Ngwujaꞌri ngwanni ngwullu je
Yuwana giꞌra geꞌte
Änï kitabanu
Yuwana gwuru dooꞌra dükäjäär ngwooꞌranu ngwükäjäär je (ngwanni ngwujaar Yicunga le). Gwänggädäär aar ꞌdingini gwondaja aar akani nono. Yuwana gwuca Yicung gwuru ngwujaꞌri ngwudi midi, nginde gwanni gwujaar papa gwe gwurꞌtal (1.1–2). Yuwana gwudiwayiniya ngwüjü ngwanni ngwadi uli ngwujaꞌri ngwee ngwuru ꞌdidanu ngwani Yicu ndi ari ngwoorta ngwuju ngwonyadu ngwanni ngwuru ngwuꞌduru ngwanni ngwati nyïꞌrïnï ndi ari Yicu gwuru gwanni gwani Kirctu (2.22). Aar nyïꞌrïnï ndi ari gwuma ru dïjï dümnä gilingeno (4.2). A ngwïkïrïjïn mätïnälü ꞌdïꞌdäny ngwujaꞌri ngwanni ngwenggacaar je ꞌtuꞌtu gerre (2.24).
Yuwana gwüpäcä ngwïkïrïjïnälü aar elelle elelleng gwanni gwujuꞌru aar ämnäjïdï. Ngwuje ci aar ämnï Kïjï gidi Ngwaalu aar ꞌdengenaci ngwujaꞌri ngwüngün. Ngwuje diwayiniyi ndi ari aar gwuji Yicung, nunnu ma ji mung oꞌra mana aar gu ïcïnänü ngwäyänü ꞌdünggüngün (2.28).
Yajang yidi ngwujaꞌri
1. Ngwujaꞌri ngwudi midi (1.1–4)
2. Midi ndi acajidi gwudi papa na Gïjï güngün gani Yicu (1.5—2.29)
3. Elellar nono yïjï yidi Ngwaalu gïdïdlänü ndee (3.1–24)
4. Ngaa lenge ndi ari yiru ange yanni yiru ꞌdidanu na yanni yiru yiꞌduru (4.1–6)
5. Ämnär Ngwaalinga ngaa ämnäjïdï (4.7–21)
6. Ämnär Kïjï gidi Ngwaalu (5.1–21)
1
Ngwujaꞌri Ngwudi Midi
1 Änyängä lullu ngwujaꞌri ngwudi midi ngwuju ꞌtuꞌtu gwerre ngwanni ngwuꞌdingini nje, nje engga ngwäy ngwe ngwärï nje inggidi nje akani nono ngwuy ngwe ngwärï ngwuru ngwee ngwaru nyii ngwe gweneno. 2 Midi nggwee gwüꞌtädälü nyii engga nyii gwe ondaji, ara je be enggaci ndi ari ngwujaꞌri ngwuru ngwudi midi gwudi gwurꞌtaling gwanni gwuju ndi Papa gwuru Ngwaalu aar nje be ꞌtäcälü. 3 Ngwujaꞌri ngwanni ngwänggädï nje, nje ꞌdingini, ngwuru ngwondacara je ngwe nunnu ar gu acajidi ar gu emadanu gwüpäng. Ar emadi ndi acajidi gwüpäng na acajidi gwege nggwee gwuru Ngwaalinga le ngwuru Papa na Gïjï güngün gani Yicu Kirictu. 4 Änyängä lullu ngwujaꞌri ngwee, nunnu a jayanu gwege ru gwanni gwumbutu.
Elelle Buri gwe
5 Ngwujaꞌri ngwuru ngwee ngwanni ngwuꞌdingini nje ndi Yicu ara je be ondaca. Ndi ari Ngwaalu ngwuru buri, dïrïm dere daꞌti ꞌdünggüngün aꞌtur. 6 Ma be ari nunnu a lima ari gwacajidar le ar be elelle gïdïrïmänü, a liru ngwuꞌduru na elelle gwege gwa ru ꞌtur. 7 A be manari a lima elelle giburalu anaku ru gu Ngwaalu buri, a la be ätï acajiding gwüpäng ꞌdidanu, na yïn yidi Gïjï güngün gani Yicu, yinje oyaji kengalu ꞌdar.
8 Manari a lima ari a laꞌti ki, a la dudiyi yigoꞌro yege na ngwujaꞌri ngwanni ngwuru ꞌdidanu ngwaꞌti ngwa ji ꞌdenggeganu. 9 Ma be ari alanga lima ꞌtäjälü ndi ari a liki, nginde gwuru ligor leꞌte pu ngwüdünälü gwunje düdänïjänü na gwunje gaꞌru giyiꞌral ꞌdar yege yanni yiki. 10 Manari a lima ari alanga laꞌti ärrä yiꞌral yanni yiki, gwa ar aniji diꞌduru na ngwujaꞌri ngwüngün ngwaꞌti ꞌdengge.