Wárágà Yòwánɨ̀ dré tɨsɨ̀le dhɨ nɨ àlo
Wárágà kònɨ̀dhɨ nɨ tà àndu ngɨ̀le drìdrì dhɨ
À adré kisùá dhɨ, dhya wárágà kònɨ̀dhɨ nɨ tɨsɨ̀lepi dhɨ tá Yòwánɨ̀, àpóstolò kɨ àlo ꞌɨ, ɨ̀ndɨ̀ Èkèlézyà nɨ drì kobhá kàdrɨ̀ dhɨ kɨ àlo ꞌɨ. Tágba à dré adrézó Yòwánɨ̀ nda nɨ rú kisú wárágà kònɨ̀dhɨ léna ko dhɨ, à nɨ kɨtswá nòá ngádra ꞌá dhɨ, dhya wárágà kònɨ̀dhɨ nɨ tɨsɨ̀lepi dhɨ tá dhya Yésu nɨ tà nobhá mì sè dhɨ kɨ àlo ꞌɨ (1:1-4).
Yòwánɨ̀ adré wárágà kònɨ̀dhɨ nɨ tɨsɨ̀ tà kàdrɨ̀kàdrɨ̀ rì dhɨ ɨ sè. Àlo nɨ, adré móndyá kaꞌìbhá dhɨ kɨ kodzó tàzoá dhɨ, ngóró ɨ̀ dré ru amúlé Gìká Atá be, ɨ̀ndɨ̀ akódhɨ nɨ Mvá, Yésu Krísto be dre dhɨ tɨ́nɨ dhɨ, lè ɨ̀ kàdré adrélé àyɨ léna. Ɨ̀ kàdré kpà tròle tà ɨ̀ dré yìle àpóstolò ɨ tí dhɨ ɨ rú. Adré kpà tàá dhɨ, dhya ángùdhi Gìká nɨ nìlepi bàti dhɨ nɨ kpà akódhɨ nɨ tòlɨ́ kɨ kaꞌì ꞌòle. Kòdhɨ adré tàá dhɨ, ɨ̀ nɨ Gìká nɨ Mváagó, Yésu Krísto nɨ kaꞌì, adrézó kpà ru le àyɨ kòfalésè. Tàko ko, Gìká nɨ tàndɨ lèle ꞌɨ (3:11-24; 4:7-21).
Rì nɨ, Yòwánɨ̀ adré àyɨ kɨ kodzó, ɨ̀ kàdréró àyɨ kɨ lɨkɨ́ tà pròfétà kɨnzò ro dhɨ ɨ̀ dré adrélé tadhálé dhɨ kɨ tà sè. Adré tàá dhɨ, ɨ̀ kàdré móndyá títí dhɨ kɨ tabhì, nìzoá ngalè tɨrɨ́ àyɨ léna dhɨ ɨ Tɨrɨ́ Gìká àdhya ꞌɨ bàti yà dhɨ (4:1-6). Adré kpà àyɨ kɨ kodzó tàzoá dhɨ, ɨ̀ lavú bvò kònɨ̀dhɨ dre, ɨ̀ndɨ̀ Tɨrɨ́ adrélépi àyɨ lé dhɨ kàdrɨ̀, tɨrɨ́ adrélépi bvò kònɨ̀dhɨ lé dhɨ nɨ lavú (4:4).
Tà kàdrɨ̀kàdrɨ̀ wárágà kònɨ̀dhɨ léna dhɨ kɨ atìma
1) Kúlí adrélépi lɨ́drɨ̀ fe dhɨ (1:1-4)
2) Ngádra ɨ tínímvá be dhɨ (1:5–2:29)
3) Gìká nɨ ànzɨ ɨ Dzáborò kya ɨ́be dhɨ ɨ (3:1-24)
4) Tà bàti ɨ kɨnzò be dhɨ (4:1-6)
5) Gìká nɨ lèle, ɨ̀ndɨ̀ ru lèma àma kòfalésè dhɨ (4:7-21)
6) Gìká nɨ Mváagó nɨ kaꞌìma (5:1-21)
1
Kúlí adrélépi lɨ́drɨ̀ fe dhɨ
Mà adré dhya adrélépi tá be kɨ́nó tà títí dhɨ kɨ kɨdhoma lésè, mà dré yìle, mà dré nòle mì sè, mà dré tabèle, ɨ̀ndɨ̀ mà dré tà nɨ nɨ kisùzo dhɨ nɨ tà longó kòdhya. Akódhɨ nda Kúlí adrélépi lɨ́drɨ̀ fe dhɨ ꞌɨ. Lɨ́drɨ̀ nda apfò tá àma kòfalé gò, mà dré nòzoá. Dɨ mà adré tà mà dré nòle mì sè nda nɨ tà ta, adrézó lɨ́drɨ̀ kóná vésè kólyá adrélépi tá Gìká Atá véna gò, dré apfòzo àma kòfalé nda nɨ tà longó kòdhya. Mà adré tà mà dré nòle ɨ̀ndɨ̀ mà dré yìle nda nɨ longó àmɨ dré, mɨ̀ kàmúró kpà ru àma ɨ́be adrélé túmä́ní be dhɨ bvó. Àma, mà amú ru Gìká Atá be, ɨ̀ndɨ̀ akódhɨ nɨ Mváagó, Yésu Krísto be dre. Mà adré tà kòdhɨ kɨ tɨsɨ̀, mà kàdréró lenzélé túmä́ní àmɨ ɨ́be kɨtswálé títí.
Atsima ngádra ꞌásè dhɨ
Tà mà dré yìle Yésu Krísto nda tí gò, mà dré adrézó longóá àmɨ dré dhɨ, tà kònɨ̀dhɨ ꞌɨ: Gìká ngádra ꞌɨ, ɨ̀ndɨ̀ akódhɨ léna dhɨ, tínímvá àlomvá yókódhó. Mà kàdré tàá dhɨ, mà amú ru Gìká be dre gò, mà dré adrézó atsílé tínímvá na dhɨ, kòdhɨ mà adré kɨnzò ta, ɨ̀ndɨ̀ mà adré atsílé tà bàti na ko. Dɨ, mà kàdré àmakya atsílé ngádra ꞌásè ngóró Gìká nɨ tàndɨ dré adrélé ngádra ꞌá dhɨ tɨ́nɨ dhɨ, mà amú ru àma kòfalésè gò, akódhɨ nɨ Mvá, Yésu nɨ kàrɨ́ dré adrézó àma kɨ temvé tàkonzɨ̀ wä́yi dhɨ ɨ lésè.
Mà kàdré tàá dhɨ, àma tàkonzɨ̀ àko dhɨ, kòdhɨ mà adré àma kɨ tàndɨ kɨ lɨtɨ́, ɨ̀ndɨ̀ tà bàti àma léna yókódhó. Dɨ, mà kàdré àma kɨ tàkonzɨ̀ kɨ ta ngádra ꞌá Gìká kandrá dhɨ, akódhɨ nɨ àma kɨ tàkonzɨ̀ nda kɨ tri gò, àma kɨ temvézó àma kɨ tà kònzɨ wä́yi dhɨ ɨ lésè. Tàko ko, akódhɨ gyǎgya, ɨ̀ndɨ̀ kɨtswá adrélé kaꞌìle togó wä́yi sè. 10 Mà kàdré tàá dhɨ, mà ꞌo tàkonzɨ̀ ko dhɨ, mà adré Gìká nɨ bha kɨnzò líyí ro, adrézó kpà tadhá dhɨ, akódhɨ nɨ kúlí àma léna yókódhó.