Atham iaine ul woKalaththia
Atham ammakka oPoluc pokurrinet ul wonocoꞌrong coKalaththia
Lon lonothon
Kalaththia kokat cik ithoꞌrïkït thocapu iconu kꞌran inenni itti Thurkki. OPoluc ana oParnapa thokat thongkenet lon iloporot loIeccuo naꞌran wꞌrek woKalaththia ana ul woppot womakathe oMiccie (Kuꞌrathal 13-14). Anaruk akka lon len locothakothe, ul wakkakathe ana wongkenekathe ul ioccokothe lon loMiccie itti okin thonu itti okin thammakot lon lothonceꞌret lon cik loIouth ana thathuma then, ana ul wen wonu itti wakekkot. Ittina oPoluc pakwarikiet ul ioccokothe lon loMiccie itti Kapik kaꞌret okkwion appik ithoccokothe lon loMiccie ana okorronno oka okkwion ithammakot thathuma thꞌrek, ana kwerenekin tat akka elli lokat lokkattathe nul wothothïlettat woMiccie nokaꞌran koUruccelim (Kuꞌrathal 15).
OPoluc pangkene kicce tat lonthomat itti oron thapirie Kapik noka llon ilaron okkot, ana tat akka oron othakka thupupure tokït koKapik llon iloaron thoccokthe nomïkït, ammakka Aprein okkwi ipokat piki ponomun poul woIouth (Kuꞌrathal 3-4). Ana kwakene itti thikkoik thonnon ammakka ul ioccokothe lon loIeccuo thonu itti oron thittetta ngKanang ikupupure, othakka itti aron occïkot lon loKapik ilrïk itti oron thangat opilingon (Kuꞌrathal 5-6).
1
1 Oun oPoluc, pul pothothïlettat poIeccuo oMiccie iponekkettatheik mpuꞌran poIeccuo ana pongappa Kapik ikurokwiet oIeccuo nti ithio. Mpannonekkettat pul pothothïlettat poIeccuo llon lopuꞌrek annoka manna mpuꞌran poul anaruk nthakkaro thoIeccuo oMiccie. 2 Mpothinthet non thon oun ana opangkingon ithanïn thaik ïnaththungon appik, onon ithaik thoccokothe lon loIeccuo noththok poKalaththia. 3 Mpipittot Kapik ongappa ana Ili oIeccuo oMiccie itti athoporot ana thomicco oka nanon. 4 Ook ipethet ton ka kung akwokkieron cik nti ilon ilokithak lonnon ana oꞌret ton nti ilon ilokithak lonocapu loul iaron thaik tit ammakka Kapik ongappa kongothe itti laka. 5 Ook ipa thïrïk okane thupuththuput. Amin.
Lon lꞌrek lella nolon iloporot loIeccuo
6 Mpannopira noka akka lirrierin cïkït nti icarak itti inthopaꞌrinet lon cik accokkot loKapik ikakkarot non itti nthikkoik ithoporot thoMiccie anoine thongkene thꞌrek. 7 Annoka itti lon iloporot loIeccuo lꞌrek laik. Anaruk ul wꞌrek wiꞌrikiet non ilon ilacikittaro ma ilakannoka loMiccie itti okin thennekke itti okin thakïtto lon loMiccie. 8 Anaruk amma onïn akkongkenet non lon iloporot loIeccuo lꞌrek antoka manna uꞌrupa wothothïlettat woKapik wangkenet non alꞌrek prek na ilanïn thongkenet non tokït, kirrinni anïn attattako. 9 Mpappopakket lon tit itti amma opilin pappro ongkenenon lon iloporot lꞌrek nolon iloporot loIeccuo ilanon thoccokothe, akwattattako thupuththuput. 10 Mpaik pannenekke itti aul ongat lon lin, anaruk itti aKapik opira noka naun. Ana amma mpokat anennekke itti aul ongat lon lin, mpannokat pul iparekine oMiccie.
11 Pangkingon, mpongothe itti nthina itti lon iloporot loIeccuo ila mpongkenet non annoka pul iponyi akkokkothe. 12 Mpannocco nti ikkun wopul pꞌrek ana manna mpannongkenetta anaruk oIeccuo oMiccie akkokenerin. 13 Onon thoccïkothe lon lothikkoik thin lomaꞌrot akka mpokat ilon lothathuma tholon loul woIouth ana tat akka mpokkikkiethe ul ioccokothe lon loIeccuo thiak ella thiak nocïkït ana anenekke itti mpakïtto kin. 14 Mpokat pinangkat lon nti iul woIouth iarokat cat cin iommaththik lon ïnaththungon ana mpapponat thiak thothathuma thothiki thin cannan. 15 Anaruk akka Kapik kakkarrorin amparthuk manna okwonta nthoporot thung, itti anorekinok, 16 akwakenen lon lokkul wung anina akka anongkene ul iannoka woIouth lon lung mpannipittot puꞌrek aththik. 17 Mpannokuꞌrot manna nocoꞌrong coUruccelim itti anothipittot ul wothothïlettat woIeccuo iokat tokït naun anaruk mpoththet cik eo nocoꞌrong coMuththu manna antopakkot nokaꞌran koThimacakka. 18 Anakka mpikkot cik luput lꞌrapuruk (3) anokuꞌrat nokaꞌran koUruccelim anothoccïkot lon na oPoththuruc poul pothothïlettat poIeccuo ana inthikkatheik maꞌri attul ana ikken ukuluk (15). 19 Mpanniot ul wothothïlettat woIeccuo wꞌrek anaruk mpiothe oIakup opang poIli oIeccuo. 20 Mpiꞌret lon ïcat tokït koKapik ila mpaik piꞌret non lakannoka lokarra. 21 Ana mpoingkathe noththok poCuria ana poKilikkia. 22 Anaruk ul woIouthia iokat woccokothe lon loIeccuo wokat wanninan ngka kin. 23 Okin thokat akin occiccikot lon turuk itti, “Pul ipappokat apoccokiet ul thiat paik pangkene lon loIeccuo inenni ook ipappennekket itti kwakïtto.” 24 Ana okin thopirakathe noka noKapik nti ilon lin.