10
OIeccuo pathïot ul arrial wꞌrapuruk ana alkaire ana ikken keꞌra
1 Anakka lon elli locothakothe, aIli oIeccuo ocumat ul arrial wꞌrapuruk ana alkaire ana ikken keꞌra (72) ana kwothïlekathekin tokït kung theꞌra theꞌra ana naꞌran appik ia kwokat cik akweo nan. 2 Akwiꞌrekat kin itti, “Kopon kokwonot mïl moppot anaruk ul iakio wotte. Nipittot pul pokkwon apothïot ul iakio ikkwon kung. 3 Ngkonon, mpaik pathïot non ere lungkat laik ithoꞌrkït thomipa. 4 Nokorronno oneko kaꞌruk kakucci ana kaꞌruk konokurtti ana wok ana okorronno omicco pul pꞌrek nokathar.
5 Amma anniꞌriko noppan topul pꞌrek, niꞌret ul wonoppan ten cittokït itti, ‘AKapik ethïet kaman engki cik.’ 6 Amma pul pothomicco paik iul wonoppan ten, thomicco thon thaꞌro naak, ana amma pul pothomicco pella, thomicco thon thapakkinthet non. 7 Nikkoik iman men, annoꞌrko thuꞌrit ithakin ethet non akka pul ipareko ponu itti pacco aꞌrupu nti ire ngung. Nokorronno urttuko nti ikaman annoince iakꞌrek.
8 Amma onon akkiꞌrikot noththok pꞌrek mono akin ikkienon cik, noꞌrko thuꞌrit ithakin thonekkethe tokït kon itti onon thaꞌrko. 9 Nittiet ul iongo iaik cïnang, niꞌret kin itti, ‘Ngili ngoKapik ngakko napuththut iccik kon.’ 10 Anaruk amma onon thiꞌrikot nokaꞌran kꞌrek mono akin okorronno ikkienon cik, ngkonon ikathar konokaꞌran ken anniꞌre itti, 11 ‘Manna tuꞌrupang tonoththok pon irocciccokothe nïn, onïn thakkwenthet non cik nnoracok tïn. Anaruk nina nan itti ngili ngoKapik ngaik napuththut.’ 12 Anaruk mpiꞌret non itti thakkmako thokaꞌran koCothum thaka thopappat nothonceꞌret lon cik ithaka nokaꞌran ikꞌrat ikkienon cik.”
Aꞌran iannoccokot lon loKapik nomïkït
(Maththa 11.20–24)
13 “Angkre, ul woKuruccin, angkre, ul woPeththecceitha, akka amma lon ilommaththik ilokat lokkattathe ianon lokat lokkattathe nokaꞌran koCcur ana koCcithon, ul wonaꞌran wen waapaꞌrinet lon cik ilokithak akkomaꞌrot ana waakenet nthako eret iillillakot ana ipot mucuk ima. 14 Kapik kathipo thiak thoul wonokaꞌran koCcur ana koCcithon nocaꞌri cothakkmako nanon. 15 Onon enthrïk thonokaꞌran koKapprnaum onon thame itti onon thanekittat tothiꞌrori? Aa, onon thaarrettat thothïrïn.”
16 Kwappiꞌrekat ul immakothok itti, “Okkwi ipoccïkothe lon lon kwoccïkothe lon lin ana okkwi ipꞌrat lon lon kwꞌrat lon lin ana okkwi ipꞌrarin kwꞌrat okkwi ipothïothin.”
Thokkaprttako thoul arrial wꞌrapuruk ana alkaire ana ikken keꞌra
17 Anaruk akka ul wung iammakothok iarrial wꞌrapuruk ana alkaire ana ikken keꞌra wokkaprttakot awopirakat noka wiꞌrekathok itti, “Ili, uꞌrupa iokithak wokat cik manna accïkot lon lïn amma ïnere ngkꞌran kang.”
18 AIeccuo iꞌrekat kin itti, “Mpimmat pul pothopulut apapo ntothiꞌrot ere thuleꞌrak ithallio. 19 Ana mpethet non puꞌran annokakꞌrot inyil cik ana ünü ana alkot puꞌran popul pothopulut. 20 Anaruk nokorronno opira noka itti uꞌrupa iokithak waccïkot lon lon anaruk nopira noka itti ꞌran won wokurrakot tothiꞌrot.”
OIeccuo popirat noka
(Maththa 11.25–27; 13.16–17)
21 Caꞌri cen aIeccuo opirakat noka noKanang ikupupure, akwiꞌrekat itti, “Mpopiranung noka, ngappa pin, Ili worothiꞌrot ana wonocapu, akka ngkwamuꞌruttothe ul lon elli inaik nti ima ila mpiꞌrethe ul win iammakothin, akene ul iammakka nyukul inyarran. Ïcat ngappa, elli akka ngkwongothe itti laka. 22 Ongappa pethin aꞌrupu appik. Pul pella pina ukul, oththan pokkul pulluk akkinak. Ana pul pella pina oththan, ukul wulluk akkinak ana okkwion itha ukul wongothe itti wakenekin oththan.”
23 Ittina akwolliakat ul iammakothok akwiꞌrekat kin akka okin thokat thellek itti, “Kït kethïettat ikaik kakathacce lon ilanon thaik thakathacce. 24 Nantoccïkot aniꞌret non, ul woppot wothernte lon loKapik ana nili nokat nongothe itti nimma lon ilonon thaik thakathacce ana nakinnimma ana occïkot lon ilanon thaik thaccïkot ana nthakorronno occïkot.”
Lon iloporot lothokkwie lon kuru ncik lopul poCamirin
25 Apul pꞌrek ipangkene lon lothonceꞌret lon cik, urokat kapik akwipittat oIeccuo lon ngeꞌri itti akwiꞌriththak ngngin akwiꞌrekat itti, “Pul ipangkene, ngintha akka anokkot aniot thikkoik thothupuththuput?”
26 AIeccuo iꞌrekathok itti, “Liatha akkokurrakot iatham wolon lothonceꞌret lon cik? Ana lon len lonu ittirat?”
27 Apul iꞌrekat itti, “Liꞌrettat itti, ‘Ongathe Ili Kapik kang ncïkït cang appik ana ngka kang appik ana ngatheꞌre ngang appik ana mpuꞌran pang appik’10.27 Thethinia 6.5 ana ‘Ongathe ul wꞌrek ammakka ngkwongothe ka kang.’10.27 Lauin 19.18”
28 AIeccuo iꞌrekathok itti, “Ngkwothïotherit papenang. Okkothe elli ana ngkwikkoik thupuththuput.”
29 Anaruk pul pappongothe itti prrot noka kung akwiꞌrekat oIeccuo itti, “Ana okkwen akkapul ponocuruk cin?”
30 AIeccuo othïat tit nthokkwie lon kuru ncik itti, “Puꞌrek pokat cik apao nnokaꞌran koUruccelim apeo nokaꞌran kAria ana pocurakathe iul wothuꞌran. Ul wothuꞌran wuekathok eret ana okkwekok akin oththekat naak akwomma ngka ere kwio. 31 Apul ponoppan toKapik akkakat apokkat ikathar ken, manakka pimmat pul emprïk apokkat ciththan apoingkat. 32 Apul pꞌrek akkakat cakuruk ponoul woLaui iareko noppan toKapik manakka paat nokaꞌran kopul pen, apokkat ciththan akwoingkat. 33 Anaruk apul poul woCamirin pokat cik apeo nokurtti, apakkakat na pul pokat cik anakka pimmarok apipat thaik thung. 34 Akwoingkat akwocukkwat cik iccik kung akunat ngapak ïnyï ana ngaak akwïꞌrïkïkkanthok ïnyï kicce akwarriekathok teꞌringka akwoingkathok ngngin akwothonekkekathok ikaman ika ul aallerit nakucci akwokathakat lon lung. 35 Ana ngorrot ngen akummat akucci weꞌra akwekat pul pokaman akwiꞌrekathok itti, ‘Okatha lon lopul empi akka mpaik paeo ana amma mpokkaprttakot mpathokkenung akucci ia ngkwokïttothe naak.’ ”
36 AIeccuo ipittat pul ipangkene lon lothonceꞌret lon cik itti, “Pul piatha nti iul iꞌrapuruk ponocuruk copul ipapothe inyaun nyoul wothuꞌran apopokat?”
37 Apul ipangkene lon lothonceꞌret lon cik othïat tit itti, “Pul ipipot thiak thung.”
AIeccuo iꞌrekathok itti, “Ngko athokkot ammakka pul pen.”
OIeccuo paththokatha naMarththa ana oMeriom
38 Anakka oIeccuo pokat cik ikathar akin oul iammakothok okin thakkakathe nokaꞌran na pul ipopari pokat ipoccot kꞌran itti oMarththa apikkiekat kin cik tuan. 39 Ponat opang pꞌrek ipopari poccot kꞌran itti oMeriom ipikkot cik iccik koIeccuo akwoccïkot lon lung. 40 Anaruk oMarththa pokat piꞌrikothe akwokkot thuꞌrit ithokat thonu itti thakkattat. Kwakkakanthet oIeccuo akwiꞌrekathok itti, “Ili, ngkwannimma akka opangkin poththet naun pellek anokkot ngrei, lon len lannoka ere kwokwïethini? Iꞌrethok akwathittarothin.”
41 AIeccuo othïanthok tit itti, “Marththa, Marththa, ngkwiꞌrikothe llon loppot ana ngkwonu kït nolon loppot. 42 Anaruk lon lulukku ilonu itti laccakot kït nan ana opangkang oMeriom poccokothe iloporot ntit, ana lakorronno onekittathok.”