11
Manetualain dalen tuda neu hataholi Israel asa
1 De, au sangga atane leoiak: fama ei duduꞌa mae, “Huu hataholi Israel asa, tala nau lamanene neu Manetualain, huu ndia de Ana timba heni sala”. Leondiak do? Taa! Te au boe oo uma sila mai!” Au ia, uma leo Benyamin mai. Benyamin aman, ndia Yakob. Ndia baꞌin, Isak. Isak aman, Abraham, fo ana dadik neu basa hataholi Israel asa bei-baꞌi nala.✡Filipi 3:5 2 Manetualain ta timba heni nitak Ndia hataholi nala. Ana nalelak memak sila neme makahulun ele mai. Ei bei masaneda hata fo nana sulak nai Manetualain Susula Malalaon laꞌeneu baꞌi Elia? Ana manggalau neu Manetualain laꞌeneu hataholi Israel, de noke fo Manetualain huku sala, 3 nae,
‘Lamatuak! Hataholi la ia, tao lisa mana kokola la,
fo Lamatuak nadenu sala mai.
Sila boe ala ofe lakalulutu heni mei tunu-hotuk,
nai mamanak fo hataholi lakaluku-lakatele neu Lamatuak.
Neme basa Manetualain mana kokola nala mai,
kada au mesa nggau bei kasodak.
Tehuu sila boe sangga dalak bali,
fo sangga tao lisa au!”✡1 Mane-mane kala 19:10, 14
4 Tehuu Manetualain nataa, leoiak: “O kokolam ndia, sala! Te Au hataholi nggala fo mana makaluku-makatelek neu Au, bei hambu hataholi lifun hitu. Ala lahele teas, ma tala songgo Baꞌal!”✡1 Mane-mane kala 19:18
5-6 Leondiak boe, hatematak ia. Te ta basa hataholi Yahudi la, heok lasadea Manetualain. Bei ela hataholi luma leme ai mai, hataholi Yahudi fo Lamatuak hele nala sala so, fo sangga fee sala lasoda. Ana tao leondiak, huu Ana nau natudu Ndia dale malolen neu ai, tehuu ta timba-tai ai tataon. Mete ma Lamatuak hele nala hataholi fo bala ndia tatao malolen, ndia sama leo bae nggadi. Ndia taa nandaa no Lamatuak hihii-nanaun fo natudu Ndia dale malolen neu hataholi fo Ana hele nala kala.✡Tui Seluk laꞌeneu Dala Sodak 7:7-8 7 De, ndia sasai-main, leoiak: hataholi Yahudi noꞌu kala lasanggak, fo Manetualain natudu Ndia dale malolen neu sala, fo sila boe bisa lalole lo Ndia. Tehuu ta hambu ndoos, huu sila dale nala lakababatu, ma ta nau lamanene Ndia. Tehuu luma ala hambu. Sila ndia fo Manetualain hele nala mema kasa so. 8 Nai Manetualain Susula Malalaon, nana sulak, nae,
“Manetualain fee sala,
mata fo ta mana nitak,
ndiꞌidoo fo ta mamanenek,
ma nggoak fo ta bisa duduꞌa.
De, ala ta bubuluk bee ndia tetebes,
losa faik ia boe”.✡Tui Seluk laꞌeneu Dala Sodak 29:4; Yesaya 29:10
9 Mane Dauk boe oo sulak laꞌeneu hataholi nusa Yahudi, nai Susula Malalaok, nae,
“Ela sala lafetak lai sila mei heheli nala.
Te sila feta hehelin ndia, ana ika nasafali sala,
fo ala duduꞌa basa-basan malole so.
Ma sila hata heheli nala, tao lala sala lakatunu.
10 Mae sila mata nala makiu,
fo ta bisa lita hata-hata!
Ela sala lemba belak lakandoo,
fo deaina nala boe bokoluku!”✡Sosoda Koa-kio kala 69:23-24
Lamatuak nau fee sodak neu hataholi ta Yahudi boe
11 De, au sangga atane leoiak: hatina de hataholi Yahudi la lakatunu? Ala tuda so, hetu? Ta! Tehuu tala nau lamanene neu Manetualain, ma tala nau lamahele neu Karistus, de ndia soi dalak fee hataholi ta Yahudi la, fo ala hambu sodak leme sila sala-singgo nala mai. Ma Ana tao leondiak, na Manetualain nau fo hataholi Yahudi la dale hedi, boe ma ala fali tungga Ndia bali. 12 Manggaledok so, nae, hataholi Yahudi la laꞌolena hata fo ndoos. Huu ndia de hataholi feꞌe kala leme basa daebafok katematuan mai, fo bisa lameda Manetualain dale malolen. De, hataholi Yahudi la, laheni lalan seli. Tehuu ndia ana tao nala hataholi ta Yahudi la hambu nanala inahuuk. Naa, doo-doo, fo mete ma basa hataholi Yahudi la boe malole fali lo Manetualain, na, ndia malolen lena bali!
13 Naa! Au sangga afada ei hataholi ta Yahudi, leoiak: Manetualain nadenu au so, fo au laꞌo uu afada ei, laꞌeneu Ndia Hala Malolen. Huu ndia de au mbalak au eing, fo akalalaꞌok ues ia, fo lolen ana seli. 14 Te mete ma au akalalaꞌok ues ia no malole, na, nafo au tao ala au hataholi Yahudi nggala mesa kasa ala dale hedi, losa sila luma hambu sodak leme sila sala-singgo nala mai. 15 Faik fo Manetualain timba heni Ndia hataholi Yahudi heheli nala, na, ndia soi dalak, fo hataholi feꞌe kala ala hambu lelak, fo bisa ala maso dadik leu Manetualain hataholi nala. Tehuu, leo ala mole-dame bali lo Manetualain, na, ndia malole hiak. Te ndia sama leo ala lasoda fali, leme sila mamaten mai!
16 Haꞌi conto neme hataholi mana sangga tao loti. Mete ma ana haꞌi nala hade uu fa, fo feen neu Manetualain, na dei fo loti katemak ndia boe, dadik Manetualain enan fo malalaok. Ma mete ma hataholi fee ai huuk okan esa, fo dadik neu buna-boa sososak, fo feen neu Manetualain, na, dei fo ai ndia katemak boe, dadik neu Manetualain enan fo malalaok.
17 Au nau akasasama hataholi nusa Yahudi no ai setun fo nasoda nai osi. Manetualain beta heni ai ndia ndanan luma. Tehuu ei ta Yahudi la, sama leo setun fui. Basa de, Manetualain beta nala ei ndanan luma, de nakadiditan neu ai manai osi ndia dalek. No leondiak, na ai manai deak, simbok nala ndia sodan neme ai manai dalek. Ndia sama leo ei ta Yahudi la, de simbok mala Manetualain dale malolen, fo teteben Ana sangga feen neu Ndia hataholi Yahudi nala. 18 Tehuu, mata neuk bou! Boso koao, huu ei duduꞌa mae ei mima deak mai ndia, malolen lena neme ndanak fo Manetualain beta heni sala so! Mete ma o nau sosoꞌuk aok, na boso mafalende henin, te kada o ndanak esak! O ta ndia tao matea ai ndia. Te, okak ndia ana tao nala ai ndia dadik natea!
19 Fama o sangga mae, “Manetualain beta heni ndanak esa neme ai fo nasoda nai Ndia osin dale, fo ana nakadidita falik au nai ndia, fo nggati neu ndana laak”. 20 Ndia tetebes. Tehuu boso mafalende henin, mae, Manetualain beta heni ndana kala sila, huu ala ta lamahele neu Karistus. Ma o nggati sala, huu o mamahele neu Ndia. De, boso koao! Malolenak o mata neuk, ma boso tao mata-matak! 21 Te hataholi Yahudi la, sama leo ndana isi-isik fo moli nakahuluk. Tehuu Manetualain ta ela sala lahele lala dook lai ndia. De, mete ma o ta mamahele makandoo neu Ndia, na boso mamahena Ana nau ela o mahele nai ndia!
22 De, ei musi duduꞌa neulalau dei. Manetualain dalen malole. Tehuu Ndia boe nalelak fee huhuku belak. Dei fo Ana huku hataholi fo mana tudak, fo ta nau malole no Ndia. Tehuu soaneu ei hataholi ta Yahudi la, Manetualain natudu Ndia dale malolen neu ei, sadi ei nanambaꞌak nakandoo mia Ndia, ma feen lelak fo ela Ana tao malole fee ei. Tehuu mete ma ei ta feen lelak fo ela Ana tao leondiak, na Ndia boe oo nau beta nggali heni ei mima Ndia huun mai. 23 Leondiak boe no hataholi Yahudi la. Mete ma ala hondak, fo mulai lamahele neu Karistus, na dei fo Manetualain nau nakadidita falik sila neu ai huu isi-isik ndia. Te Ndia naena koasa, fo bisa tao leondiak! 24 Te ei fo hataholi ta Yahudi, sama leo ndanak neme ai setun fui, fo makahulun ana moli aon nai osi deak. Mae ai fui feꞌek mesa kana ma ai manai osi mesa kasa feꞌe, tehuu Manetualain hele nala dua sala, fo Ana nakadidita kasa neu ai setun huun malole, fo Ana selen nai Ndia osin. Te mete ma hataholi ta Yahudi bisa dadik leondiak, na, nakalenak hataholi Yahudi la. Ndia bisa lena bali, mete ma Manetualain nakadidita fali kasa leu ai la huu dadadin.
Dei fo hataholi Yahudi la malole seluk bali lo Manetualain
25 Tolanoo kala malai Roma! Au afada dedeꞌak namaninok neu ei, fo ei boso koao, mae ei malelak. Leoiak: hatematak ia, hataholi Yahudi la dale batuk, ma tala nau lamahele neu Karistus. Tehuu ala ta leondiak lakandondoo henin. Tungga Manetualain hihii-nanaun, basa hataholi ta Yahudi la, fo Manetualain hele nala sala so, musi lamahele leu Karistus dei. Mete ma sila dedesin nala manadaik, na bei fo hataholi Yahudi la boe lamahele neu Ndia boe. 26 De, mete ma fain ndia losa so, na, dei fo Manetualain fee sodak neu basa hataholi Yahudi la leme sala-singgo nala mai. Ndia sama leo nana sulak nai Susula Malalaok so, nae,
“Dei fo hambu Hataholi esa mai,
fo tao nasoda ita teme soe mai.
Ana mai neme lete Sion, nai kota Yerusalem.
Ndia dei fo tao Yakob numbu-sadu nala ala hondak.
Ala musi hondak, huu ala lasoda ta mbali Au,
ma ala heok lasadea Au dala soda ndoong.✡Yesaya 59:20-21
27 Au nau koka heni sila sala-singgo nala.
Te Au mbaꞌa heheluk ua sila leondiak”.✡Yermia 31:33-34
28 Neu faik hataholi Yahudi la lamanene Karistus Hala Malolen, na, ala tao ao nala leo musu, fo laban Ndia. No leondiak, na, ala fee lelak neu ei fo ta Yahudi la! Mae leondiak, tehuu Manetualain bei sue sala, huu Ana sue sila bei-baꞌi nala, ma Ana hele nala sala fo dadik neu Ndia hataholi nala. 29 Te mete ma Manetualain fee heni hata esa, na Ana ta hela fali kana. Ma mete ma Ana noke nala hataholi so, fo maso dadik Ndia hataholin, na Ana ta husi heni sala bali.
30 Makahulun, ei hataholi ta Yahudi la ta nau mamanene neu Manetualain. Tehuu hatematak ia, ei mana simbo Manetualain namemeda kasian, huu hataholi Yahudi la fo ta nau lamanene Ndia. 31 De, hatematak ia, sila ia, ta tao tungga Manetualain hihii-nanaun. Huu ndia, de, Manetualain bei nau natudu Ndia namemeda kasian neu ei. Ma dei fo, Ndia boe nau kasian neu sala bali. 32 Hatematak ia, Manetualain suli hataholi Yahudi la, na, sama leo hataholi ta Yahudi. Te sila basa sala, ta tao tungga Ndia hihii-nanaun, sama leo sila nana longgak, de ta bubuluk dala kaluan. Ana ela sala leondiak, fo bisa natudu namemeda kasian neu basa hataholi la.
Manetualain ndia, malolen ana seli!
33 Manetualain malelan ana seli!
Ma Ndia boe pake Ndia malelan, fo tao dedeꞌa malole.
Ta hambu hataholi bisa nalelak tebe-tebe Ndia.
Ta hambu hataholi ana bubuluk tebe-tebe Ndia nakeketu dedeꞌan.
Ta hambu hataholi esa boe bubuluk,
hatina de Ana tao dedeꞌak esa.✡Yesaya 55:8
34 Ta hambu hataholi esa, bubuluk tebe-tebe ita Lamatuan duduꞌan.
Ta hambu esa boe, fo bisa nanoli-nafada neu Ndia.✡Yesaya 40:13
35 Ta hambu hataholi, bisa ana fee hiak Manetualain buas esa,
Ta hambu hataholi, bisa nakaseti Manetualain, fo bala falik!✡Ayub 41:11
36 Te basa-basan naoka neme Manetualain mai!
Basan dadi, huu Ndia!
Basa hata fo ita taon,
na ita taon soaneu Ndia.
Ita soꞌuk koa-kiok neu Ndia,
losa dodoon neu!
Tetebes leondiak!✡1 Korintus 8:6