1 OIeccuo poꞌrungkathe nolon akwere akwiꞌre itti, “Ana nocaꞌri cen ngili ngorothiꞌrot ngaka ere nyukul inyoire inyattul, nyonekot muꞌru imonu ngaak iacco anyoingkat thapat anyothocurot ipul ipipo. 2 Ana nyukul ukuluk ntiakin nyokat nyommat cik nti ima ana ukuluk ntiakin nyokat nyinaik nti ima. 3 Okin ithommaik thonekathe muꞌru maak iacco tulluk akin okorronno oneko ngaak ngꞌrek arttot nan mmuꞌru mꞌrek. 4 Ana okin ithinaik thonekathe ngaak iacco prek mmuꞌru mꞌrek. 5 Ana pul ipipo poccatheik cannan ana okin appik thokinyakathe mono oingkat inthe.

6 Ana thampang thongkꞌra, apul pꞌrek iꞌrekat mpoꞌre cittan itti, ‘Pul ipipo pei paat nothocurot iaak.’

7 Ana nyukul inyari nyurokathe appik ana nyokuccekathe muꞌru imonu ngaak iaccorit othakka itti amocco preththere. 8 Ana okin ithommaik thiꞌrekathe okkwion ithinaik itti, ‘Nethet nïn ngaak iacco ngotte akka muꞌru imonu ngaak iacco maik mille lik nan.’

9 Akin othïanthet kin tit itti, ‘Aa, ngaak ianïn thonu ngannekko nanïn ana onon thaeo noul iakette ngaak annothokerine ka kon.’

10 Anaruk akka okin thokat cik ikathar akin othokero ngaak, apul ipipo akkakat. Anyukul ukuluk inyoire inyokat nyokuccekotheik iꞌrikat akin aththut ikamuthe kothïpa. Ana kathat kulukkwathe.

11 Ittina papotteik anyukul inyommaik akkakat cakuruk anyakkarat itti, ‘Pït pïn, pït pïn, anyinet nïn kathat.’

12 Anaruk pul ipipo piꞌrekathekin itti, ‘Mpiꞌret non ilaik ïcat, mpomma non.’ ”

13 Menik aIeccuo iꞌrekat itti, “Noꞌrumoik akka onon thomma caꞌri ana manna cïngkï ica anao nan.”

14 “Ana attang ngili ngorothiꞌrot ngungkwot ere pul ipaik paeo imakkren ciththan, apakkarat ul wung iarekinok akwikkekat kin aꞌrupu wung akin angwot akkwella. 15 Ana kwekathe okkulukku akucci naꞌruk ukuluk*25.15 Kaꞌruk kulukku kaneko akucci warekako ngngin luput attul ana ikken ukuluk (15). ana opilin akucci naꞌruk weꞌra ana opilin akucci ngkaꞌruk kulukku Kwikkethekin aꞌruk kurekkurek iakin thekkot nan itti okin thangwot akka kwinat kin papenang, akwoingkat nokurtti kung. 16 Ana pul ipoccot akucci naꞌruk ukuluk poingkathe cokoccokot ana kworekiekathe akucci wung ana kwiathe akucci arttot nan aꞌruk ukuluk. 17 Ittina cakuruk okkwi ipoccot akucci aꞌruk weꞌra poingkathe ana kworekiekathe ana kwiathe aꞌruk weꞌra arttot nan. 18 Anaruk okkwi ipoccot kaꞌruk kulukku poingkathe ana kwaththipat tupu ana kwocïkkathe akucci wopït pung tit akwangwot.

19 Anakka opït pen pikkot cik than puccuk, kwokkaprttakathe ntan akwipittat kin itti okin thakenek itti okin thokkothe ngimpen nakucci wung. 20 Pul ipappoccot akucci naꞌruk ukuluk ponakathe akucci naꞌruk ukuluk arttot nan. Ana kwiꞌrekathe opït itti, ‘Pït pin, ngkwethin akucci naꞌruk ukuluk, ana mporekiet ana mpiothe aꞌruk ukuluk arttot nan.’

21 Ana opït pothïanthok tit itti, ‘Ngkwokkothe lon loporot, oung pul ipareko ipoporot ana ipaꞌrumo nolon. Ngkwoꞌrumot nolon laꞌrupu wotteik, mpethung lon laꞌrupu woppot ikkun. Aꞌrik athopira noka nopït pang.’

22 Apul ipoccot akucci aꞌruk weꞌra akkakat cakuruk ana kwiꞌrekathe opït itti, ‘Pït pin, ngkwethin akucci aꞌruk weꞌra ana mporekiet ana mpiothe aꞌruk weꞌra arttot nan.’

23 Apït othïanthok tit itti, ‘Ngkwokkothe lon loporot, oung pul ipareko ipoporot ana ipaꞌrumo nolon. Ngkwoꞌrumot nolon laꞌrupu wotteik, mpethung lon laꞌrupu ikkun woppot. Aꞌrik athopira noka nopït pang.’

24 Menik apul ipoccot akucci kaꞌruk kulukku akkakat akwiꞌrekat itti, ‘Pït pin, mpina kicce itti ngkwommaꞌron, ngkwakio kopon ika ngkwakannee ana ngkwakkuttot mïl ima ngkwakannora. 25 Ittina mpokat ponat nꞌre ana mpamuꞌruttathe kaꞌruk kakucci ika ngkwethin ippu. Katha, kaꞌruk kang kei.’

26 Apït othïat tit itti, ‘Oung pul ipareko ipommangka ana iponu ngore, ngkwina itti mpakio kopon ika mpakannee ana mpakkuttot mïl ima mpakannora. 27 Ngkwira pethet opilingon akucci akin orekie othakka itti amma mpokkaprttakot ntan anathocco akucci awarttakothe nan.’

28 Akwiꞌrekat pul iparekinok pꞌrek poka itti, ‘Onekothok kaꞌruk kakucci, ethet okkwi iponu akucci aꞌruk attul. 29 Akka okkwi iponu papꞌrek kwarttakinthet nan ana okkwi iponu aꞌrupu wotteik, kwanekittat manna ia kwonat wotte. 30 Norret pul ipareko empi thapat iꞌrïmak ipella lon cik na akwoot ana okꞌrellot kïnyït thocipit.’ ”

31 “Amma ukul wopul iponyi anthan nthrïk thung ana nuꞌrupa wothothïlettat woKapik appik, ana kwikkoik noprrok pothrïk thung pothakkma.25.31 Maththa 16.27; 19.28 32 Ana ul wonocapu appik waꞌrntakot tokït kung ana kwapetto iul karkko pul ipuꞌre opetto lungkat nti ilicok. 33 Kwipot lungkat thokkun wothothari ana licok thokkun wothokure.

34 Menik Ili wiꞌret okkwion ithaik thokkun wothothari itti, ‘Nanthan, onon itha angappa pin pethïet, nathopakkot nongili ionekkettanthet non cik nci maꞌrot akka capu cokuꞌrettat ncik appik. 35 Akka mpokat piamat ana onon thethin aꞌrupu wꞌrek ampoꞌrkot, ana pica pappokkwothin ana onon thethin ngꞌri ampïkkot, ana mpokat pakwat ana onon thikkierin cik. 36 Mpokat cunthut ana onon thakierin eret, ana mpokat pongo ana onon thokathat lon lin, ana mpokat ikorrkkor ana onon thaththokatha naun.’

37 Ana ul ioporot tokït koKapik wathïnthok tit itti, ‘Ili, ïnthiothung kartha angkwiamat anïn ekathung thuꞌrit, ana manna onïn thiothung kartha apica pokkwothung ïnekathung ngꞌri aïkkat? 38 Ana onïn thiothung kartha angkwakwat ïnikkiekathung cik ana manna angkwacunthut ïnakiekathung eret? 39 Ana onïn thiothung acintha angkwongo ana manna angkwaik ikorrkkor anïn athokathakat naung?’

40 Ili wathïnthet kin tit itti, ‘Mpiꞌret non ilaik ïcat itti, ilanon thokkinthet opilin pꞌrek ipotte ipammakothin, onon thokkinthin.’

41 Ittina kwiꞌret okkwion ithaik thokkun wothokure itti, ‘Nopaꞌroik nti iccik kin ngonon ithik thothupuththuput, onon ithattattakot nthokꞌro nthik thothupuththuput ithonekkettanthet pul pothopulut cik ana uꞌrupa wothothïlettat wung. 42 Akka mpokat piamat ana onon thakannethin papꞌrek anoꞌrko, ana mpokat papica pokkwothe ana onon thakannethin ngꞌri anïkko, 43 mpokat pakwat ana onon thakannikkien cik, mpokat cunthut ana onon thakannakien eret, ana mpokat pongo ana onon thakannokatha naun, ana mpokat ikorrkkor ana onon thakannokatha lon lin.’

44 Okin then thathïot tit itti, ‘Ili, onïn thiothung kartha angkwiamat ana manna apica pokkwothung ana manna angkwakwat ana manna angkwacunthut ana manna angkwongo ana manna angkwaik ikorrkkor ana onïn thakannittarothung?’

45 Ana Ili wathïot tit itti, ‘Mpiꞌret non ilaik ïcat itti ilanon thakannokkinthet okkwi ipotte nti iapangkingon enthi, onon thakannokkinthin.’

46 Ittina okin thaine thakkmako thothupuththuput anaruk okkwion ithoporot tokït koKapik thaeo ithikkoik thothupuththuput.”