Ngwujaꞌri ngwanni ngwullu je
Yuwana giꞌra täꞌrïl
Änï kitabanu
Ngwujaꞌri ngwee ngwobla goranu ngwullu je ꞌto mbumbu gwani Yuwana gwuru dooꞌra dükäjäär je. Nginde gwuru gweꞌte gweꞌte gwanni gwullu ngwujaꞌri ngwudi gitab gidi Yuwana giꞌra rom. Ngwüllïjïng je dimaada düngün dani Gayuj (1.1). Yuwana gwujayanu ndi ꞌdingini ndi ari Gayuj gwuru ligor leꞌte pu ndi gwuji gay gidi ngwujaꞌri ngwanni ngwuru ꞌdidanu. (1.3–4).
Yuwana gwürtädï Gayujing ndi ari gwati gendaci ngwïkïrïjïnä guy ngwanni ngwati elellalu ndi ondaci ngwüjü aar je enggaci ngwujaꞌri ngwudi Ngwaalu (1.5). Nginde gworꞌtemaja Gayujing ndi gwuji gora gidi Dïmïtïrï ganni gijaw (1.12). Ngwugirniya kur gani Dïyütrïbüj gwanni gwati ondaji ngwujaꞌri ngwaꞌti ïndï kayalu ating ꞌdonya ndi gwäꞌrï ngwïkïrïjïnä ngwuꞌter (1.9–10).
Yajang yidi ngwujaꞌri
1. Aganni (1.1–4)
2. Ndi gwäꞌrï ngwïrnü (1.5–8)
3. Dïyütrïbüj gwuki ngwäy (1.9–10)
4. Gwuji yiꞌral yanni yijaw (1.11–12)
5. Aganni gwudi mïꞌrä (1.13–15)
1
Aganni
1 Ngwujaꞌri ngwee ngwïndï ꞌdünggüny gwanni gwuru mbumbu, ngwükäcï nje guru giru dimaad düny gani Gayuj gwanni gwati nyi ämnï ꞌdidanu.
2 Gwani dimaad düny, nggwati otaci Ngwaalingalu ndi ari nga jayi nga mbuji lingina lijaw na ꞌto aar ang yiꞌral ꞌdar ïlïjï kayalu anaku lïngïdï nyi gu ndi ari nga nggwo gwujaw gïlïgïꞌrïm. 3 Nggwujayanu gwulleny ndi ꞌdingini ngweengga ngwanni ngwïndï ꞌdanggalu aar nyi ondaci jici gwe gwunga gwani ꞌdiꞌdanu anaku ata gu elelle elelleng gwanni gwuru ꞌdidanu yomon ꞌdar.
4 Yere yaꞌti yanni yati nyi gäbïcï nyi jayi liguri nono ꞌdingining gwüny ndi ari yïjï yüny giyo yati elelle yiꞌral ye yanni yiru ꞌdidanu.
Yuwana gwürtädï Gayujing
5 Gwani dimaad düny, nga nggwo gwujica yiiralu yanni yata je ärrïjï ngwengga ꞌdi ma aar ni ru ngwüjï ngwuru ngwürnü ngwaꞌta je lïngïdï. 6 Ngindenga lima ondaci giꞌdonga gidi Ngwaalu nggee, ämnï gwe gwunga gwanni gwämnä je gwe. Yijaw Ngwaalu ngaa je gendaci guy ngaa je geꞌta kay aar ele gora gijaw.
7 Yiru yani ngwürïny ngwudi Yicu Kirictu ngwügäbïcä je aar ꞌtü poor, aar ꞌdonya ndi geraci ngwüjü guy ngwäꞌtüdï ngwïkïrïjïn. 8 Alanga lanni liru yïjï yidi Ngwaalu, la ar je be gïꞌtïjï yïrnü lanni liru gu no, nunnu ar le apajidi yiiranu yanni yiru ꞌdidanu.
Dïyütrïbüj na Dimitruj
9 Äny gwüllïjä giꞌdonga gidi Ngwaalu ngwujaꞌri ngwee a be Dïyütrïbüj, gwanni gwati mïnï ndi ru giꞌra giꞌra, gwaꞌti ar le ätï apajiding. 10 No, manari nggwuma ila nggwa je be enggaci yiꞌral ꞌdar yanni yärrüng je, gwati nje änïjï nono yiꞌral ye yanni yiki gikidang na yiꞌduru ye yanni yating je ondaji. A be giyee yaꞌti onyadu ꞌdünggüngün, nginde gwati ꞌti ülläjä ngwenggalu yïrnü ating etaci ngwengga ngwanni ngwubupa ndi ülläjï ngwenggalu yïrnü ꞌdunu ꞌdenggen, ating mïnï gay ngwuje linynyi ngwuje ꞌtüyï kiꞌdoonganu.
11 Gwani dimaad düny, aaꞌti nga gwïdïtänï giyiꞌral yanni yiki nga be ïdïtänï giyiꞌral yanni yijaw. Gwanni gwati ärrï yiꞌral yanni yijaw, gwuru gwudi Ngwaalu. Gwanni gwati ärrï yiꞌral yanni yiki gwuma ꞌti änggädï Ngwaalinga.
12 Lonyadu londaja yiꞌral yijaw gidiweengga dani Dimitruj, ꞌdi yiꞌral yanni yiru ꞌdidanu ꞌdünggüngün yinggida ndi ari gwuru dïjï dijaw. Änyängä ꞌto, gwaru nyii gwe yiꞌral yijaw yanni yärrüng je na ngaa lïlïngïdï gu ndi ari yanni yondaji nyii ye gwani nginde, yiru ꞌdidanu.
Mïꞌrä
13 Äny gwätï ngwujaꞌri ngwonyadu nda je üllïjä a be ngwaꞌti ngwa je üllïjä galam ge a yebo ye yidi galam.
14 Äny nggwo gwugeꞌta giꞌto nda je engga, a la be ondaji, nggwa je ondaci ngwäyälü ngwulem ngwe ngwüny.
15 Ara je gu adatalu ji. Ngwumaad ngene, ngwaganna je. Aganna ngwumaada ngeno ngwürïny ngwe.