Ngwujaꞌri ngwanni ngwullu je Bulij
Galatiya
Änï kitabanu
Bulij na Birnaba londaca ngwüjü ngwujaꞌri ngwudi Ngwaalu gïyündär ngwaalu ngwani Galatiya ndi ꞌdïꞌrï gwe gwudi yiiru yegen yïrnü a Ngwüyäwüd na ngwüjï ngwanni ngwäꞌtüdï Ngwüyäwüd ämnï ndi Yicu Kirictu (Yiiru 13.13—14.28). Galatiya gwüjädï ngwaalu ngwucaar je gweneno Türkïyä.
Anni ondaca Bulij ngwüjü ngwujaꞌri ngwämrä kündär gani Ayikuniya, a ngwüjï ngwonyadu ru ngwïkïrïjïn aar be ji lonyadu lanni liꞌdonya ngwujaꞌri ngwudi Bulij. Bulij gwondaca ꞌto ngwüjü kündär gani Lijitra na gündär gani Därbï, yündär giyee yiru yidi ngwüjï ngwuru Garany lati äpïjï ngwaalinga gwudi Rumang yobo (Yiiru 14). Gaji gidi ꞌdïꞌrï yiiru ye yidi gwodaning yidi Bulij, ngwoꞌre mana ngwele gïyündär giyee Galatiya (Yiiru 16.1–4).
A ngwüjï ngwoko ila ngwaalu ngwani Galatiya aar ïnïjï ngwujaꞌri ngwanni ngwondaja je Bulij. Aar ari Ngwïkïrïjïn ngwanni ngwäꞌtüdï Ngwüyäwüd aar üꞌrïꞌtänï aar gwuji yobo yidi Ngwüyäwüd nunnu aar ru ngwïkïrïjïn. Bulij gwullu ngwujaꞌri ngwee nunnu ngwügwäꞌräjä ngwïkïrïjïnä ngwujaꞌri ngwanni ngwondacung je, ndi ari Kirictu gwati gïlängïdïyï ngwüjü ma aar ämnï Ngwaalu ngwuje ätädä yiima aar apajidi yiiru aar ämnäjïdï.
Yajang yidi ngwujaꞌri
1. Bulij gwuru ꞌdidanu dooꞌra dükäjäär je a ngwujaꞌri ru ꞌdidanu ngwükäjäär ngwe (1.1–10)
2. Ngwaalu ngwäbrä Bulijing ngwuru dooꞌra dükäjäär (1.11–24)
3. Bulij gwurucida ngwujaꞌri ngwüngün (2.1–21)
4. Ämnï Ngwaalu gwuru gay ꞌdogo jücü ndi gïlängïdïnï (3.1—4.31)
5. Üktïnï Lïgïꞌrïm le na ämnï gwe (5.1—6.10)
6. Ola gwudi mïꞌrä (6.11–18)
1
Aganni giꞌdonga gidi Galatiyang
1 Ngwujaꞌri ngwee ngwïndï ꞌdünggüny gwani Bulij gwuru dooꞌra dükäjäär, dïjï dere daꞌtiny ükäjü nyi ꞌti ükäjïnä yeleny ye yere yidi dïjï dümnä. A be Yicu Kirictu ru na Ngwaalu ngwuru Papa ngwükäjïny. Ngwanni ngwüꞌdïꞌrïyä Yicungalu giyiꞌranyanu. 2 Änyängä ngweengga ngwe ꞌdar ngwanni ngwämnä Ngwaalu ngwujiiny ngwe ngene.
Lükäcä je ngwujaꞌri ngwee lanni lämnä Ngwaalu liru giꞌdoonga gidi Galatiyang.
3 Ara je gu yïmïꞌrü na adatalu ji gwudi Papa gwuru Ngwaalu na Deleny dege dani Yicu Kirictu. 4 Gwanni gwülïngïdä gu ndi ari gwududiya ligoꞌro lüngün gwani ke gwege nunnu aar nje üꞌrälü gïdïdlänü ndee danni diki anaku bupa gu Papa gwege gwuru Ngwaalu. 5 Ngwa ar je näjï yomonalu pipiꞌriꞌti. Yiru gu.
Mätïnälü ngwujaꞌri ngwanni ngwuru ꞌdidanu
6 Dïlä dalu ndoo didibiyiny ndi ari ngaa lima gatani Ngwaalingalu kïrïny ngwanni gwurnida je yïmïꞌrü ye yidi Kirictu. Ngaa lima gwurla ndi gwuji ngwujaꞌri ngwanni ngwujaw ngwuru ꞌter. 7 ꞌDiꞌdanu ngwujaꞌri ngwanni ngwujaw ngwuꞌter ngwaꞌti. A be yilinginna ndi ari ngwüjï ngwo ngwanni ngwata je gwagilli ngwäy ngwujaꞌri ngwe ngwegen, ngwuru ngwanni ngwümïnü ndi üpïyï ngwujaꞌranu ngwudi Kirictu. 8 A be manari änyängä lima ru gwalla yïꞌrr yidi gerala, liru lima je ondaci ngwujaꞌri ngwere ngwuꞌter ngwujaꞌri ngwanni ngwondacara je gwele, gäbïcär aar gu ꞌtäjï ngwünyü bupud! 9 Anaku aru nyi gu gwele no, nggwoꞌre nggwa gu ari mana manari dïjï dere dima je ondaci ngwujaꞌri ngwuru ꞌter ngwäꞌtüdï nono ngwujaꞌri ngwanni ngwondacara je ngwe ngaa je määtä, gäbïcär aar gu ꞌtäjï ngwünyü!
10 Yiꞌral gweneno yiru nono ndi ari äny gwümïnä ndi aar nyi gwe ngwüjï gwällïnï na aar nyi gwe Ngwaalu gwällïne? Na äny gwümïnä ndi gäbïcï ngwüjü aar jayanu? Adinari nyi jina ndi ari nyi gäbïcï ngwüjü aar jayanu, nggwaꞌti gwadi ru dïnäd didi Kirictu.
Kirictu gwuru gwurnida Bulijing
11 Äny gwümïnä ndi ang lenge, lani ngweengga ndi ari ngwujaꞌri ngwanni ngwujaw ngwondaca je ngwe ngwäꞌtüdï yiꞌral yigeꞌta je dïjï dümnä. 12 Ngwaꞌti nje apu gïdïjï dere na aar nje ꞌti dïjï dere enggacu. Aar be ru ꞌtäälü gwudi Yicu Kirictu.
13 Nga nga liꞌdingina elelle gwe gwüny gwele gwerre gaji ganni gijiny ge ndi gwuji yobo yidi Ngwüyäwüd. Ndi ari awa nggwübüdïyä giꞌdonga nono gidi Ngwaalu ꞌtiꞌtir nyi übïnälü nunnu nyi dudiyi ngwugeradalu. 14 Äny gwuju nyi ru giꞌra gidi yobo yidi Ngwüyäwüd kimaad güny ati nyi ꞌri ligor gwulleny gïdïmüränü didi mbumbunga lüny.
15 A be anni ma Ngwaalu ämnï ndi aar nyi ätä ngwujaꞌri ngwee, anaku geꞌtaar nyi gu ꞌtuꞌtu gilaranu ndi nanni gwüny, aar nyi urnida yïmïꞌrü ye yüngün, 16 ngwujada ndi ꞌtäjä gïjälü güngün ꞌdünggüny ndi ari nyi ätï yiima ndi ondaci ngwüjü ngwanni ngwuru Garany, ngwujaꞌri ngwanni ngwujaw. Nyi ꞌdïꞌrï nyi ꞌti otaca dïjälü dere, 17 nyi ꞌti ändï Üräjälïm ngwooꞌra ngwükäjär je gwerre gwerre ꞌdünggüny. Nyi be manni ꞌdïꞌrï puprang nyi ele ngwaalu ngwani Arabiya. Nyi be aji nyi ꞌdïꞌrï ngenone nyi oꞌre kündär gani Dimajig.
18 A be anni minyi ape ngwüdläyü täꞌrïl (3), nyi ꞌdïꞌrï nyi allu Üräjälïm ndi nyii lingidida Butruj gwe nyi gwe jalu yomon ꞌdï na tudini (15). 19 Nyi ꞌti mbuju ngwoꞌra ngwükäjäär je ngwere, nyi be mbuji ꞌdogo Yagubing gweꞌte pu gwanni gwuru gwenggen gwudi Deleny dani Yicu. 20 ꞌDiꞌdidanu nggwa je ci Ngwaalu ngwuru ngwülïngïdï ndi ari ngwujaꞌri ngwee ngwüllïjä je, ngwuru ngwanni ngwuru ꞌdidanu ngwäꞌtüdï yiꞌduru. 21 Nyi be aji nyi ila giyen yicaar je Jürïyä na Kïlïkïyä. 22 Äny giligoꞌro lüny gwaꞌti linginna giyiꞌdoonga ndi Kirictu yidi Yäwüdïyäng. 23 Ngindenga liꞌdingina ꞌdogo yiꞌral ndi ari, “Gur ganni gübïnä jälü gwele gwerre, nggo gwenene ndi ondaci ngwüjü ämnï gwe Ngwaalu gwanni gwübïnïngälü gwele ngwubupi nding gerajalu.” 24 A je yiꞌral giyee gäbïcï aar ortada Ngwaalinga gwani äny.