9
Kapik ana ul ia kwakkarot
Mpaik pere lon ilaik ïcat tokït koMiccie ana mpaik pakannammikkot ana cïkït cin cakene itti lon len laik ïcat ngKanang ikupupure. Mponu thiak nocïkït thoul win cannan ana thiak then thomma ocoꞌro nocïkït. Akka oun ngka kin mpappongothe itti mpattattako ana opaꞌrettaik nti ilon loMiccie, nti ilon lopangkingon ithanïn thaul woIouth. Okin thaul woIccereil ia Kapik kakkarot itti waka nyukul nyung inya kwokenet thrïk thung ana thonekket lon cik ana ethet kin tupan toKapik ana ethet kin lon lothonceꞌret lon cik. Ul ittïttïk wathiki then ana oMiccie ngka kopul iponyi ana Kapik koul appik pokwontat nti iul wen, aKapik ethïethok cik thupuththuput. Amin.
Lakannoka itti Kapik kakorronno occot kït nolon ila konekketheik. Akka thiki thoIccereil appik thakannoka ul woIccereil appik. Ana okorronno oka itti akka okin thathiki thAprein, okin appik thanyukul nyAprein. Anaruk “Thiki thang thaka thoppot ngkꞌran koIccaak.” 9.7 Thokuꞌre ncik 21.12 Elli lonu itti nyukul inyokwontat ngkathar koul ionyi akkakannoka thiki thoKapik anaruk nyukul inyonekkettanthet lon cik akkathiki thAprein. Akka lon ilonekkettatheik lokat liꞌrettat ittina, “Mpakkaprttako ntan thuput thꞌrek nocaꞌri enci ana mpathiot oCcara akkwonu ukul.” 9.9 Thokuꞌre ncik 18.10, 14 10 Okorronno oka menik tulluk anaruk oRepekka cakuruk pokwonot nyukul inyonat oththan pulukku ana ook pen ongappa ponnon oIccaak.
11 Anaruk akka laro larthuk okwonta ana manna okkot lon lokithak ana manna iloporot othakka itti alon loKapik oꞌrungkwot cik 12 okorronno oka ngngre ngꞌrek iokkattathe ioporot anaruk nti ilon iliꞌrettathe oRepekka itti, “Ukul irïk akkarekine opang ipotte.” 9.12 Thokuꞌre ncik 25.23
13 Ammakka lokurrakot iatham itti, “Mpongothe oIakup anaruk mpꞌrat oIcco.” 9.13 Malakki 1.2–3 14 Oron thiꞌre kaththa? Kapik komma onceꞌret lon ciki? Okorronno oka menik kirrkkir. 15 Akka Kapik kiꞌrethe oMucca itti,
“Mpipo thiak thokkwi ipa mpongothe itti mpipo thiak then,
ana mpangat okkwi ipa mpongothe itti mpangat.” 9.15 Thoppot thapat 33.19
16 Ittina lakannoka itti laka ammakka pul iponyi pongothe ana manna ila akwokwantot anaruk ammakka thiak thoKapik. 17 Akka atham woKapik wiꞌrethe oPoroun itti, “Mpothikkierung ili othakka itti anokene puꞌran pin iaung ana othakka itti akꞌran kin inako nocapu.” 9.17 Thoppot thapat 9.16 18 Ittina Kapik kipo thiak thokkwi ipa kongothe itti kipo thiak then ana kwanthomie opilingon ma itha kwongothe itti kwanthomie ma.
19 Opilin nti ianon pamethin itti, “Ittina ngintha akka Kapik orukwenthet ton? Oththa akkaceꞌre lon ila Kapik kongothe itti kakkot?” 20 Anaruk onon oththan akka annipittot Kapik lon ila kongothe itti kakkot? “Papu ipa opït pokkothe pipittot opït itti ngkwokkothin ittina akainthai?” 9.20 Iccaia 29.20; Iccaia 45.9 21 Pul ipakkot api pakannoka ponu lon ikkun itti pakkot api ammakka kwongothe itti kwakkori? Ikaine nili akwokkot koporot ana ikaine ul nuthuk akwokkot kennangi?
22 Laka taththa amma Kapik kongothe itti kakene ul thua ka thung ana okene puꞌran pung, kaccokot cïkït kiththik noul ia kuat ka ken ana nothokïttoik itha kokat konu itti kakïttoik, 23 Kwokkothe elli akwothikkie thaꞌrthan thothrïk thung inako nan cannan noul iakwokene thiak thung okin ithokuccekittanthe thrïk thung cik nci maꞌrot.
24 Ana manna oron itha kwakkarot, okorronno oka ul wulluk woIouth anaruk ul iakannoka woIouth. 25 Ana ammakka kwokurrot iatham wopul iperntet lon loKapik oUcca itti,
“Mpakkaro kin itti ‘Ul win’ okin ithakannoka ul win,
ana mpakkaro kin itti, ‘Ul ia mpongothe’ okin itha mpakannoka pongothe,” 9.25 Ucca 2.23
26 ana,
“Elli lakaik nokaꞌran na lokat liꞌrettathekin itti,
‘Onon thakannoka ul win,’
anaruk itti okin thakkaroko itti, ‘nyukul nyoKapik kothikkoik.’ ” 9.26 Ucca 1.10
27 OIccaia pul ipernte lon loKapik perethe ul woIccereil itti,
“Amma maun moul woIccereil mantoka moppot ere thamur thorirok irapangka
okin ithokwentakot thotteik akkaꞌrettat.
28 Akka Kapik kakkot lon lung nocapu accokkot ana papenang.” 9.28 Iccaia 10.22–23
29 Ilen elli ammakka pul ipernte lon loKapik oIccaia pappiꞌret maꞌrot itti,
“Amma Kapik kokat kakorronno okwentineron thiki,
oron thakat ere ul wonokaꞌran koCcothum ana koKamura.” 9.29 Iccaia 1.9
Ul woIccereil ana oMiccie
30 Ittina oron thiꞌre taththa? Akka ul iakannoka woIouth iakannoka woporot tokït koKapik wiothe thoporot tokït koKapik. Okin thiothe thoporot tokït koKapik nthoccokot lon nomïkït. 31 Anaruk ul woIccereil iokat cik ammakot lon lothonceꞌret lon cik loMucca itti alothikkiekin thoporot tokït koKapik wakinniot thoporot then tokït koKapik.
32 Nthina itti akainthai? Laik menik akka wellat thoccokot lon loKapik nomïkït men anaruk okin thokat akin ome itti okin thathakka thoporot tokït koKapik nthokkot ngre. Ittina okin thomukkwathe “Noththok ipamukkietto.” 33 Ammakka lokurrakot itti,
“Katha mpanekket pothok nokaꞌran koCiun ipamukkwie ul
ana kancang ikallekkie ul.
Ana okkwi iponekkethe cïkït nolon lung ana kwakannothiettaik kirrkkir.” 9.33 Iccaia 8.14; Iccaia 28.16

9:7 9.7 Thokuꞌre ncik 21.12

9:9 9.9 Thokuꞌre ncik 18.10, 14

9:12 9.12 Thokuꞌre ncik 25.23

9:13 9.13 Malakki 1.2–3

9:15 9.15 Thoppot thapat 33.19

9:17 9.17 Thoppot thapat 9.16

9:20 9.20 Iccaia 29.20; Iccaia 45.9

9:25 9.25 Ucca 2.23

9:26 9.26 Ucca 1.10

9:28 9.28 Iccaia 10.22–23

9:29 9.29 Iccaia 1.9

9:33 9.33 Iccaia 8.14; Iccaia 28.16