7
Pul ponoppan toKapik oMelkkiccathik
1 OMelkkiccathik empi pokat ili wonokaꞌran koCcalim ana pul ponoppan toKapik ikrïk. Kwokottot iAprein, Aprein pokat cik akwokkaprttako ntan nti ithoꞌrak akkwalkothe nili, aMelkkiccathik ethïekathok. 2 Aprein pillillathe iaꞌrupu ia kwonat nti ithoꞌrak attul attul ana kwekathe oMelkkiccathik pulupuluk nan. Cittokït kꞌran koMelkkiccathik konu itti, “ili iakkot lon iloporot,” ana cakuruk itti, “ili woCcalim” ilonu itti, “ili iakkot thomicco.” 3 Lon lella ilerethe lon loththan ana lonnan ana opikion ana kwellat luput cik ana thocothakot thothikkoik, kwammakka ukul woKapik ana kwaꞌrungkot pul ponoppan toKapik thupuththuput.
4 Antokatha tat akka opiki pokat prïk, Aprein manna ipokat oththan poul appik pethok aꞌrupu wululuk naꞌrupu ia kwillillot tit attul attul ia kwonat nti ithoꞌrak. 5 Lon lothonceꞌret lon cik loMucca lipittot thiki thoLaui ithothakkat ul wonoppan toKapik akin aꞌrntot aꞌrupu wululuk naꞌrupu woul ana napangon. Ul wen wokat thiki thAprein. 6 OMelikkicathik pokat pakannoka nothiki thoLaui anaruk kwoccot aꞌrupu wululuk naꞌrupu iAprein pokat ponat nti ithoꞌrak. Ana oMelikkicathik pethïekathe Aprein ipa Kapik konekkenthet lon cik. 7 Ana ammakka ul wina appik, ilaik itti pul iprïk akkethïe pul ipotte. 8 Ul wonoppan toKapik iaꞌrntothe aꞌrupu wululuk naꞌrupu woul, waul ionyi ana okin thille anaruk lon lella iliꞌret itti oMelkkiccathik pio ana ook akkoccot aꞌrupu wululuk naꞌrupu attul. 9 Ittina oron thiꞌre manna itti thiki thoLaui ithaik thaꞌrntot aꞌrupu, thethet oMelkkiccathik aꞌrupu cakuruk Aprein ngngin caꞌri ica kwethet oMelkkiccathik aꞌrupu, 10 akka oMelkkiccathik pokottot iAprein aLaui pokat parthuk okwonta nti ithiki itheot thAprein.
OIeccuo pammakka oMelkkiccathik
11 Amma ngre ngoul wonoppan toKapik woLaui iokuꞌrettat nolon lothonceꞌret lon cik ngokat ngokkothe lon kicce ia Kapik kongothe, ngintha akka pul ponoppan toKapik pꞌrek appaine pꞌrek ngkathar koMelikkiccathek okorronno oka ngkathar kArun appokaik? 12 Akka amma ul wonoppan toKapik woprttakot cik lon lothonceꞌret lon cik loul wonoppan toKapik laprttakoik cakuruk. 13 Okkwi ipa lon elli laik leret cene, ook ipaat nothiki thꞌrek ana pul pella nothiki then iporekot noruꞌrot tonoppan toKapik. 14 Akka linako nan itti ili oIeccuo wokwontat nothiki thoIoutha, ana thonceꞌret lon cik thoMucca thakanneret lon len akka therethe ul wonoppan toKapik. 15 Ana ilaron thiꞌret linako nan kicce amma pul pꞌrek ponoppan toKapik pummothe ncik pammakka oMelkkiccathik, 16 ook ipakonnothakka pul ponoppan toKapik llon lothonceꞌret lon cik loul ionyi anaruk mpuꞌran pothikkoik ithakannomattat thupuththuput. 17 Akka liꞌrettat itti,
“Oung pul ponoppan toKapik thupuththuput,
ammakka pul ponoppan toKapik oMelkkiccathik pokat.”7.17 Mocumur 110.4
18 Ittina lon lothonceꞌret lon cik ilipe lopaꞌrakinet cik akka lokat lakannoka lonthomat ana lellat ngre cik, 19 akka lon lothonceꞌret lon cik loMucca lokat lakannokkot ngre papennang. Ana inenni thoꞌrïkot cik ithoporot thei ithanekot ton iccik koKapik.
20 Akka pul ponoppan toKapik ponekkettatheik nthokwo mio. Anaruk aꞌrek wonekkettatheik okorronno oka nthokkwo mio. 21 Anaruk kwothakkat pul ponoppan toKapik nthokkwo mio akka Kapik kiꞌrethok itti,
“Ili wokkwot mio llon lonthomat ana wakorronno oprttoik,
‘Oung pul ponoppan toKapik thupuththuput.’ ”7.21 Mocumur 110.4
22 Ana nti ilon lothokkwo mio enthi, oIeccuo pothakkakathe pul ipangwot lon lothonekket lon cik iloporot.
23 Ul wonoppan toKapik wokat cik woppot anaruk thio makorronno okorronno akin oꞌrungkwot ire ngoul wonoppan toKapik. 24 Anaruk inakka oIeccuo pakinnio thupuththuput, kwaka pul ponoppan toKapik thupuththuput. 25 Ittina kwaꞌret ul kirrkkir iaine Kapik ngkꞌran kung akka kwakkoik othakka itti akwerene Kapik nti iakin.
26 Pul iprïk ponoppan toKapik ammakka empi kwathïnthet ton ilon appik, kupupure ana kwella thorukwettat cik ana kwoꞌrillir kwopettakot nti iul iakkot lon ilokithak ana kwonthuttathe ithiꞌrot. 27 Kwakannoka ammakka ul wꞌrek ittïttïk wonoppan toKapik, kwakannethet Kapik aꞌrupu wothokiot ngüccük cik appinappin, nti ilon lung ilokithak ana nti ilon loul ilokithak. Anaruk kwethet ka kung ere papu wothokiot ngüccük cik nti ilon loul, caꞌri culukku kirrkkir, nocaꞌri ica kwangkothe itti kwiot nothapak. 28 Akka lon lothonceꞌret lon cik loMucca lanekket ul ittïttïk wonoppan toKapik cik iakannoka wonthomat. Anaruk thokkwo mio thoKapik ithomakothe lon lothonceꞌret lon loMucca thonekkethe ukul cik iothikkiettat woporot kicce thupuththuput. Ukul akkaka pul ponoppan toKapik iprïk pothupuththuput.