Atham woThimiththaoc 1
Atham wocittokït ammakka oPoluc pokurrinet oThimiththaoc
Lon lonothon
OThimiththaoc pokat purnantoccokot lon loIeccuo. Onnan poThimiththaoc pokat ponoul woIouth ana oththan pokat pakonnoka ponoul woIouth. Kwokat cik akwommakot oPoluc akin ongkene lon iloporot loIeccuo oMiccie. OThimiththaoc pokat ere ukul woPoluc. OThimiththaoc pothakkakathe pul ipittarot oPoluc ire ngung ngoKapik.
OPoluc pothïathe oThimiththaoc nokaꞌran kApuccuc akwothittarot ul ioccokothe lon nomïkït than. Kwiꞌrethe itti kwiꞌret ul acoꞌro nti ithongkene lon ilakonnocoꞌrot cik. Kwokenekathok ul iekkot nan itti waka ul ionu lon ikkun loul ioccokothe lon loIeccuo ana ul iittarot ul ioccokothe lon loIeccuo ana tat akka aul ioccokothe lon loIeccuo ikkoik. Ana kwiꞌrethe oThimiththaoc itti kwaka pul ipoporot tat poIeccuo oMiccie.
Lon ilaik iatham
1. Thomicco (1.1–2)
2. Lon loul ittïttïk ana thaꞌrane Kapik ngaꞌrama (1.3—3.16)
3. Lon lore ngoThimiththaoc (4.1—6.21)
1
1 Oun oPoluc pul pothothïlettat poMiccie oIeccuo, ipothïlethe mpuꞌran poKapik ikaꞌret ton ana oIeccuo oMiccie pothoꞌrïkot thonnon. 2 Mpakurrinung oThimiththaoc oung ukul win ïcarïcat akka orit aththeꞌra thoccokothe lon loIeccuo nomïkït. Athoporot ana thiak ana thomicco thoKapik oNgappa ana oMiccie oIeccuo Ili wonnon oka naung.
Nokorronno okkwine ul iangkene ngkarra unu ncik
3 Mpiꞌrethung itti ngkwikkoik icarak coman cApuccuc ammakka mpiꞌrethung ampokat aneo noththok poMakthonia. Iꞌrethe ul iangkene ngkarra lon lonthomat itti akin ocoꞌro nti ithongkene thokarra. 4 Iꞌrethekin itti akin ocoꞌro nti itharttot lon lotheret ꞌran wothiki akka lon len lereket thopllarot ana lakannittarot lon ila Kapik konekketheik itti laccokittat nomïkït. 5 Lon elli ila mpiꞌrethung lonthoththomat lonu lon lung itti ngkwangkene ul itti wangarot tat mmïkït mupupure ana lon ilao noucce iloporot ana thoccokot lon loIeccuo nocïkït ïcat. 6 Ul iangkene ngkarra wocottakot nti ilon len akin opakkinthet lon ilella lon cik. 7 Okin thinnikot itti okin thaka ul iangkene lon lothonceꞌret lon cik anaruk okin thomma manna ilakin thaik theret ana ilakin thaik thapakkukket tit.
8 Oron thina itti lon lothonceꞌret cik loKapik loporot amma pul porekot ngngin ammakka Kapik kongothe. 9 Oron thina cakuruk itti lon lothonceꞌret lon cik lokat lakannokkattanthet ul iakkot lon ila Kapik kongothe anaruk lokkattanthet ul iomma lon iakannoccïkot lon ana iakïtto lon iloporot ana iꞌrat lon loKapik, ana ionu lon ilokithak, iakannoka wupupure ana iakatha itti lon lella ilupupure ana ieret lon ilokithak noKapik. Lon lothonceꞌret lon cik lokkattanthet ul iangwo oththangon ana onangon ana ul iangwaro wꞌrek, 10 ana ul iaꞌro nul iari ittat, ana ul iomura iaꞌro nnul iomura, ana ul iakette pangken ana ul wokarra ana iakkwe mio ngkarra, ana lon lꞌrek ilakannomakot thongkene ithaik ïcat thoKapik. 11 Thongkene enthi thaat nnolon iloporot loIeccuo ilethiettat, ilaat noKapik ikekkot nan itti kamerekettat ana kwethin itti anothongkene ul wꞌrek.
Thoporot thoKapik thaine oPoluc
12 Mpopiranet oMiccie oIeccuo noka Ili wonnon, ook ipethin puꞌran ana ipokatharin itti mpekkot nan ana ook ipakkarothin ire ngung ngoKapik. 13 Ana manna mpokat anocungko oIeccuo ana occokiet ul thiak ioccokothe lon lung nomïkït. Anaruk Kapik kipot thiak thin akka mpappakannoccokot lon lung ana mpappommat lon ila mpokat cik anokkot. 14 Thoporot thoIli wonnon thettathin nuthuk thoppot ana thoccokot lon lung nocïkït ana thongat thoIeccuo oMiccie. 15 Lon elli iliꞌrettat laik ïcat ana lonu itti laccokittat papenang itti, “OMiccie oIeccuo paat nocapu ncik appik itti akwathoꞌret ul wolon ilokithak.” Ana oun akkokithak cannan ntiakin. 16 Anaruk Kapik kipot thiak thin, akwokene itti oMiccie oIeccuo poꞌrïkothin ittaꞌrene oun ipokithak cannan ana kwothikkierin pul ipa ul oneko lon nan iathoccokot lon lung nomïkït, akin iot thikkoik thothupuththuput. 17 Ntrun opirane Ili Kapik noka ana ethok thïrïk akka ook Kapik kothupuththuput ana kakannio ana ikakinnimmako ook Kapik kulukku ikaron othiane cik llon elli appik thupuththuput. Amin.
18 Ukul win, oThimiththaoc, mpethung lon elli ila ul ierente lon loKapik werentethung ngngin, othakka itti amakot ana aina akka angkene lon loKapik. 19 Oꞌrumi nolon lothoccokot lon loIeccuo nocïkït ana ella lon noucce ilokithak akka opilingon thꞌrat lon len ana okin thopaꞌranthet lon loIeccuo cik nomïkït. 20 Ana okin theꞌra nti iul wen oIminauic ana Alekenther mpethet kin pul pothopulut ana okin thonu itti okin thakannokattakot akin oul ioccokothe lon loIeccuo nomïkït, menik akin ina itti okin thacoꞌro nti ilon ilakin ocungkwo Kapik ngngin ilokithak.