Ngwujaꞌri ngwanni ngwullu je
Yagub
Änï kitabanu
Yagub gwuru gwümätï giꞌdonga gidi Ngwaalu Üräjälïm. Ngwube ulli ngwujaꞌri ngwüngün ngwuje ükäcï ngwïkïrïjïnä ngwuru Ngwüyäwüd ngwanni ngwaꞌti ju Yïjïräyïl aar be badalu poor ngwüjänü ngwuru Garany. Enggaci gwudi Yicu gwinggidaar gwe kitabanu nggee gullu Yagub aar ꞌti be utu ngwujaꞌri ngwäyälü.
Ngwujaꞌri ngwudi Yagub ngwinggida olang gwonyadu gwani elelle gwudi ngwïkïrïjïn. Yagub gwaru manari nga gwämnä Ngwaalu, nga gwa ape yiꞌral yeꞌte ndi inggidi ämnïng Ngwaalu gwunga. Ola gwüngün gwïndï gilingenalu. Manari nga gwuru diwayi, aaꞌti nga gwa muli nono! Aaꞌti nga gwa miꞌri ngwuy manari ämnï Ngwaalu gwunga gwuma aar ïdäjï. Aaꞌti güündä ga ang apalu no. Aaꞌti a gwa uti ngwüjänü ngwanni ngwünänü nga be obeda ngwüjälü ngwuru ngwayi. Ärrïjä ngwüjü ngwuꞌter yiꞌral yijaw. Mätï lingla lunga nga mätä amiꞌrang gwunga. Ätädï Ngwaalinga lingina lunga nga gatada lingina lunga ndi bebere gwüngün. Kwudar dijegoꞌrr de. Aaꞌti nga gwa ïrïngïnï yiꞌral ye yanni yadi je ele ndi ärrï. Manari nga gwünänü, gataja ngwuwaya düwä ngwong ngwe ngwunga. Orꞌtemaja nga jayi liguri nga otaci Ngwaalingalu gwani ngwüjï ngwanni ngwümïnä ndi je Ngwaalu gataji düwä.
Yajang yidi ngwujaꞌri
1. Aganni (1.1)
2. Elelle gwudi ämnï Ngwaalu na gwudi bebere (1.2–8)
3. Ngwuwayi na ngwüjï ngwanni ngwünänü (1.9–11)
4. Orꞌtemaji gïdïrbä na ndi ïdäjï (1.12–18)
5. ꞌDingini na ꞌdengenaci ngwujaꞌri ngwudi Ngwaalu (1.19–27)
6. Arngani ngwaalu ngwani uti ngwüjänü (2.1–13)
7. Ämnï Ngwaalu na yiiru yanni yijaw (2.14–26)
8. Mätï yiꞌral yanni yati ar ye ari (3.1–12)
9. Bebere gwanni gwuru ꞌdidanu (3.13–18)
10. Arngani ndi ru dimaad didi ngwüjï gïdïdlä (4.1—5.6)
11. Orꞌtemaji na otaci Ngwaalingalu (5.7–20)
1
Aganni
Ngwujaꞌri ngwee ngwïndï ꞌdünggüny äny gwani Yagub gwuru dïnäd didi Ngwaalu nyi ru dïnäd didi Deleny dani Yicu Kirictu, ngwükäcä je ngaa ru yïïlü yidi Yïjïräyïl ꞌdï na rom (12) lanni gilo libadalu giyenanu yidi ngwüjï ngwuru Garany.
Nggwaganna je.
Mätïnälü ndi mïmïnï nono
Lani ngwänggärï, jayaranu manari dïrbä donyadanu dima je mïmïnnï nono. Ngaa lïlïngïdï ndi ari mïmïnnï nono gwani ämnï Ngwaalu gwalu gwata je gendaci yiima ngaa orꞌtemaji. A orꞌtemaji ape yiiru yüngün ngwuje medaji ꞌdanggalanu nunnu ngaa pe ndi bebere ngaa mbuti aaꞌti ya gu amiꞌrati yere. Manari gwere nggwo ꞌdanggalanu gwamiꞌratu ndi bebere, ngwotaci Ngwaalingalu ngwanni ngwati ätä ngwüjü ꞌdar ligor le ngwuje ꞌti gïꞌtïnïjälü yere yanni yiki, a ya aar je ätädä. Ma be ari gwuming otacalu, ngwuru dïjï dämnä Ngwaalu aaꞌti da ru dïjï daꞌti gätï ligoralu dümïmänü, ndi ari gwanni gwati ümïmänü, gwuru nono dudu didi yaw dati dirun ärälü ngwuye pï gändïkä. Dïjï ndoo aaꞌti da geꞌte ndi ari da mbuji gony gere Gideleny. Nginde gwuru dïjï diru yigoranu rom (2) daꞌti mätïnälü ndi ape ape güngün ꞌdar.
Ngwuwayi na lanni lïnänü
Manari diweengga danni diru diwayi dima aar allijala, ngwïrïngïnï Ngwaalinga ndi allijala gwüngün. 10 A be nginde gwanni gwünänü manari gwuma aar ülläjälü, ngwïrïngïnï Ngwaalinga ndi ülläjälü gwüngün, ndi ari gwadi ele ndi ayi nono ngwududi nono gwele yibobo yidi ngwaꞌri. 11 Ndi ari lingen lati anda a deja büdï a ngwaꞌri ayi nono a yibobo ayi nono aar miꞌriꞌtadalu a jayi gwegen geradalu. Yiru gu yeꞌte yeꞌte ꞌto gïdïjï danni dïnänü, dïjï danni dïnänü da ayi nono da dudi diju ndi ꞌtäjï ngwäy giyiiru yüngün.
Ngwaalu ngwaꞌti ïdäjü dïjü
12 Gwonjacaar gwanni gwuru dïjï dorꞌtemaja dïmïmïnnär nono, nunnu manari dima gwällïnï, da aar giki giꞌriba gidi yeleny gidi midi ganni gima gwe Ngwaalu ci ngwüjü ngwanni ngwati ämnï ngindeng.
13 Ma aar je ïdäjï mbuji, aaꞌti dïjï da ari, “Ngwaalu ngwuru ngwïdäjïny.” Ndi ari Ngwaalu ngwati je ꞌti yiꞌral yanni yiki ïdäjä na ngwati ꞌti ïdäjä dïjü dere. 14 A be dïjï diru deꞌte deꞌte dati amiꞌra gwüngün gwanni gwuki ïdäjï ngwokta ngwïꞌdätïyï. 15 Ma amiꞌra gwanni gwuki mätïnälü, gwati apa keng a ke mung pe, ngwati apa yiꞌrany.
16 Aaꞌti la je dudiyi, lani ngwänggärï ngwämnï nje. 17 Angidaji ꞌdar gwanni gwujaw gwumbutu, gwati üllä ndi Papa gwanni nggwo kerala. Gwanni gwugeꞌta ngwony ngwätï buri kerala. Ngwong ngwee ngwati gwugwurli buri gwegen nono diila a be Ngwaalu ngwati ꞌti gwugwurlu aꞌtur. 18 Gwüjädï ndi aar nje ätädä ngwujaꞌri ngwanni ngwuru ꞌdidanu nunnu ar ngwe lïngïnï ar ru yiꞌra giyiꞌral ꞌdar yanni yigeꞌteng je.
ꞌDinginar ngaa ape yiiru
19 Lani ngwänggärï ngwanni ngwämnï nje, geꞌtar je ngwäy nono giyee, ndi ari a dïjï büdädï ndi ꞌdingini puprang, ngwube geraji länï ndi ondaji na ndi güündä ape, 20 ndi ari güündä gidi dïjï gati ꞌti apu dünïngälü ꞌdidanu gwanni gwümïnä Ngwaalu. 21 Yäy gu no, Gatanar yidiganya mbüny ꞌdar na yere ꞌdar yanni yiki ngaa jïlänü ngaa ämnï ngwujaꞌri ngwanni ngwuma kwüdïnï ꞌdanggalanu ngwanni ngwa je gïlängïdïyï.
22 Aaꞌti ngaa la ꞌdingini ngwujaꞌri ꞌdogo, no ngaa ïdäjï yigoꞌranu yalu. Apar ngwe yiiru. 23 Gwanni gwati ꞌdingini ngwujaꞌri, ngwe ꞌti be apu yiiru, gwuru nono dïjï danni dati ombani ngwäyänü ngwüngün kalmandranu 24 dati ombani lingina lüngün ngwele ngwududanu puprang ndi diwayina ndi ari diru ꞌtaa. 25 A be dïjï danni dati geꞌte yobo ngwäy nono mama, yobo yanni yimbutu yidi gatu linginalu, nggu elada no gwurꞌtal, dati ꞌti dodana ngwujaꞌri ngwanni ngwuming je ꞌdingini, ngwe be ape yiiru ndi aar onjaci giyiiru yüngün.
26 Manari gwere gwuma ci ligor lüngün gwümätï yobo ngwuꞌti be mätï lingla lüngün ꞌdïꞌdäny, nginde gwïdäjä ligoꞌranu lüngün a yobo yüngün yiru ꞌtur. 27 Yobo yanni yati je Ngwaalu ngwuru Papa gwege ämnï ndi ari yijuꞌru aar jayi nono yiru giyee, ndi ombaji ngwumiꞌrunu na ngwedela gïdïrbänü degen, a ndi rime ligoꞌro lidi dïjï giyidigany yidi dïdlä.