Mokanda ŋwa Polo oka
Ɓakolose
Maphɔɔ ma etatele
Polo akomaka mokanda mumu imbɛlɛ saɓaka yo o bɔlɔkɔ. Yo taikaka eɓa ɓaanosi ɓa Kolose. Moto owa ɓaeɓaka eli nde nwɛbi nɛ Epafras moto owaimolaka Simo Elaa omɔ. Emba amba yaimola Polo oɓokye ɓatati inyangola masimo masuu manyakune onte ya ɓaanosi. Ɓaɓateya oɓokye: Phɔ ya iyeɓa Ŋwaphongo, esengyesi oɓokye ɓato ɓakumole na ɓoikye malɔɓɔ maɓangye ɓɛ́ɛ «Ɓakonzi ɓa ikolo na munse», ɓambe kula na miɓɛlɛ na ikumola miɓeko ndengye na ndengye mikyekyi ntoma.
O etee eya ntuɓo, Polo aphɛ Ŋwaphongo mɛlɛsi phɔ ya ndengye eyalobikya Klisto. Yo alekyi malɔɓɔ misɔ, eli nde yo oli mokonzi ŋwa Ingomba (1.3–2.3). O etee eya iɓale, Polo kaongye na ɓaanosi oɓokye ɓakyeɓe na mateya ma ɓɔɔlɛ (2.4-25). Asɔkya na iteya moɓesi mowa molongoɓa na ɓato ɓa Klisto na ɓa Ingomba. Eɓe onte ya maɓota naa onte ya mokyisi. Ɓoɓɛlɛ amba ɓeya ɓaanosi (3-4).
Mateya maa ɓɔɔlɛ matɔkɔlɔ imbɛlɛ sisɔ. Naɓo mawɛnɛnɛ ndokolo mali nde manyakune, mango masɔ maɓende ɓato phɔ ɓamanya maumunya ma ɓɛ́ɛ oka Klisto. Nzuka eli nde yo oli munɛnɛ, yo moto owa manya ɓato o ɓoombo ɓosɔ.
Maphɔɔ mali o mokanda mumu:
- Ɓakolose 1.1-8: Iɓeya
- Ɓakolose 1.9–2.19: Klisto ali nza na etoma yɛ eli iye?
- Ɓakolose 2.20–4.6: Ɓomɔɔ ɓoonyakune onte ya Klisto
- Ɓakolose 4.7-18: Ndɔngɔlɔ
1
Iɓeya
1 Inga Polo, nali toma ya Yesu Klisto ɓo wazinga Ŋwaphongo. Nga na nwɛbi na ɓanga Timote, 2 toekomele mokanda mumu, ɓɛ̀ɛ ɓasantu ɓaa Kolose, ɓaakolo ɓɛbi na ɓanga onte ya Klisto. Lɛ oɓokye ngɔlu na ɓose ikyiute oka Ango wa ɓanga Ŋwaphongo iɓee na ɓɛ̀ɛ.
Polo kaphɛ Ŋwaphongo mɛlɛsi
3 Tophɛ Ŋwaphongo, Ango wa Nkolo wa ɓanga Yesu Klisto mɛlɛsi phɔ ya ɓɛ̀ɛ o maɓɔndɛsi ma ɓanga ma nkɔlɔ isɔ. 4 Tooka simo ya ianola sa ɓɛ̀ɛ oka Yesu Klisto, na phɔ ya lozingo looli na ɓɛ̀ɛ oka ɓasantu ɓasɔ, 5 na molemo ŋwa ɓɛ́ɛ mi yaeɓɔngyisela Ŋwaphongo o ikolo. Molemo ŋwaokaka ɓɛ̀ɛ phanza o nzela ya Iloɓa saa phɛlɛ, sili Simo Elaa. 6 Simo mɛ Elaa eyakomaka nɔnɔ oka ɓɛ̀ɛ, eenyango o munse munsɔ, kyeembe na ɓota mbuma ikyikole nde ɓowa kyela yango onte ya ɓɛ̀ɛ, tata mokɔlɔ ŋwaokaka ɓɛ̀ɛ na ŋwa eɓaka ɓɛ̀ɛ na phɛlɛ ngɔlu ya Ŋwaphongo. 7 Ikokana na mateya maephɛkyɛ Epafras, ekamba ya ɓanga na nwɛbi wa etoma, owakyela etoma phɔ ya ɓɛ̀ɛ ndokolo owaakolo moto wa etoma wa Klisto. 8 Aloimola ndengye ya lozingo laephɛ Ɓolɔɓɔ.
9 Yango mɛna, o mopha ŋwaka ɓanga, tata mokɔlɔ ŋwa looka ɓanga, toloolɛ iɓɔndɛlɛ phɔ ya ɓɛ̀ɛ. Toongye na Ŋwaphongo oɓokye aephɛ saakolo zebi na malondo maute na Ɓolɔɓɔ phɛ. 10 Na ɓomɔ, wambabika ɓookozingye Ŋwaphongo, waamba na kyela isɔ ikyimophɛ nkyisa. Wamokyela na maphɔɔ masɔ maɓote mbuma iinda, wamba na kola na iyeɓa Ŋwaphongo sakolo iyeɓa. 11 Ɓamoekuya o maphɔɔ masɔ na mwiya ŋwa nkyɛmɔ yɛ, emba na ɓomɔ wamokoma na ilendendala na ná ikanga motema o bimekyi bisɔ.
Zembo phɔ ya Klisto ooli mokonzi ŋwa ikolo na munse
12 Na nkyisa, phɛ Tata mɛlɛsi, phɔ eli yo owakyela ɓokye ozwe na ɓɛ̀ɛ iyalo o ilaka sa ɓasantu onte ya moo.
13 Alomanya o ɓokonzi pha enzɔmbi, amba lobuya o ɓokonzi pha Ŋwana wɛ wa lozingo. 14 Onte yɛ tokando, masumu ma ɓanga malimbisami.
15 Ali elalaa ya Ŋwaphongo otowɛnɛnɛ,
Mwana owa ɓoo onte ya bikyelamo bisɔ,
16 phɔ isɔ yakyelama onte yɛ,
o ikolo na o se,
bikyelamo biwɛnɛnɛ na biteebiwɛnɛnɛ,
eɓe na phɛmbɔ isɔ ikyiangyele mokyisi ŋwa enzɔmbi,
isɔ yakyelamaka nde nɛ na phɔ yɛ.
17 Emba iyo ali o ɓoo pha maphɔɔ masɔ,
isɔ ili nde phɔ yɛ,
18 emba iyo alii moto ŋwa nzoto, nzoto mɛ eli Ingomba.
Ali etatele,
Ŋwana owa ɓoo onte ya ɓawe,
phɔ aɓe o maphɔɔ masɔ moto wa ɓoo.
19 Phɔ Ŋwaphongo asepela
imizasa mobimba nwɛ munsɔ onte ya Klisto.
20 Na nzela yɛ, ná phɔ yɛ, Ŋwaphongo aɓɔngya na phɔ isɔ.
Na nzela ya malongo maasweya ŋwana wɛ o ekulusu, Ŋwaphongo abuya ɓose eɓe na ose eɓe na o ikolo.
21 Emba ɓɛ̀ɛ ɓaaɓaka phanza ɓabutu, ɓɛ̀ɛ ɓaaɓaka na bitoma biɓe ɓawɛniyaka ɓonguna ɓookusi na Ŋwaphongo, 22 kyeka oɓokye uŋwaŋwa eye Ŋwaphongo aeɓɔngya phɔ ya nzoto ya Ŋwana, na iwa sɛ, phɔ ya ewɛninya o ɓoo phɛ ɓasantu, sa mooya na sa intɔnɔ. 23 Kasi esengyesi oɓokye, na ianola, ophile na ɓokusi ɓɛ́ɛ sakatusa, samana o molemo ŋwa Simo Elaa eya okaka ɓɛ̀ɛ, eya imolaka ɓɛ́ɛ bikyelamo bisɔ bili o mokyisi, emba inga Polo, nabuto moto wa etoma phɔ yaimola Simo mɛ Elaa.
Eɓasi ya Polo
24 Uŋwanwe eye nali na nkyisa onte ya malɔsi maokye nga phɔ ya ɓɛ̀ɛ. Na nzoto ya nga, nakokya malɔsi ma Klisto mata ɓaa o nzoto yɛ ili Ingomba. 25 Naɓuto moto wa etoma wa Ingomba, kokokana na etoma eyampɛ Ŋwaphongo phɔ ya ɓɛ̀ɛ. Etoma mɛ eli iunva iyimola Iloɓa sa Ŋwaphongo, 26 sekyele eyaɓombama minyabipha emba Ŋwaphongo aewɛninye uŋwaŋwa oka ɓasantu ɓɛ. 27 Azingaka iɓateya ezwele na nkyɛmɔ ya sekyele eyaɓombama mɛ onte ya ɓapakano. Klisto ali onte ya ɓɛ̀ɛ, molemo ŋwa nkyɛmɔ! 28 Eli yo okoimole ɓanga. Toimole moto munsɔ, toteya na moto munsɔ na zebi sisɔ, phɔ ya ibuya moto munsɔ moto olongoɓa onte ya Klisto. 29 Yango eli ntina ya etoma ekyeŋwane na nga, ya eɓasi ekye kambe nga na ɓokusi pha Klisto ɓookyele na mwiya onte ya nga.