1 Inakka onon thurokiettat annoMiccie, onon thonu itti onon thaccot kït naꞌrupu iaik tothiꞌrot na aMiccie pikkot cik thokkun wothothari woKapik. 2 Nokwarttikot aꞌrupu worithiꞌrot annokorronno aꞌrupu wonocapu. 3 Akka onon thokat thillet annoMiccie ana thikkoik thon thaik inenni thanguttat naMiccie na Kapik kaik. 4 Amma oMiccie ipethet non thikkoik ummot ncik, onon thummot ncik cakuruk onon aththungon ithïrïk.

5 Ittina nopaꞌrine lon lonocapu cik ilaik lareko ianon ammakka laik itti thaꞌro nnul nuthuk ana namat ana thongat lon ilokithak ana thïrïk nan akka thapaꞌrenon cik noKapik ana thakorronnonon annaꞌrane aꞌrupu wꞌrek ngaꞌrama. 6 Nti ilon elli ana aꞌrupu enni appik thua ka thoKapik thaka noul iakkot lon len. 7 Onon thokakkat cik annokkettet lon len akka onon tharthuk occokot lon loKapik.

8 Anaruk inenni onon thonu itti onon thacoꞌro nti ithua ka ana okkiet ul thiak ana ocungko ꞌran wen ana eret ul wꞌrek llon lokithak. 9 Nokorronno ammikkararot akka onon thopaꞌrinet kathar cik kothikkoik thon ikïpe ana lon len, 10 ana onon thommakothe kathar ikie. Ana onon thothikkiettat thie nthina Kapik ana ammakka okkwi ipokuꞌret lon ncik appik. 11 Ittina ul wella iiꞌre itti okin enthi thoul woIouth ana enthi thakorronno oka thoIouth ana enthi thakorronno okekkot ana enthi thokekkothe ana enthi thoul iomaik ana enthi thoul wokwat ana enthi thoul ia iak ana ithakorronno oka iak anaruk oMiccie akka lon ncik appik ana kwaik iaron appik.

12 Ittina onon enthi itha Kapik kocumot ana kothikkiet non thupupure ana itha kongothe. Ana ittina onon thonu itti thana thiak ana oka thoporot ana okorronno ipot ka thoura ana occokot cïkït ilon. 13 Nocoꞌrarot ana occïkarnthet lon amma opilin pokkinthet opang lon ilokithak. Noccïkarnthet ammakka Ili woccïkïnthet non lon ilokithak. 14 Ana nolon elli appik narttot nothongarot cannan akka thongarot akkïꞌrïkarot lon len tan annokakat tothun appik. 15 Nokorronno athomicco ithanthan naMiccie oka nomïkït athittarot non annïꞌrïko lon ilanon okkot akka thomicco enthi akka kwakkarothenon itti onon thikkoik tit ika kulukku koMiccie. Ana nthapira noka appinappin. 16 Alon loMiccie oka ianon ana nomïkït mon ana cannan amma anon ongkene ana ocimittaro llon iloporot nthinaik nti ica. Nongwo unye waꞌrama ana unye womocumur iapirie Kapik noka ana mmïkït mopiranet Kapik noka. 17 Ana manna ngre iannokkot ana manna lon ilanon eret, nokkot appik ngkꞌran koIli oIeccuo ana opirane Kapik noka oNgappa ponnon oMiccie ngngin.

18 Ul iari iittat, noccïkot olle pangon akka ilen akka onon thonu itti onon thakkot ammakka ul ioccokothe lon loIli.

19 Ul iomura ipot, nongat ari won ana okorronno othirriet kin cik cannan.

20 Nyukul, noccïkot lon loththen okin onnen llon appik, akka ilen akkapirie Kapik noka.

21 Oththangon thonyukul, nokorronno othirriet nyukul cik cannan akka okin thella kït kolon ana ella thiak tholon iloporot.

22 Iak, noccïkot lon lopït pangon thonocapu appik norekinekin, okorronno oreko ngkucul koka, nokorronno oreko tulluk akka okin thaik thakathaccenon othakka itti annopiriekin noka anaruk noreko mmïkït moporot ana othiane Ili cik. 23 Amma annokkot ngre ngꞌrek, nokkot ncïkït culukku ere onon thaik thakkinthet Ili okorronno oka ul ionyi. 24 Akka onon thina itti Ili Kapik akkakkenenon thokinya thon. Akka onon thaik tharekine Ili oMiccie. 25 Ana okkwi ipokkothe lon lokithak kwakkattanthet ilokithak ntit akka Kapik kakkama ul appik llon ilakin thokkothe.