Atham iaine ul woKurunthuc 1
Atham wocittokït ammakka oPoluc pokurrinet ul wonokaꞌran koKurunthuc
Lon lonothon
Pul pothothïlettat poIeccuo oPoluc pokurrinet ul wonokaꞌran koKurunthuc atham enni, ikokat kïttïk ikokat noththok pAkia. OPoluc pongkenet nokaꞌran koKurunthuc maꞌri marrothe thuput (Ngre 18) ana ul woppot woccokathe lon loIeccuo nomïkït. Anaruk akka oPoluc poththet nokaꞌran koKurunthuc, lon lokakatheik loppot lokithak urokat iakin ithoccokothe lon loMiccie than, ittina kwokurrathe enni othakka itti akwokꞌro lon len.
Iatham enni oPoluc pakene tat akka lokithak itti noul ioccokothe lon loMiccie itti willillako tit mungkut mungkut imaꞌrettaro tit (Kuꞌrathal 1-4). Ana kwaꞌrettot napilingon akka okin thokat akin okkot lon lokithak ammakka ul iommat Kapik (Kuꞌrathal 5-6). Kwangkene ul ioccokothe lon loMiccie okkinthet oparion ana ollen ana ul woruan (Kuꞌrathal 7). Kwacimitto kin cakuruk itti okin thikkoik tat ammakka ul ioccokothe lon loIeccuo ithoꞌrikït thoul iaꞌrane apik wꞌrek ngaꞌrama, ana itti okin thaꞌrane Kapik tothun. Kwakene kicce tat akka Kanang ikupupure kethet ton lon nuthuk loppot, ana cannan thongarot (Kuꞌrathal 13), akwittarot ton aron aꞌrane Kapik ngaꞌrama ana ikkoik ammakka ul ioccokothe lon loMiccie, ana okwarikiet kin itti akka oMiccie purokot nti ithio oron thina itti Kapik kurokieron nti ithio aron okkoik attang.
1
1 Oun oPoluc ipa Kapik kakkarot itti mpathakka pul pothothïlettat poMiccie oIeccuo ammakka Kapik kongothe ana opang ponnon oCocaththanic.
2 Lon elli laine ul ioccokothe lon loIeccuo nokaꞌran koKurunthuc ana okkwion ithaik iaMiccie oIeccuo ana ithakkarakot naꞌran appik akin oka thupupure ana okkwion ithaꞌrane Ili wonnon oIeccuo ngaꞌrama, Ili wen ana wonnon.
3 Athoporot ana thomicco nnAngappa ponnon ana Ili oIeccuo oMiccie oka nanon.
OPoluc papirane Kapik noka
4 Mpapirane Kapik noka appin appin nti ithoporot thung ithakkwethet non nti ilon loMiccie oIeccuo ilanon thaik tit. 5 Akka onon thothakkat aꞌrthan iaak llon ammakka itti nthere ithannere ngngin appik ana ithinaik ithanon thinaik ngngin appik. 6 Akka thimma lon ngkït thïn ana therene non lon loMiccie thaik ïcat. 7 Ittina onon thakorronno oka thella thethettat nuthuk thoKanang ikupupure koKapik anon thaik thaꞌrikot Ili wonnon oIeccuo oMiccie akwokkaprttako ntan. 8 Kwaꞌrumo nanon thonthomat puccuk anon othakkakat thella thorukwettat cik nocaꞌri ica Ili wonnon oIeccuo oMiccie okkaprttako ntan. 9 Kapik ikakkarot non annoka tothun nukul wung oIeccuo oMiccie Ili wonnon kaccot kït nolon ila kwiꞌret.
Thillillakorit iul ioccokothe lon loIeccuo
10 Pangkingon, mperenenon ngkꞌran koIli wonnon oIeccuo oMiccie itti onon thïꞌrïkarot lon tothun othakka itti anon okorronno illillakorit ana annona lon lulukku ana ona thokwarttikot cik thulukku. 11 Pangkingon, opilingon nti iul woKalua thiꞌrethin itti onon thaik thaꞌrettutto. 12 Ila mpongothe itti mpiꞌre itti opilingon nti ianon thiꞌre itti, “Mpamakot oPoluc” ana opilingon iꞌre itti, “Mpamakot Apolloc” ana opilingon thꞌrek iꞌre itti, “Mpamakot oPuththuruc,” ana opilingon iꞌre itti, “Mpamakot oMiccie.”
13 OMiccie pillillakot tiri? OPoluc akkokkuttathe nothapak nti ilon loni? Onon thoccot mamuthie ngkꞌran koPoluci? 14 Mpopirat noka akka mpakarrnnethet opilin mamuthie nti ianon, mpethet oKkricppoc pulluk ana oKaioc, 15 Ittina pul pella ipiꞌre itti kwoccot mamuthie ngkꞌran kin. 16 Ana cakuruk mpethet ul woruan toIciththipanac mamuthie ana mpomma amma mpethet opilin pꞌrek cakuruk. 17 Akka oMiccie pokat pakorronno othïothin itti mpathethet ul mamuthie anaruk itti mpathongkene lon iloporot loIeccuo, okorronno oka nthinaik nti ica thopul iponyi anaruk anina nan itti thiot thoMiccie nothapak thakarrnno urat puꞌran cik ntit.
OMiccie ook thinaik nti ica ana puꞌran poKapik
18 Akka lon loMiccie lothiot nothapak laul wella kït ken iaik wurat cik, anaruk oron ithoꞌrettathe thakatha itti puꞌran poKapik. 19 Akka lokurrakot itti,
“Mpakïtto thinaik nti ica thoul iꞌre itti winaik nti ica
ana okïtto nyatheꞌre nyokkwion ithiꞌre itti okin thinaik cannan.”1.19 Iccaia 29.14
20 Pul paik kartha ipinaik nti ica? Pul paik kartha ipangkene lon lothonceꞌret lon cik? Kapik kothikkiet thinaik nti ica thonocapu ncik appik thommaik. 21 Ana Kapik nthinaik nti ica thung kimmat itti capu ncik appik cakarrnninak nthinaik thopul iponyi, koꞌrekathe ul appik ioccokothe lon nthongkene thïn ithakorronno oka thonthomat. 22 Ul woIouth wongothe itti okin thimma lon ilommaththik loKapik ana ul iannoka woIouth wakwariccat lon lothinaik ntica 23 anaruk onïn thangkene lon lothiot thoIeccuo nothapak, thongkene then thonthomat noul woIouth ana ul iakorronno oka woIouth wokatha itti thongkene then thellat lon cik. 24 Anaruk okkwion ithaKapik kakkarot ammakka ul woIouth ana ul iakorronno oka woIouth thina itti oMiccie puꞌran poKapik ana thinaik nti ica thoKapik. 25 Akka thommaik thoKapik thathinaik nothinaik thopul, ana thomma lon thung thonthomat nathopul iponyi.
26 Pangkingon nokwarttikot itti onon thokat tat caꞌri ica Kapik kakkarot non. Oplingon thotteik nti ianon thokat thinaik nti ima nocapu ncik appik, ana okin thotteik nti ianon thonat puꞌran ana okin thotteik nti ianon thokwontat thaaꞌrthan. 27 Anaruk Kapik kummot aꞌrupu iommaik wonocapu ncik appik akothie ul cik ngngin inaik nti ima ana kummot aꞌrupu wonocapu ncik appik iakannoka wonthomat akothie ul cik ngngin ionthomat. 28 Kapik kummot lon ilaul wella lon len ana wopaꞌrinet cik nocapu ncik appik, ana aꞌrupu iellaik, othakka itti akokïtto aꞌrupu iaul okatha itti ien akkoporot. 29 Kapik kokkothe lon elli apul ella ipipot ka thoura tokït kung. 30 Ana elli akka onon thokanet iaMiccie oIeccuo ook ipothakkanet ton thinaik ntica thoKapik ana thoporot tokït koKapik ana thupupure ana thelikkako thonnon. 31 Ilen akka lokurrakinet iatham woKapik itti, “okkwi ipongothe itti kwipot ka thoura akwokkot, akwipot ka thoura Ili oIeccuo ngngin.”1.31 Armia 9.24