1 A be gwenene yanni yulla je yani eny gwudi ngwong ngwümïꞌrïnär ngwe nono gïdïdülä, alanga ꞌdar lïlïngïdï ndi ari a libebera. A be bebere gwati gäbïcï ngwüjü aar piyi yigoꞌro yegen a be ämnï, gwati odajidi. 2 Nginde gwanni gwaru gwülïngïdï yiꞌral yere, nginde ꞌdidanu yaꞌting je lïngïdï anaku rar gu. 3 A be dïjï danni dämnä Ngwaalinga, a be Ngwaalu ru ngwülïngïdï ngindeng.

4 Yäy gu no, yani eny gwudi mïꞌrïnï nono gwudi dïdülä, a lïlïngïdï ndi ari dïdülä däꞌtüdï gong gere gïdïdlä. Ngwaalu ngwere ngwaꞌti mana aar be ru ngweꞌte pu ꞌdogo. 5 Manari yiꞌral yere giyoo kerala yaa gïdïyängälü yati gäbïcï ngwüjü aar ari yiru ngwaalu, yiru ꞌdidanu ndi ari ngwaalu ngwo ngwonyadanu na ngweleny onyadanu, 6 a be alanga lätï ꞌdogo Ngwaalinga ngweꞌte pu ngwuru Papa ngwugeꞌta yiꞌralalu ꞌdar ngwuru gwanni gwümïdïjär. Ar ätï Delenya deꞌte pu diru dani Yicu Kirictu gwanni gwugeꞌta gwe Ngwaalu yiꞌralalu ꞌdar gwuru gwati nje ätädä miding.

7 A be ngwüjï ꞌdar ngwaꞌti lïngïdï yiꞌral giyee. Ngwüjï ngwoko ngwuma je dïdülä mananu ꞌdi manari ngwuma eny ngwony ngwudi mïꞌrïnï nono gwudi dïdülä, aar je engga ndi ari ꞌdid ngwudi dïdülä ngwuru. Ndi ari lamiꞌratu yigor yegen ati aar be engga ndi ari lima rngï. 8 A be yilinginna ndi ari ngwong ngwani eny, ngwati nje ꞌti ꞌdonggaja gito Ngwaalu, ma ar je ꞌdonya ndi eny, a laꞌti la erne gony gere na ma ar je eny, a laꞌti la bile gony gere.

9 Arnganar nunnu aaꞌti gätïnï linginalu ndi arri gwalu gwa ru gimle ngwüjï ngwanni ngwo ngwamiꞌratu yigor. 10 Ndi ari dïjï ndoo damiꞌratu ligor lüngün, aar ang engga gwanni gwaru gwubebera ndi eny kobo gidi dïdülä, gwa ang gäbïcï gwa ꞌranu ndi eny ngwüdï ngwudi dïdülä. 11 Bebere gwunga gwa be ru gwa gäbïcï dïjü ndee damiꞌratu da dudi a gu be lenge ndi ari, Kirictu gwayu gwani gwanggalu nggwee. 12 A be anni ati aang ärrïjï ngwanggalu yiꞌral yiki ngaa je gwüꞌrä yigor yegen yanni yamiꞌratu, ngaa lati ärrïjï Kirictung yiꞌral yanni yiki. 13 Yäy gu no, manari yanni yati nje eny yati gäbïcï diwengga ngwïꞌdï, nggwaꞌti ba be gweny ngwüdï ngwoo aꞌtur nunnu aaꞌti gwunyi gäbïcï gwïꞌdï.