Atham iaine ul woThocculunukkia 1
Atham wocittokït ammakka oPoluc pokurrinet ul wonokaꞌran koThocculunukkia
Lon lonothon
Thocculunukkia thokat carak coman conoththok poMakthonia. OPoluc poingkathe nokaꞌran koThocculunukkia ana kwoingkathe nocuththun caꞌrama ana kwerekanthet ul lon loIeccuo. Ul wꞌrek woIouth ana iakonnoka woIouth woccokathe lon nomïkït ilerethe oIeccuo. Anaruk ul wꞌrek woIouth wꞌrakathe lon loPoluc. Ittina aPoluc poththekathe noThocculunukkia ana kwoingkathe nokaꞌran koKurunthuc.
Anakka kwokat cik nokaꞌran koKurunthuc, oThimiththaoc ponakanthok lon loul ioccokothe lon nomïkït wonokaꞌran koThocculunukkia. Okin thokat thonthomat ithongarot then ana thoccokot lon nomïkït. OPoluc pokurrinet kin akin oꞌrungkwot ithoccokot lon nomïkït then.
Ul wꞌrek ioccokothe lon nomïkït wocoꞌrathe nti ire akka okin thonat lon nomïkït itti Ili oIeccuo paik pakkaprttako accokkot. Opilingon thokat thakannoka thoporot noka akka ul wꞌrek ioccokothe lon nomïkït loIeccuo willet aIeccuo parthuk okkaprttako. Ittina oPoluc pokurranthet kin akwokenekin thao thoIli ana okin thikkoik tat puccuk akwakkakat.
Lon ilaik iatham
1. Thomicco (1.1)
2. OPoluc popiranet Kapik noka noul wonokaꞌran koThocculunukkia (1.2—3.13)
3. OPoluc pongkenet ul itti wikkoik thikkoik itha Kapik kongothe (4.1–12)
4. Thongkene ana lon lothao thoMiccie (4.13—5.11)
5. Lon lothikkoik thoul woMiccie (5.12–22)
6. Lon ilocothothe (5.23–28)
1
Oun oPoluc ana oCcila ana oThimiththaoc thamicco non ithoccokothe lon loIeccuo thonokaꞌran koThocculunukkia, itha ul woKapik oNgappa ana woIli oIeccuo oMiccie itti athoporot ana thomicco thoKapik oka nanon.
Thoccokot tholon loKapik ana thikkoik thoul woThocculunukkia
Onïn thopiranet Kapik noka nanon appik appinappin amma ïnaꞌranok ngaꞌrama nti ilon lon. Onïn tharthuk thaik thakwarttikot non tokït koKapik oNgappa ponnon, nothoccokot lon loKapik nomïkït mon ana oreko ngngin ana tat akka thopoꞌrathan ithongarot thokorronnot non annoreko cannan ana thoccokot cïkït ilon nthoꞌrïkot cik thoIli oIeccuo oMiccie.
Pangkingon, onïn thina itti Kapik kongothenon ana kakkarot non annoka ul wung. Akka thongkene thïn ithanïn thongkenet non tholon iloporot loIeccuo thakannoka lon nuthuk, anaruk thokat mpuꞌran poKapik ana Kanang ikupupure ana ilanïn thina papenang itti laik ïcat. Onon thina tat akka oron thikikkot cik unaththungon ana akka onïn nthokkinthet non lon loporot anïn ittarot non nolon loka kon. Onon thinnikothenïn ana Ili oIeccuo, ana manna nthoccokot thiak, onon thaꞌrungkothe ithopira noka nthoccot lon loKapik nthopira noka itha Kanang ikupupure kethet non. Ittina onon thothakkanet ul ioccokothe lon loIeccuo nomïkït appik, ul ia ul oneko lon nnan noththok poMakthonia ana poKrik. Lon loIli oIeccuo lopettakatheik nti ianon annoka tulluk noththok poMakthonia ana poKrik, thoccokot lon loKapik nomïkït thon thothakkat thinakot nan naꞌran appik, ilen akka onïn thaik thakannapperenthet lon len. Akka okin thellek theret thikkoik ithanon thikkiet nïn cik. Ana okin eret itti tat akka onon thopaꞌrinet nikkillan cik annoine Kapik, annorekanthet Kapik ikaik ïcat ana lon lung laik ïcat. 10 Ana oꞌrïkot ukul wung oIeccuo ianthan ntothiꞌrot, oIeccuo ipa Kapik kurokwiet nti ithio. Ook ipakkieron cik nti ithuaka thoKapik nocaꞌri ica akathokïtto capu.