1 Gwujanar gora güny, anaku ati nyi gu gwuji gora gidi Kirictu.

2 Äny gwürtädä je ndi ari ngaa lidiwayininy giyiꞌral ꞌdar na gwani määtädä ngwujaꞌri ngwanni ngwape nje nga je enggaci anaku ätädä je gu.

3 Äny gwümïnä gwenene ndi aang lenge ndi ari Kirictu gwuru giꞌra gidi dur deꞌte deꞌte, na dur diru giꞌra gidi daw, na Ngwaalu ngwuru giꞌra gidi Kirictu. 4 Dur dere danni dati otaci Ngwaalingalu na ngwalliji yïjïrä giꞌra ge gïgwüꞌrïbänälü, daꞌti dïnyädï Kirictung gwanni gwuru giꞌra güngün. 5 Na daw dere danni dati otaci Ngwaalingalu na ngwalliji yïjïrä giꞌra ge gijalu mbüny, daꞌti dïnyädï giꞌra güngün, yiru nono mung wädïnï. 6 A be manari daw dati ꞌti gwüꞌrübäjä giꞌralu, gäbïcär ngwüꞌrïꞌtädä ngwäꞌrälä, a manari yiru yaaru ndi daw üꞌrïꞌtädä ngwäꞌrälä na ngwüwädïnï, gäbïcär ngwuje gwüꞌrübäjälü.

7 Dur daꞌti da gwüꞌrübäjï giꞌralu güngün, anni rung giꞌremna gidi Ngwaalu na näjï gwüngün, a be daw diru näjï gwudi dur. 8 Ndi ari dur daꞌti aar geꞌta gidaw, a be daw diru digeꞌtaar gidur. 9 Na dur daꞌti aar gïꞌtïjä dayu, a be daw diru dïgïꞌtïjäär duru. 10 Yiru giyee na nunnu gwani yïꞌrr, a daw geꞌte gony gere kiꞌrala nunnu ngwinggidi giꞌremna gidi yeleny kiꞌra güngün.

11 A be Gideleny, daw daꞌti ju ꞌter gidur a dur ji ꞌter gidaw. 12 Ndi ari anaku geꞌtaar gu dayu gidur, yiru gu ꞌto ndi ari dur dïlïngïnä gidaw. A be yiꞌral ꞌdar yïndï Ngwaalu.

13 Ombajar je be yigoꞌro ye yalu, yüꞌrïdï gu dayu ndi otaci Ngwaalingalu daꞌti gwüꞌrübänä giꞌralo? 14 A mine drü dati nje ꞌti enggaca ndi ari yiru yaaru gidur ndi oleye ngwäꞌrälü 15 ma be daw ole ngwäꞌrü, ngwaꞌti ani ïrïngïnï gwüngüne? Ndi ari dïgïꞌtïjäär ngwäꞌrü ngwola ngwe gwüꞌrübänï giꞌralu. 16 A be manari dïjï dere dïmïnü ndi garnati giyiꞌral giyee, dïmürä diru ndee dïndï de yiꞌdoonga ꞌdar yidi Ngwaalu na daꞌti ar ätï dere mana.

17 Ngwujaꞌri ngwee ngwadi nyi ngwe ari, äny gwäꞌtüdï gwada je ortada, ndi ari oꞌrajidalu gwalu gwati apa yiꞌral yonyadana yanni yiki ndi ari ngwuje apa yanni yijaw. 18 Gwerre gwerre, nggwuꞌdingina ndi ari ma ji ma aang oꞌrajidalu liru giꞌdoonga gidi Ngwaalu, ngaa lati üꞌrïꞌtïdänü, yinje ämnï yoko ndi ari ya gu ru ꞌdid. 19 Yilinginna ndi ari ürïꞌtïdänü gwadi ji ꞌdanggalanu nunnu ngaa gwällïnï lanni lurnida je Ngwaalu ꞌdanggalanu. 20 Ma aang oꞌrajidalu ngwaalu ngweꞌte pu, ngaa lati ꞌti oꞌrajidalu nunnu aang eny Enying gwudi Deleny, 21 ndi ari ma aang eny, dïjï deꞌte deꞌte dati dalmacani gwenggen gweꞌte ngweny enying gwüngün a be gwenggen ji ngwamu ngwe, na gweꞌte ngwïyï ꞌdi ngwürlälï! 22 Ngaa laꞌti ätï ngwuꞌduna ngwada gu eny ngaa gu ïye? Na ngaa lati anidanu giꞌdoonga ge gidi Ngwaalu ngaa je gäbïcï je lanni liru ngwuwayi a je yaaru ape? A be nggwada je ca? Ii a je ortada giyiꞌral giyee? Nggwaꞌti gwa je ortada!

23 Ndi ari yanni yape nje Gideleny, yiru yanni yima je ätädä yani ndi ari Deleny dani Yicu gidilung danni dima aar de gwurlanu, gwapu gona, 24 ngwube ci Ngwaalinga yäy ꞌtu ngwüꞌränü ngwube ari, “Ngwanginu ngwüny ngwuru ngwee, ngwani nga nga, ärrär je giyee nyi ye diwayini.” 25 Yeꞌte yeꞌte mana anni ma aar medaji enying, ngwape ginya ngwari, “Giny nggee giru gekajidi gwanni gwuyang gwudi yïn yüny, ärrär je giyee ma aang ïyï nyi ge diwayini.” 26 Ndi ari manari ngaa lima eny gona nggee ngaa ïyï ginya nggee, ngaa ondajalu yiꞌrany ye yidi Deleny ꞌdi ngwoꞌra.

27 Yäy gu no, dïjï danni dadi eny gona ngwïyï ginya gidi Deleny gay ge gaꞌti jaw, nginde gwa ke nono ngwanginu ngwudi Deleny na gïyïn yüngün. 28 A dïjï ombani ligoꞌro lüngün gwerre gwerre ndi eny gona ngwïyï ginya. 29 Ndi ari dïjï danni da eny ngwïyï danidanu ngwanginu ngwe ngwudi Deleny, da eny da ïyï da obalu ligoꞌro le lüngün. 30 Yiꞌral giyee yïgäbïcä je lonyadu ꞌdanggalanu aar amiꞌrati aar ümï na loko lima ayi. 31 Ma be ari alanga lombana yigoꞌro yege, laꞌti ladi nje le obalu. 32 Ma nje gwe Deleny obalu, gwureraji nje nunnu aaꞌti a la ji linje le obalu ngwüjïngä le ngwudi dïdlä.

33 Yäy gu no, lani ngwänggärï, manari ngaa lima oꞌrajidalu gwüpäng ndi eny, dünïcïdär. 34 Dïjï danni dïtï ngwamu gwulleny ndi dünïcï ngwüjü, ngweny ꞌdunu ꞌdünggüngün, nunnu ma aang oꞌrajidalu aaꞌti ya gwurli ya ru obalu.

Na ma ji minyi ila, ya je be enggaci yanni yima ïꞌdälü.