Mokanda ŋwa Polo ŋwaa ntuɓo oka
Ɓatesaloniki
Maphɔɔ ma etatele
Polo akomaka mokanda mumu phɛnɛphɛ na ileka mbula mako matano o sima ya ikundwa sa Yesu. Mokanda mɛ mokokyi iɓa mokanda ŋwa ntuɓo ŋwaakoma Polo. Mokokyi iɓa na mokanda ŋwa ntuɓo onte ya nkanda isɔ ya Sangola Eenyakune.
Tesaloniki yaɓaka mokyisi mozale mokonzi ŋwa manyɛtɛ ma Makedoniya. Polo akomaka omɔ o imbanga sɛ sa iɓale. Ɓato ɓaikye ɓaanolaka mateya mɛ, emba tamba nde kɔkɔ omɔ phɔ Ɓayuda ɓa omɔ ɓaambyaka mobulu. Yango mɛna amba mana o Tesaloniki, amba ya kyɛndɛ o Bere (Bitoma 17.1-10).
Sima ya nkɔlɔ, wakoma yo Koliti, nwɛbi nɛ Timote amba moimola ɓo walekanaka maphɔɔ o Tesaloniki. Emba Polo amba ya ɓalɔngɔlɔ. Amba na ɓalenza oɓokye ɓakyɛndɛ nde o ɓoo. Amba na ɓabuyisela eyano o motuna ŋwaaɓaka ɓɛ́ɛ ɓamitune phɔ ya lowɔ la ikundwa sa ɓawe na phɔ ya iya sa Nkolo na nkyɛmɔ isɔ.
O moo ŋwa lɔlɔ, ɓaanosi ɓaayɔkɔ ɓamitune phɔ ya ndengye eya mosuka maphɔɔ ma mokyisi. Mokanda mumu mokokyi iloingola mayɛlɛ phɔ moloimole nyango wa lowɔ: Esengyesi oɓokye toteya oɓokye toli ɓato ɓa mokyisi ŋwa Ŋwaphongo, tombe na ɓaa na ianola oɓokye nɔnɔ itekye tomoɓa na Nkolo elele yɔnɔyɔ phɔ ya ɓoɓɛlɛ (4.17).
Maphɔɔ mali o mokanda mumu:
- 1 Ɓatesaloniki 1.1: Iɓeya
- 1 Ɓatesaloniki 1.2-10: Mɛlɛsi phɔ ya moɓesi na ianola sa ɓato ɓa Tesaloniki
- 1 Ɓatesaloniki 2.1–3.13: Etoma ya Polo o Tesaloniki
- 1 Ɓatesaloniki 4.1-12: Moɓesi moanole Ŋwaphongo
- 1 Ɓatesaloniki 4.13–5.11: Iya sa Nkolo Yesu
- 1 Ɓatesaloniki 5.12-28: Mateya na ndɔngɔlɔ
1
Iɓeya
1 Inga Polo, Silivɛ na Timote tokomele ingomba sa Tesaloniki sili onte ya Tata Ŋwaphongo na Nkolo wa ɓanga Yesu Klisto. Lɛ oɓokye ngɔlu na ɓose iɓe na ɓɛ̀ɛ.
Ianola sa ɓato ɓa Tesaloniki
2 Nkɔlɔ isɔ tophɛ Ŋwaphongo mɛlɛsi phɔ ya ɓɛ̀ɛ wa eyumunya ɓanga o maɓɔndɛsi ma ɓanga. Imbɛlɛ sisɔ, 3 toeyumunya phɔ ya ianola sa ɓɛ̀ɛ sili na bitoma, na lozingo la ɓɛ̀ɛ lookusi, na ná imilenza sa ɓɛ̀ɛ o molemo, ikyiute na Nkolo wa ɓanga Yesu Klisto, o ɓoo pha Ŋwaphongo Ango wa ɓanga. 4 Ɓɛbi na ɓanga ɓa lozingo, eɓa na ɓolaa oɓokye Ŋwaphongo aeyɔlɔ. 5 Phɔ waaya ɓanga eyimola Simo Elaa, teyaɓaka nde na maloɓa pha, kasi na ná ɓokusi pha Ɓolɔɓɔ. Na isɔ yaaɓaka ɓanga towɔ ili ya phɛlɛ. Waɓaka ɓanga na ɓɛ̀ɛ, koeɓe moɓesi ŋwa ɓanga. Tokyelaka ɓaɓona phɔ ya ɓolaa pha ɓɛ̀ɛ. 6 Emba ɓɛ̀ɛ, wamba lomekola ɓanga na Nkolo, waa yamba ɓɛ̀ɛ Iloɓa onte ya minyɔkɔ na nkyisa ya Ɓolɔɓɔ. 7 Yango mɛna, ɓaanosi ɓasɔ ɓa Makedoniya na ɓa Akaye, ɓabuto iyemekola. 8 Emba uta na ɓɛ̀ɛ, Iloɓa sa Nkolo sioka, teli nde o Makedoniya na Akaye, kasi simo ya ianola sa ɓɛ̀ɛ oka Ŋwaphongo, enyango mboka esɔ oɓokye tolosengyesi na ikula wɔɔ. 9 Phɔ moto na moto kaimole, wa wɔɔ yo phɔ ya ɓɛ̀ɛ, ndengye eya loyamba ɓɛ̀ɛ na ndengye eya lɛ ɓɛ̀ɛ bikeko phɔ ya iyekpana oka Ŋwaphongo phɔ ya imokyelela, yo ooli na ɓomɔɔ na owa solongo. 10 Emba koziya Ŋwana wɛ owa mouta o ikolo, eli Yesu owakundola Ŋwaphongo onte ya ɓawe. Iyo aalomanya o yɔɔ ya Ŋwaphongo ekye ye.