Mokanda ŋwa Polo ŋwa iɓale oka
Ɓatesaloniki
Maphɔɔ ma etatele
O mokanda mumu, Polo akuli butolela lowɔ la iya sa Nkolo Yesu (kyeka mokanda nwɛ ŋwa ntuɓo oka Ɓatesaloniki). Phɔ lowɔ mɛ laɓaka lotungyisa ɓato ɓa Tesaloniki.
- Ɓakyi onte ya ɓɛ́ɛ ɓaɓaka ɓawɔ ɓɛkye mokɔlɔ mɛ mokomi phɛnɛphɛ (2.2). Polo kambe ɓaimola ɓoɓo: Yambo ya oɓokye Nkolo Yesu aye na nkyɛmɔ, esengyesi oɓokye «Mɔɔti» amiwɛninya, Zabulu owamoluka ibungya ɓato ɓa Ŋwaphongo na iikyela Nkolo ziko (2.1-12). Yango mɛna Polo kaongye na ɓaanosi ɓaphile Simo Elaa nzii, ɓɛ́ɛ saphɛmbɛ na iɓondɛlɛ (2.13–3.5)
- Ɓaanosi ɓayɔkɔ ɓalɛkyɛ ikyela etoma phɔ nde ya iziya suka ya mokyisi, emba ɓambaka butwa nde iza ntoma ya ɓato ɓasuu. Polo katomisa ɓato ɓaa ɓokɔɔ oɓokye ɓaɓengye moɓesi ŋwa ɓaamiambya o etoma. Phɔ ɓɛ́ɛ mampenza ɓakokye imibikya. «Moto ootozingye ikyela etoma, yo samba na za» (3.10).
Maphɔɔ mali o mokanda mumu:
- 2 Ɓatesaloniki 1.1-2: Iɓeya
- 2 Ɓatesaloniki 1.3-4; 11-12: Polo kaɓɔndɛlɛ Ŋwaphongo phɔ ya ɓato ɓa Tesaloniki
- 2 Ɓatesaloniki 1.5-10; 2.1-12: Mateya phɔ ya iya sa Nkolo Yesu Klisto
- 2 Ɓatesaloniki 2.13–3.15: Mateya phɔ ya moɓesi moɓɔngyi na moanosi
- 2 Ɓatesaloniki 3.16-18: Ndɔngɔlɔ
1
Iɓeya
1 Inga Polo, Silivɛ na Timote tokomele ingomba sa Tesaloniki siili onte ya Tata Ŋwaphongo na Nkolo wa ɓanga Yesu Klisto. 2 Lɛ oɓokye ngɔlu na ɓose ikyiute oka Ŋwaphongo Tata na Nkolo Yesu Klisto iɓee na ɓɛ̀ɛ.
Ŋwaphongo amosambisa ɓato mokɔlɔ ŋwa moya Nkolo Yesu
3 Ɓande, tosengyesi iphɛ Ŋwaphongo mɛlɛsi imbɛlɛ sisɔ phɔ ya ɓɛ̀ɛ, embi ɓa nde ɓomɔ, phɔ ianola sa ɓɛ̀ɛ sikole na ɓokusi, na lozingo loli na ɓɛ̀ɛ onte ya ɓɛ̀ɛ, lokole onte ya mɔnɔmɔ na mɔnɔmɔ na ɓɛ̀ɛ ɓasɔ. 4 Yango mɛna ɓanga tomiphambe na ɓɛ̀ɛ onte ya mangomba ma Ŋwaphongo, phɔ ya ikanga sa ɓɛ̀ɛ sa motema na ianola sa ɓɛ̀ɛ onte ya minyɔkɔ misɔ na bimekyi bizwe ɓɛ̀ɛ. 5 Isɔ miina ili elembo ya ɓolombe pha ɓosembo pha Ŋwaphongo, ntina mɛ eli ya iyebuya ɓato ɓaalongoɓa phɔ ya Ɓokonzi pha Ŋwaphongo ɓookyele ɓɛ̀ɛ ɓolɔsi.
6 Yango mɛna, Ŋwaphongo na ɓolombe phɛ amoenza maɓeku oka ɓato ɓaenyɔkɔlɔ. 7 Emba amoephɛ ɓɛ̀ɛ ɓanyɔkɔlɔ ɓɛ, iyema na ɓanga elele yɔnɔyɔ, imbɛlɛ saa mowɛnɛnɛ Nkolo Yesu, owamouta o ikolo na ɓanze ɓɛ́ɛ ɓa mwiya. 8 Amoya onte ya itumbu sa ŋwenya, phɔ ya iya phɛ etumbu oka ɓato ɓaate ɓaeɓe Ŋwaphongo na ɓaate ɓakuummole Simo Elaa ya Nkolo wa ɓanga Yesu. 9 Etumbu ya ɓɛ́ɛ yamoɓa iwa sa ɓoɓɛlɛ na ɓoɓɛlɛ, itakye na ɓoo pha Nkolo na ná nkyɛmɔ ya ɓokonzi phɛ. 10 Imbɛlɛ sa moya yo, mokɔlɔ mɛ, ɓasantu ɓɛ̀ɛ ɓaamophɛ nkyɛmɔ na ɓato ɓasɔ ɓaanola Ŋwaphongo ɓaamosamba. Emba ɓɛ̀ɛ ɓaanola simo eyaeyimolaka ɓanga wamoɓa o motango ŋwa ɓɛ. 11 Kyeka ntina ekye ɓɔndɛlɛ ɓanga imbɛlɛ sisɔ phɔ ya ɓɛ̀ɛ, phɔ Ŋwaphongo wa ɓanga awɛnɛ oɓokye olongoɓa na mbela eya eɓanga yo, oɓokye na mwiya nwɛ, akyele oɓokye okokya ɓolaa ɓosɔ ɓozingye yo ambe na buya ianola sa ɓɛ̀ɛ siɓe na bitoma. 12 Na ɓomɔɔ nkombo ya Nkolo wa ɓanga Yesu yamoɓa na kyɛmɔ onte ya ɓɛ̀ɛ, emba ɓɛ̀ɛ onte yɛ, phɔ ya ngɔlu ya Ŋwaphongo wa ɓanga ná ya Nkolo Yesu Klisto.