1 Nyi be bupi gwerre gwerre ndi ari, a bupi ji ngaa otaci Ngwaalingalu ngaa je olenga ngwüjï ngaa je ci yäy ꞌtu gwani ngwüjï ꞌdar, 2 gwani ngweleny, gwani ngwüjï ꞌdar ngwanni ngwümätï yelenya, nunnu ar jalu ꞌdar ladatalu ar elelle elelleng gwanni gwüjïlänü gïdrü ꞌdar didi Ngwaalu na ndi juꞌri ꞌdar. 3 Giyee yijaw aar jada Ngwaalinganu ngwuru Gilang gwege, 4 ngwanni ngwümïnä ngwüjü ꞌdar aar mbuji gilanging aar lenge bebereng gwudi ꞌdidanung. 5 Ndi ari Ngwaalu ngwuru ngweꞌte pu a dartan gidiliganu ndi gwäꞌräjïdï ngwüjü Ngwaalinga le ru deꞌte pu dïjï dani Yicu Kirictu. 6 Gwanni gwümïꞌrïnä nono ligoꞌro lüngün gwani üꞌrälü gwudi ngwüjï ꞌdar. Inggidi nggwee gwuru ngwanni gwuma Ngwaalu geꞌte ngwuji kaji güngün. 7 Yiru giyee yanni yïgäbïcä Ngwaalinga aar nyi be geꞌte nyi ru dïjï durnidu ngwujaꞌri ngwe ngwujaw nyi ru dooꞌra dükäjäär. Nggwondaja ꞌdidanu nggwaꞌti ondaja yiꞌduru nyi ru doorta didi ngwujaꞌri ngwudi ämnï Ngwaalu na ꞌdidanu gwani ngwüjï ngwuru Garany.

8 Äny gwubupa a ngwur ngwaalu ꞌdar alliji ngwuyala ngwujuꞌru aar otaci Ngwaalingalu yigor ye yaꞌti ätï güündänü aar ꞌti ätï garnatinganu. 9 Nyi bupi ꞌto a ngwaw genne ngwureda ngwädï je aar jaꞌrimani nono denya gwe na yaaru. Aaꞌti ngwarri yayu mïcïnï gwe ngwäꞌrü aar genne dab aar genne yiꞌrigara yiꞌri aar genne ngwureda ngwanni ngwuꞌri, 10 aar be manni arri yayu ape gwe yiiru yanni yijaw yanni yädï ngwaw ngwanni ngwaru ngwäpïjä Ngwaalinga yobo. 11 A daw gwugwundi aar enggaci ngwulenge ꞌdengenaja ku. 12 Äny gwaꞌti gwa ämnï ndi daw enggaci duru ya ndi ape yelenya gidurala, ngwube manni gwugwundi. 13 Ndi ari Adam gwuru gwugeꞌtaar gwerre gwerre aar be geꞌta Awang. 14 Na Adam gwäꞌtüdï gwanni gwïdäjäär, a be daw ru dïdäjäär ngwuru danni dinyurtanu. 15 A be ngwaw ngwa gïlängïdïnï linge gwe yïjü manari ngwuma gwuji ämnïng Ngwaalu gwegen, aar ämnï ngwüjü aar juꞌri aar gu üꞌrü.