1 Lïgïꞌrïm londaju gilingenalu ndi ari ngwüdlä ngwänü ngwudi gwodaning, ngwüjï ngwoko ngwoꞌre kay ndi ämnï Ngwaalu ngwa gwuji ngwüꞌrïllä ngwanni ngwuru ngwuꞌduru ngwa gwuji enggacing gwudi ngwujegoꞌrr. 2 Enggaci gwanni gwïndï gu no, gwudi ngwumurꞌtuny gwuru ngwuru gwudi ngwuꞌduru, yigor yegen yima ru yidingol nono ma aar üꞌdïnï lïgä le. 3 Ngwati etaci ngwüjü ndi agu aar je girinya ngwong ngwudi eny ngwanni ngwugeꞌta je Ngwaalu nda je ngwüjï eny ngwanni ngwämnä Ngwaalu aar je lenge yanni yiru ꞌdidanu aar gu caji Ngwaalinga yäy ꞌtu. 4 Ndi ari ꞌdar yanni yegeꞌta je Ngwaalu yijaw, yere yaꞌti ya ꞌdünyïnï ma aar äpïnï ci gwe Ngwaalinga yäy ꞌtu, 5 ndi ari yïgäꞌrïnä ngwujaꞌri ngwe ngwudi Ngwaalu aar gäꞌrïnï otaci gwe Ngwaalingalu.

6 Ma ang enggaci ngwengga yiꞌral giyee, nga gwa ru dïnäd dijaw didi Yicu Kirictu, dïꞌrünïyäär ngwujaꞌri ngwuru ꞌdidanu ngwudi ämnï Ngwaalu na ngwudi enggaci ngwanni ngwujaw ngwanni ngwuma ang gwuji. 7 Aaꞌti ngaa lacajidi ngwüjï ngwe ngwujaꞌri ngwäꞌtüdï lütülütü gwudi drü didi Ngwaalu ngwube ru lütülütü gwati ngwaw ngwuru ngwümäyïn ondaji. Nga be manni ïdïtänï ligoꞌro lunga gïdrü didi Ngwaalu. 8 Ndi ari ïdïtänï gwudi ngwangina gwuru guꞌru, a be ïdïtänï gïdrü didi Ngwaalu gwurana guꞌru ngwujaꞌri ꞌdar, gwani midi gwenene na midi nggwäꞌdï. 9 Ngwujaꞌri ngwee ngwätï ngwäyänü na ngwädï gu ndi aar je ämnï ꞌdar 10 yiru giyee yäpädär gu yiiru ar gu unda ngwäy, ndi ari geꞌtaji gwege gwüjädï Ngwaalu ngwanni ngwumidu, ngwanni ngwuru Gilang gwudi ngwüjï ꞌdar gwece gwece ngindenga lanni lämnä Ngwaalu.

11 Ülädï ngwüjü nga je enggaci yiꞌral giyee. 12 Aaꞌti gäbïcä dïjü dere ndi aar ang calu mireny nunnu nga gwuru damal, nga be ru gora gijaw gidi ngwïkïrïjïn ngwujaꞌri, ndi elelle, ndi ämnï, ndi ämnï Ngwaalu, na ndi juꞌri. 13 Geꞌta ligoꞌro lunga ndi gwuji ülïjïng ngwüjü ngwujaꞌri ngwudi Ngwaalu, ndi ondaci ngwüjü nga je enggaci, ꞌdi nyi ila. 14 Aaꞌti a gwa ïꞌdädänü angidaji gwe gwunga gwanni gwangidacaranga ngwujaꞌri ngwe ngwudi yïjïr anni ma aar ang mbumbunga lidi giꞌdoonga alliji ngwuy nono.

15 Gwuja yiꞌral giyee nga je ärrï, nga je gu gatada ligoꞌro lunga ku, nunnu aar engga ndi ari nga nggwo gwïndädï gweere. 16 Arngana ligoꞌro lunga na ngwujaꞌri ngwïndï kayalu mama. Ündädï gu ngwäy, ndi ari ma gu ru, nga gwa gïlängïdïyï ligoꞌro lunga na ngwüjï ngwanni ngwati ang ꞌdingini.