BÚKÙ TÀ TƗ́DHƗ́//RU YÌZO DHƗ ÀDHYA ÈBÉRÈ Ɨ 1

Wárágà tɨsɨ̀le Èbérè ɨ dré dhɨ

Wárágà kònɨ̀dhɨ nɨ tà àndu ngɨ̀le drìdrì dhɨ

Kònɨ̀dhɨ wárágà tɨsɨ̀le Èbérè ɨ dré dhɨ ꞌɨ. À nì dhya wárágà kònɨ̀dhɨ nɨ tɨsɨ̀lepi dhɨ ngalè àdhi ꞌɨ ya dhɨ ko. Dɨ, à nɨ kɨtswá nòá dhɨ, à adré tɨsɨ̀á móndyá Yésu nɨ kaꞌìbhá gò, ɨ̀ dré adrézó kɨzà nya dhɨ ɨ dré. À adré dɨ tɨsɨ̀á àyɨ nda kɨ kodzózó, ɨ̀ kàdréró àyɨ kɨ totó tätä àyɨ kɨ tà kaꞌìkaꞌì na. À adré kpà tadhá àyɨ dré ngádra ꞌá dhɨ, Yésu Krísto dhya àyɨ kɨ tɨdrɨ́lépi kɨtswálé títí dhɨ ꞌɨ.

À lanzɨ́ wárágà kònɨ̀dhɨ ꞌa be rì. Àlo nɨ, à adré Krísto nɨ tà kàdrɨ̀ lavúlé dhɨ nɨ tadhá (1:1–10:18). À adré tadhá dhɨ, akódhɨ Gìká nɨ Mváagó adrélépi Gìká nɨ tàndɨ nɨ lɨ́drɨ̀ tadhá kyá ɨ́ rú dhɨ ꞌɨ. Akódhɨ kàdrɨ̀ pròfétà kɨ lavú, ángéló kɨ lavú, Mósè nɨ lavú, ɨ̀ndɨ̀ Yòsúwà nɨ lavú. Akódhɨ kòwánà kàdrɨ̀ tà tɨ́dhɨ́ Gìká dré bhàle ru yìzo móndɨ́ ɨ́be dhɨ nɨ tà sè dhɨ ꞌɨ. Dɨ akódhɨ kàdrɨ̀ kòwánà tà àku ru yìzo dhɨ àdhya kɨ lavú. Akódhɨ nɨ lɨ́drɨ̀ fèle mòbòmà ro ngbà ꞌí vésè àlo dhɨ kókpà kàdrɨ̀, mòbòmà atú fèle vésè be bǐ dhɨ kɨ lavú. Dɨ akódhɨ nɨ kàrɨ́ kutúlépi dhɨ sè dhɨ, temvé àma kɨ togó tàkonzɨ̀ lésè kɨtswálé títí, àma kɨ tɨdrɨ́zó.

Rì nɨ, à adré móndyá kaꞌìbhá dhɨ kɨ kodzó, ɨ̀ kàdréró tròle àyɨ kɨ tà kaꞌìkaꞌì rú (10:19–13:19). À adré tà kaꞌìkaꞌì móndyá Gìká àdhya atú dhɨ ɨ̀ dré tadhálé dhɨ kɨ tà tadhá. À adré kpà Gìká adré àma kɨ lotó áyɨ ànzɨ ɨ tɨ́nɨ dhɨ nɨ tà tadhá. À adré kpà tàá dhɨ, mà kàdré àma kɨ mì bha Yésu dri, adrézó àma kɨ kisí ànyɨ Gìká làga akódhɨ sè, ɨ̀ndɨ̀ àma kɨ tà kaꞌìkaꞌì sè.

Tà kàdrɨ̀kàdrɨ̀ wárágà kònɨ̀dhɨ léna dhɨ kɨ atìma

1) Krísto, Gìká nɨ Mváagó adrélépi Gìká nɨ tàndɨ nɨ lɨ́drɨ̀ tadhá ɨ́ rú dhɨ ꞌɨ (1:1-3)

2) Krísto kàdrɨ̀ ángéló kɨ lavú (1:4–2:18)

3) Krísto kàdrɨ̀ Mósè nɨ lavú, ɨ̀ndɨ̀ Yòsúwà nɨ lavú (3:1–4:13)

4) Krísto kòwánà kàdrɨ̀ kòwánà atú dhɨ kɨ lavúlépi dhɨ ꞌɨ (4:14–7:28)

5) Tà tɨ́dhɨ́ ru yìzo Krísto sè dhɨ kàdrɨ̀, tà àku ru yìzo dhɨ nɨ lavú (8:1–9:22)

6) Krísto nɨ lɨ́drɨ̀ fèle mòbòmà ro dhɨ kàdrɨ̀, mòbòmà atú fèle dhɨ kɨ lavú (9:23–10:18)

7) Àma kɨ kisima ànyɨ Gìká làga dhɨ (10:19-39)

8) Tà kaꞌìkaꞌì (11:1-40)

9) Gìká nɨ ànzɨ kɨ lotoma (12:1-13)

10) Tà tàle móndyá kaꞌìbhá kɨ kodzózó dhɨ ɨ (12:14–13:19)

11) Kúlí kùdù (13:20-25)

Gìká longó áyɨ kúlí áyɨ Mváagó tí

1 Atú dhɨ, Gìká longó tá áyɨ kúlí àma kɨ tábhí ɨ dré áyɨ pròfétà ɨ tí, lókyá twátwa ɨ sè ɨ̀ndɨ̀ láti twátwa ɨ sè. 2 Dɨ, lókyá kùdù kònɨ̀dhɨ sè dhɨ, longó áyɨ kúlí àma dré áyɨ tàndɨ nɨ Mváagó tí. Akódhɨ nda dhya Gìká dré tá ꞌòle ngá títí dhɨ kɨ bha dhɨ ꞌɨ, ɨ̀ndɨ̀ dhya dré bhàle kɨtswálé tà títí ɨ́ dré lazílé tàyɨlé ro dhɨ kɨ kisú dhɨ ꞌɨ. 3 Akódhɨ nda adré lagúlé Gìká nɨ tàndɨ nɨ mìlanzìlanzì sè. Adré kpà Gìká nɨ tàndɨ nɨ lɨ́drɨ̀ ꞌo adrélé nòle kyá ɨ́ rú. Adré ngá títí dhɨ kɨ ꞌo adrélé ru totó àyɨ kɨ àrà ɨ ꞌásè áyɨ kúlí rìnyi ró dhɨ sè. Akódhɨ dré móndyá bvò dri dhɨ kɨ temvézó àyɨ kɨ tàkonzɨ̀ lésè dhɨ àmvolésè dhɨ, dré mbàzo lɨrɨ́lé Gìká múrúngú dhɨ nɨ drɨ́ágó lésè bhù na.*

Gìká nɨ Mváagó kàdrɨ̀ ángéló kɨ lavú

4 Dɨ Gìká nɨ Mváagó nda atsá kàdrɨ̀ ángéló títí dhɨ kɨ lavú byá, ngóró rú Gìká dré fèle drá dhɨ dré kpà adrélé kàdrɨ̀ ángéló kya kɨ lavú byá dhɨ tɨ́nɨ. 5 Tàko ko, Gìká tà tá tàdzí tà ángéló dré ngóró dré tàle áyɨ Mvá dré dhɨ tɨ́nɨ ko. Tà tá áyɨ Mvá nda dré dhɨ:

«Mɨ áma Mváagó ꞌɨ.

Ándrò dhɨ, má ti mɨ ma.»†

Tà kpà dhɨ:

«Má nɨ mána adré akódhɨ nɨ Atá ro.

Akódhɨ nɨ ɨ́na adré áma Mvá ro.»‡

6 Kòdhɨ ɨ́be dhɨ, lókyá Gìká dré tá adréràꞌa áyɨ Mvá kàyo nda nɨ amù bvò dri dhɨ ꞌá dhɨ, tà dhɨ:

«Lè ángéló títí Gìká àdhya ɨ̀ kòbhà akódhɨ nɨ lɨndrɨ̀.»§

7 Kàdré ángéló kɨ tà sè dhɨ, Gìká tà dhɨ:

«Akódhɨ adré áyɨ ángéló kɨ amù lyǎ tɨ́nɨ.

Adré áyɨ màrábà nda kɨ amù àtsɨ́ làdra tɨ́nɨ.»*

8 Dɨ, kàdré ɨ́na akódhɨ nɨ Mvá nɨ tà sè dhɨ, tà dhɨ:

«Á! Gìká, ámɨ lɨrɨ́rà adrézó òpɨ̀ nya dhɨ nɨ adré kóná vésè kólyá.

Mɨ́ nɨ adré òpɨ̀ nya kùtù fa adrélépi ámɨ tà gyǎgya tadhá dhɨ sè.

9 Mɨ́ lè mɨ́na tà gyǎgya kòdhya gò, tà kònzɨ gàzo gàgà.

Dɨ ásà dhɨ, Gìká, ámɨ Gìká zɨ̀ mɨ adrélé kàdrɨ̀ ámɨ arúpi kɨ lavú gò,

dò kólénzé àdhya nɨ dàzo mɨ́ dri.»†

10 Akódhɨ tà kpà áyɨ Mvá nda nɨ tà sè dhɨ:

«Mírì, ngá títí dhɨ kɨ kɨdhoma ꞌá dhɨ, mɨ́ bhà tá bvò nɨ pá mɨ.

Mɨ́ bhà tá kpà bhù ɨ ámɨ tàndɨ nɨ drɨ́gá sè.

11 Ngá nda kɨ dra akɨ́lé títí, dɨ, mɨ́ nɨ mɨ́na ngbú adré be.

Ɨ̀ nɨ akù kɨ́tá ɨ tɨ́nɨ.

12 Mɨ́ nɨ àyɨ kɨ kopá kánzò tɨ́nɨ.

Ɨ̀ nɨ ru ladzá kɨ́tá àku dhɨ ɨ tɨ́nɨ.

Dɨ, mɨ́ nɨ mɨ́na ngbú adré ngóró mɨ́ dré adrélé dhɨ tɨ́nɨ.

Ámɨ kóná kɨtswá kpà tàdzí akɨ́lé ko.»‡

13 Gìká tà kpà tàdzí tà ángéló àlo dré kònɨ̀nɨ ko:

«Mɨ́ alɨ̀ lɨrɨ́lé áma drɨ́ágó lésè,

tsàle lókyá má dré dra ámɨ kàrɨbhá kɨ bhàzo adrélé ámɨ pá zàle dhɨ ꞌá.»§

14 Ángéló títí dhɨ ɨ ngbà ꞌí tɨrɨ́ adrébhá Gìká nɨ àzí ꞌo dhɨ ꞌɨ. Akódhɨ adré àyɨ kɨ amù móndyá dra lɨ́drɨ̀ kóná vésè kólyá dhɨ nɨ kisúbhá dhɨ kɨ ledé.

*1:3 1:3 Ópɨ́ kàdrɨ̀ nɨ drɨ́ágó lésè dhɨ, àrà adrélé fèle móndɨ́ dré akódhɨ nɨ lɨndrɨ̀ tadházó dhɨ ꞌɨ.

†1:5 1:5 À kònò Longó ɨ 2:7.

‡1:5 1:5 À kònò 2 Sàmùwélè 7:14.

§1:6 1:6 À kònò Dùtèrònómè 32:43.

*1:7 1:7 À kònò Longó ɨ 104:4.

†1:9 1:9 À kònò Longó ɨ 45:7-8.

‡1:12 1:12 À kònò Longó ɨ 102:26-28.

§1:13 1:13 À kònò Longó ɨ 110:1.