.
Te ei musi bala sala,
losa diku duak.
Fai makahulun ala kedi lala hataholi,
fo linu lenik sila manggo te lilo mbilan, fo henuk no anggol doidosok.
Te hatematak ia, mesa kasa musi linu
anggol doidosok ndia, losa diku duak.✡Sosoda Koa-kio kala 137:8; Yermia 50:29
7 Ala tao lala ao nala sama leo hataholi fo ana seli.
Ma ala sosoꞌuk dema-demak ao nala.
Ala hii kada soda-lada neulauk nai lain seli.
Ala hii kada malole-malada.
Huu ndia, de ala musi hambu toꞌa-taak belak.
Ma, ala musi lasoda lo doidosok.
Te makahulun, ala kokolak koaok sama leo ina kalabik ndia, nae,
‘Au ia, ina manek!
Neu ko au ta dadik ina-falu!
Neu ko au ta amatani akaleleu fa boe.
Neu ko au ta pake baloꞌa nggeok.’
8 Ala kokolak lae leondiak, losa Manetualain namanasa sala so.
Losa Manetualain sangga huku sala.
Mete te, nai kada faik esa dalen,
ala lameda ndoe lalan seli,
ala lamatani lakaleleu,
ma sila boe oo musi mate nduadak.
Losa hataholi la mbia heni sala leni haꞌi dale leu.
Losa haꞌi naꞌa heni basa sila mbombolan.
Te Manetualain mana koasa nai lain seli, Ana fee huhukuk ia.
Ma Manetualain fo ana seli ndia, naketu dedeꞌak ia.✡Yesaya 47:7-9
9 Fai makahulun, mane-mane kala
mai lambue hohongge lo kota ndia hataholi nala,
ma soda-ladan neulauk nai lain seli ndia.
Dei fo ala lita haꞌi masuk hene neme haꞌi ndia mai,
dei fo ala bubuluk, lae, haꞌi naꞌa basa kota ndia so.
Boe ma ala lamatani lakaleleun.
10 Boe ma ao nala mumulu, lita hataholi la doidoso nala.
Tehuu kada ala lambalani lambadeik lai dook.
Ma kada ala lambalani suli leme ele mai.
Boe ma ala kokolak, lae,
‘Awii! Kasian Babel ei!
Awii! Kasian kota fo ana seli ndia ou!
Te kada nai liꞌu esa dalen, o hambu huhukuk so.
Te kada ta doo anak, na, o makalulutuk so.’✡Yeskial 26:16-17
11 Amanene leondia, boe ma hataholi fo makahulun, leme basa mamana kala, mai danggan lai ndia,
sila boe lamatani lakaleleu.
Te ta hambu hataholi esa boe,
nau hasa sila baloꞌa naseꞌo nala bali.✡Yeskial 27:31, 36
12 Ta hambu hataholi esa boe nau neu hasa
sila bua balias lilo mbilan, lilo fulan,
batu manggahadon, do, mutiara bali.
Ta hambu hataholi esa boe, nau neu hasa
sila tema lenen, tema sutra,
do, tema bangganaꞌuk feꞌe kala fo mbilas, do, mbila balanggeok.
Ta hambu hataholi esa boe, nau neu hasa
sila bua nala leme ai kaboo menik, nggadi noli nana dokik,
do ai nana dokik feꞌek kala.
Ta hambu hataholi esa boe, nau neu hasa
sila bua nala leme liti, besi, do batu mamer mai.
13 Ta hambu hataholi esa boe, nau neu hasa
sila ai lou makeen ma bumbu-fani mata-mata kala.
Ta hambu hataholi esa boe, nau neu hasa
sila ai daa kaboo menin, do mina kaboo menin mata-mata kala.
Ta hambu hataholi esa boe, nau neu hasa
sila anggol oek, mina setun,
hade uu, do, hade-gandum.
Ta hambu hataholi esa boe, nau neu hasa
sila sapin, biꞌilombon, do, ndala nala.
Ta hambu hataholi fo nau neu hasa
sila nggili nala,
do, sila ata nala.✡Yeskial 27:12, 13, 22
14 Dei fo hataholi dangga nala, fale dale nala, lae leoia,
‘Awii, Babel ei!
Awii, kota fo ana seli ndia ou!
O bua neulau nala, fo o hataholi mala lahiik lalan seli ndia,
taa kasa so.
Basa-basan mopo sala so,
losa ala hata ta, de langgananalo lalan seli.’
15 Makahulun, hataholi dangga nala sila lamasuꞌi, huu kota ndia fo sama leo ina kalabik.
Te hatematak ia, ala fale dale nala ta mana basak.
Ala bii lalan seli,
lita kota ndia hataholi nala doidoso lalan seli so.
Ao nala mumulu lalan seli,
lita sila huhukun ndia.
Te kada ala lambalani suli leme dook mai.
Kada lambalani lambadeik lai ele.
16 Boe ma ala kokolak, lae,
‘Awii! Kasian Babel ei!
Awii! Kasian kota fo ana seli ndia ei!✡Yeskial 27:31, 36
Makahulun o hataholi nala, ala pake baloꞌa mbilas bangganauꞌuk do mbila balanggeok,
neme tema mabeli ana seli.
Makahulun o hataholi mala balias lilo mbilas, mutiara,
ma batu manggahadok fo belin ana seli.
17 Tehuu kada nai liꞌu esa dalen,
o bua mala taa kasa so.
Kada ta doo anak,
o suꞌi mala mopo basa sala so!’
Makahulun boe, ofak kapatei nala, ma mataroo sala
saꞌe ofak leu-mai lai kota ndia.
Tehuu hatematak ia, kada lambalani see lai dook.
Te hatematak ia, kada lambalani suli leme dook ele mai.✡Yesaya 23:14; Yeskial 27:26-30
18 Ala lanilu haꞌi masuk mana kalua neme haꞌi ndia mai.
Boe ma, ala bubuluk lae, haꞌi naꞌa heni basa kota ndia so.
Boe ma ala fale dale nala, de kokolak lae,
‘Awii, kasian! Ta hambu kota feꞌek
fo ana selin sama leo Babel bali.
Awii, kasian! Ta hambu kota feꞌek,
fo malolen sama leo ndia bali.’✡Yeskial 27:32
19 Ala laꞌu afu, de taon neu langga nala
huu ala dale hedi.
Ala lamatani lakaleleu,
huu dale nala lakalulutuk.
Boe ma ala kokolak, lae,
‘Awii! Kasian Babel ei!
Awii! Kasian kota fo ana seli ndia ou!
Ai saꞌe ofak miu-mai, mini buas fee o so,
losa ai boe oo mamasuꞌi.
Ai lemba mini o bua fufuam so,
losa ai boe oo masoda neulau nalan seli boe.
Tehuu kada nai liꞌu esa dalen,
basa sila, mopo heni sala so.
Kada ta doo anak,
basa sila, lakalulutuk basan so.’✡Yeskial 27:30-34
20 Boe ma, hala mana kokolak ndia nakadaik bali, nae,
‘Wei, ei mana masoda malai nusa-sodak,
ei dale mala ta hedis so bali.
Wei, Manetualain hataholi nala!
Ei dale mala boso mameda hedis bali.
Wei, Manetualain hataholi nadedenu nala!
Ela ei dale mala lamahoko.
Wei, Manetualain mana kokola nala!
Ela ei dale mala lamahoko.
Makahulun, Babel ndia tao nakatotoꞌak ei,
ma tao doidoso ei.
Tehuu hatematak ia, Manetualain bala ei doidoso mala so.
Te hatematak ia, Ana bala kota ndia manggalaun.’ ”✡Tui Seluk laꞌeneu Dala Sodak 32:43; Yermia 51:48
21 Basa ndia, boe ma au ita ata esa neme nusa-sodak mai, balakain ana seli. Ana mai soꞌu nala batu inahuuk esa baꞌu leo hataholi esa. Boe ma, ana mbesi batu ndia neni tasi dale neu. Ndia boe nafada nae,
“Neu ko ala tao lakalulutu Babel leondiak boe.
Neu ko ala tao lamopo heni kota fo ana seli ndia boe.✡Yermia 51:63-64; Yeskial 26:21
22 Ta hambu hataholi esa so bali,
fo nakaminak musik nai kota ndia.
Ta hambu hataholi esa boe,
fo namanene sasanu, hitar, kinuk,
do toꞌik liin nai kota ndia bali.
Ta hambu tukan esa boe,
fo tao ues nai ndia babaꞌen bali.
Ta hambu hataholi,
fo mbau hade nai kota ndia bali.✡Yeskial 26:13; Yesaya 24:8
23 Ta hambu hataholi esa boe,
deꞌde banduk nai kota ndia bali.
Ta hambu hataholi esa,
fo tao feta kabin nai ndia bali.
Makahulun, kota ndia mana seꞌo-hasa bua sala,
ala lamasuꞌi lalan seli so.
Makahulun, Babel hataholi mana dangga nala,
soda nala neulaun ana seli so.
Tehuu ala pake malela makiuk,
fo kedi-fudi hataholi manai daebafok.✡Yermia 7:34; 25:10
24 Babel hambu huhuku mabela ia so,
huu ndia nambue tao nisa Manetualain mana kokola nala.
Kota fo ana seli ndia nakalulutuk so,
huu, nambue tao doidoso Manetualain hataholi nala losa mate sala.
Hambu Manetualain hataholin luma boe, ala tao lisa sala lai mamana feꞌe kala.
Tehuu Babel musi lemba basa sala kala sila.
Kota fo ana seli ndia ana musi lemba natataak ndia.”✡Yermia 51:49
✡18:2 Yesaya 21:9; Yermia 51:8; Dae-bafok Mata Beuk 14:8; Yesaya 13:21; Yermia 50:39
✡18:3 Yesaya 23:17; Yermia 51:7
✡18:4 Yesaya 48:20; Yermia 50:8; 51:6, 45
✡18:5 Tutuik laꞌeneu Sososan 18:20-21; Yermia 51:9
✡18:6 Sosoda Koa-kio kala 137:8; Yermia 50:29
✡18:8 Yesaya 47:7-9
✡18:10 Yeskial 26:16-17
✡18:11 Yeskial 27:31, 36
✡18:13 Yeskial 27:12, 13, 22
✡18:16 Yeskial 27:31, 36
✡18:17 Yesaya 23:14; Yeskial 27:26-30
✡18:18 Yeskial 27:32
✡18:19 Yeskial 27:30-34
✡18:20 Tui Seluk laꞌeneu Dala Sodak 32:43; Yermia 51:48
✡18:21 Yermia 51:63-64; Yeskial 26:21
✡18:22 Yeskial 26:13; Yesaya 24:8
✡18:23 Yermia 7:34; 25:10
✡18:24 Yermia 51:49