Atham woIpranin
Atham iaine ul woIpranin
Lon lonothon
Atham enni wapul ipangkene akkokurrot akwokurrine cungkut coul woIouth ioccokothe lon loMiccie ana cakuruk iammakot oIeccuo. Kwokurrot akwokwarikiet kin itti okin thaꞌrungkot ithoccokot lon nomïkït then nomaꞌri mothokkiettat thiak.
Atham enni wakene itti oIeccuo ukul woKapik okkwi ipakeneron anganna itti Kapik okkwen (Ipranin 1.1–3).
Kwonu puꞌran cannan nouꞌrupa wothothïlettat woKapik iaul woIouth woccokothe lon len nomïkït (Ipranin 1.4—2.18).
Ook akkoporot cannan noul wothernte lon loKapik womaꞌrot, ana ook akkoporot cannan naMucca ipethet ul woIouth lon lothonceꞌret lon cik loKapik (Ipranin 3.1—4.13).
Ook akkoporot cannan noul wonoppan toKapik woIouth, akka kwannokkot lon ilokithak aththik. Kwethet ka kung ammakka papu pothokiot ngüccük cik ipella lon lokithak ipokiakinthet lon cik ilokithak loul nomaꞌri appik (Ipranin 4.14—10.31).
Pul ipokurrot atham popiranet thiki thoul woIouth noka ikkot cik nthoccokot lon nomïkït. Kwokwarikiekathe ul ioccokothe lon loIeccuo itti okin cakuruk thonu itti okin thanekket cïkït noKapik ana okorronno ure nongre ana thongkene itha oIeccuo pongkenet aththik (Ipranin 11—13.25).
1
Ukul woKapik akkrïk nouꞌrupa wothothïlettat woKapik
1 Kapik kerntenet thiki thonnon maꞌrot maꞌri moppot nnul wothernte lon loKapik ana nathar kurekkurek, 2 anaruk nomaꞌri emmi imocothothe, kerenet ton nukul wung ia kwopakkethe naꞌrupu woththan appik ana ia kwokkothe capu ngngin. 3 Ukul wung wathoporot thothrïk thoKapik ana wungkworok llon appik. Ukul wangwot ana okkot lon appik mpuꞌran polon lung. Anakka kwonthukkiet kin, Kapik kikkiekathok cik iccik kung nthokkun wothothari woKapik ikaik tothiꞌrot. 4 Ittina kwothakkakathe prïk nouꞌrupa wothothïlettat woKapik ana kꞌran kung ika Kapik kethok krïk nouꞌrupa wothothïlettat.
5 Oththa nti iuꞌrupa wothothïlettat woKapik ia Kapik kiꞌrethe itti,
“Oung ukul win,
inenni mpothakkat oththe”? 1.5 Mocumur 2.7
Ana itti,
“Mpathakkanok oththan pung
ana ook othakkanin ukul win”? 1.5 2 Camuil 7.14
6 Ana attang amma Kapik ona ukul wung wonothon nocapu, kiꞌre itti,
“Auꞌrupa wothothïlettat woKapik appik aꞌranok ngaꞌrama.” 1.6 Thethinia 32.43
7 Ana Kapik kerekanthet uꞌrupa wung akiꞌrekat itti,
“Kathikkie uꞌrupa wothothïlettat woKapik kanang ana ul iarekinok luꞌre lolik.” 1.7 Mocumur 104.4
8 Anaruk kwerekathe Ukul akwiꞌrekat itti,
“Kapik, ngili ngang ngaꞌrungkot cik thupuththuput.
Ana thoporot thang tokït koKapik thaka cuꞌrang coili ngang thupuththuput.
9 Ngkwongothe lon ilocoꞌrotheik ana ꞌra lon ilokithak,
Ilen akka oun Kapik kang pothikkierung prïk nakarkangon
nthoꞌrokung ngaak ngothopira noka athakka ili.” 1.9 Mocumur 45.6
10 Ana kwiꞌrekathe cakuruk itti,
“Ili, nci nomun, ngkwokuꞌret capu ncik
ana tothiꞌrot tangkwokkothe nyaun nyang.
11 Capu ana tothiꞌrot thintat cik okin thukkwa ana okïttako ere eret ana okucittakoik ere eret anaruk ngkwaꞌrungkwot cik.
12 Ngkwaꞌremethet kin tit ere kret ikakatta ikukwit
ana oportto kin cik ere eret.
Anaruk ngkwaꞌrungkot cik ammakka ngkwaik,
ana luput lang lakorronno omattat.” 1.12 Mocumur 102.25–27
13 Uꞌrupa wothothïlettat woKapik wiatha ia Kapik kiꞌrethe itti,
“Ikkik iccik kin nthokkun wothothari win puccuk
anonekkekat thoꞌrak thang iracok tang acukkwarat kin cik”? 1.13 Mocumur 110.1
14 Uꞌrupa wothothïlettat woKapik appik wakanang ikareko, okin thothïlathe akin athorekine ul iaik wathopakkot nothoꞌrettat.