Atham woIakup
Lon lonothon
OIakup pokat pul iprïk poul ioccokothe lon loIeccuo nokaꞌran koUruccelim. Kwothïnthet ul woIouth karamacak ioccokothe lon loKapik nomïkït iokat cik noththok poIccereil, anaruk wokat wopettakotheik iul iokat wakannoka woIouth.
Atham wonu thocimittaro tit thoppot thothikkoik thappinappin. OIakup piꞌre itti amma ngkwoccokothe lon loKapik nocïkït, ngkwonu itti ngkwakkot lon lꞌrek akene thoccokot lon loKapik nocïkït thang. Thocimittaro thung thokat thinakot nan kicce. Amma ngkwapiak pella aꞌrupu, kirrinni apo ka ntit. kirrnni angkot lon amma thoccokot lon nocïkït thang thaik thennekketta. kirrnni ua ka cokoccokot. Oꞌrumi nothuꞌre thang ana aꞌrupu ia ka kongothe. Amma ngkwapaꞌrthan, aittarot ul iella aꞌrupu nthaꞌrthan thang.
Lon ilaik iatham
1. Thomicco (1.1)
2. Thikkoik thothoccokot lon nocïkït ana thinaik nti ica (1.2–8)
3. Ul ia iak iella aꞌrupu cik ana ul ia aꞌrthan (1.9–11)
4. Thoccokot cïkït ilon ana thennekketta (1.12–18)
5. Thoccïkot lon loKapik ana oreko ngngin (1.19–27)
6. Thaꞌretto nothongat ul wꞌrek (2.1–13)
7. Thoccokot lon nocïkït ana ngre ioporot (2.14–26)
8. Thoꞌrumo nolon ilaron ere (3.1–12)
9. Thinaik nti ica ïcat (3.13–18)
10. Nokorronno okkot thuroko llon lonocapu (4.1—5.6)
11. Thoccokot cïkït ilon ana thaꞌra ngaꞌrama
1
Thomicco thoIakup
1 Naun oun oIakup pul iparekine Kapik ana Ili oIeccuo oMiccie. Lon elli laine ul ioccokothe lon loKapik nomïkït wokuꞌri koIccereil ikattul ana ikken keꞌra (12) ikopettakotheik nocapu ncik appik, mpaik mpamicco non.
Thoccokot lon nomïkït ana thinaik nti ica
2 Pangkingon, nopira noka cannan amma onon akkapothe ilon lothoccokiettat thiak lꞌrek ammakka laik ncik appik, 3 akka onon thina itti thennekke thoccokot lon loKapik thon thakorronno amïkït mon opoꞌrathan. 4 Nina nan itti onon thonu itti nthaꞌrungkot nothoccokot mïkït ilon puccuk annothakkakat thupupure annokorronno ipittat lon loꞌrek. 5 Ana amma opilin nti ianon pella thinaik nti ica, akwipittot Kapik ana kwacco akka Kapik kikket ul lon ncik appik loppot okorronno aꞌretto. 6 Anaruk amma akwipitto nci nocïkït ella lon tit leꞌra akka okkwi iponu lon tit leꞌra, kwikkoik ere thopangka thoiꞌre ngorok amma kanang okkurarot akaukkukkwot. 7 Apul ipena okorronno ome itti kwacco alpꞌrek noIli ia akwipitto, 8 akka pul iponu lon tit leꞌra pakannoccokot lon lulukku.
Thella aꞌrupu cik ana thaꞌrthan
9 Okkwion ithoccokothe lon loKapik ithella aꞌrupu cik thonu itti okin thapira noka akka Kapik kaik kakwarttikot kin cannan. 10 Ana okkwi ipapaꞌrthan ponu itti kwapira noka amma Kapik konekothok thaꞌrthan akka thaꞌrthan thintat cik ere poꞌren popira amma papot. 11 Akka amma cïngkï coppot llü lung ana lakꞌre poꞌren ana papukko cik ana panthoma ana thire thopoꞌren pen thellaik, laka nopul ipapaꞌrthan ittina amma apoccot kït nothaꞌrthan thung.
Kapik kakannenekke ul
12 Okkwi ipoccokothe lon nocïkït, kwethïetta akka amma kwennekkettat kwacco lon lothikkoik thupuththuput ila Kapik konekkenthet ul cik iongothok.
13 Ana amma opilin papothe ilon ilokithak akwokorronno iꞌre itti, “Lon elli laat noKapik.” Akka Kapik kakannennekke ul llon ilokithak ana kakannennekketta. 14 Anaruk pul iponyi pennekketta amma lon ila ka kongothe lalkothok ana erekethok itti kwakkot lon ilokithak. 15 Ana amma lon ila ka kongothe lothakkat loppot, lakorronno ka akokkot lon ilokithak ana amma lon ilokithak lothakkat loppot lana thio.
16 Pangkingon, noꞌrumoik akka annammikkakot. 17 Aꞌrupu ioporot ana aꞌrupu iaron thoccot nuthuk wanthan ntothiꞌrot ana wanthan naNgappa ipokkothe aꞌrupu ngkꞌran ikacco tothiꞌrot, aꞌrupu enni waprttakoik anaruk Kapik kakorronno oprttakoik. 18 Kwongkothe itti oron thakwonta thie llon ilaik ïcat, othakka itti aron oka thonothon naꞌrupu appik ia kwokkothe.
Occïkot lon ana okkot
19 Pangkingon, nantoccïkot lon elli, noccïkot lon papennang ana okorronno attakine lon cik nthere ana okorronno ua ka cokoccokot, 20 akka thua ka thopul iponyi thakannona kathar kothikkoik ika Kapik kongothe. 21 Ittina nopaꞌrine lon ilokithak cik ana lon ilokithak iloppathe cik. Noccïkot lon mmïkït moporot ila Kapik konekkenthet non nomïkït ilaꞌret non.
22 Anaruk nokorronno oꞌrungkwot occïkot lon loKapik tulluk alella ngre ngen cik, akka ittina onon thaik thammikkot ka kon. 23 Akka okkwi ipaccïkot lon loKapik ana akwokorronno okkot ngre inga alon iꞌre itti ngakkattat, kwaka ere pul ipaik pakathaccet toca tung imanthara 24 akka kwakatha ka kung akwoingkat akurekat nan accokkot itti kwokat tat. 25 Anaruk okkwi ipaccot kït nolon lothonceꞌret lon cik ilaik papenang ilakorronno pul apoka pella lon lꞌrek ammakka Kapik kongothe, pakannoka pul ipaccïkot lon ana urenan. Anaruk amma kwareko ngngin, kwethïetta ire inga kwokkot.
26 Ana okkwi ipame itti kwoꞌrumot nolon loKapik akwokorronno oꞌrumo nothuꞌre thung, kwammikkothe ka kung ana ittina thoccokot lon loKapik nocïkït thung thaka karra nuthuk. 27 Thoccokot lon loKapik nomïkït ila Kapik oNgappa ponnon okatha itti thoporot ana thupupure tokït kung, itti pul pakatha lon lonyukul inya aththangon thillet nan ana muruma imari imaik nothiak ana akwoꞌrumo noka kung nolon ilokithak lonocapu ncik appik.