Ngwujaꞌri ngwanni ngwujaw ngwullu je
Mätä
Änï kitabanu
Mätä gwati uti dulba anni urnidu Yicu ndi ari ngwugwuji. Aji a Yicu geꞌte ngwuru dooꞌra dükäjäär ngwooꞌranu ngwüngün ngwanni ngwükäjäär je ngwuru ꞌdï na rom (12). Mätä gwullu gitab nggee ngge enggaci Ngwüyäwüd ndi ari Yicu gwuru gwanni Gwubrutaar yelenya. Ngwullu ꞌto ndi ari Yicu gwondaca ngwoꞌra ngwükäjäär je ngwüngün ndi ari aar ele aar ondaci ngwüjü giyen ꞌdar aar gwuji Yicung (Mätä 28.20).
Gwädälü ndi ulli gwüngün dïꞌrïny de didi ngwürïny ngwudi ngwügüürnä ngwanni ngwinggida gilinge ge gidi Yüjïb ganni gïꞌtüdï gu Yicu, ngwoꞌre gïdïgüürnä diru deleny dani Däwüd na dïgüürnä dani Äbräyïm. Ngwujaꞌri ngwanni ngwondaja je ngwïjïr ngwumbutu ndi elelle na enggaci gwanni gwenggaci Yicu ngwüjü. Mätä gwullu yomon yonyadu, “nunnu aar mbuti yidi Deleny yanni yondaja ye ngwïjïr.”
Mätä gwinggida Yicung ndi ari gwuru Deleny ngwuru ꞌto gwanni Gwubrutaar yelenya. Gwuru “Gïjï gidi Däwüd” (Mätä 1.1), ngwuru “Deleny didi Ngwüyäwüd” (Mätä 2.2), na ngwuru “deleny danni dadi ru dooꞌra ngwombaji ngwüjü ngwüngün” (Mätä 2.6). Mätä gwinggida yomonanu yonyadu giyeleny yidi Ngwaalu yanni yima ji gito ndi Yicu (Mätä 4.17). Aar be ji ꞌto yani yeleny yidi Ngwaalu yanni yaꞌtina ju (Mätä 13.37–43). Anni ma Yicu ayi ngwüꞌdïꞌrä, ngwondaci ngwoꞌra ngwüngün ngwuje ci, “Yeleny ꞌdar kerala na gïdïyängälü, yima aar nje ätädä” (Mätä 28.18).
Yajang yidi ngwujaꞌri
1. Ngwügüürnä na lïngïnï gwudi Yicu Kirictu (1.1—2.23)
2. Yiiru yidi Yuwana Almamadan (3.1–12)
3. Nyïnyï na ïdäjï gwudi Yicu (3.13—4.11)
4. Yiiru yidi Yicu Jälïl (4.12—18.35)
5. A Yicu ele Jälïl ngwele Üräjälïm (19.1—20.34)
6. Pï gwudi yeleny na gwudi yiꞌrany yidi Yicu (21.1—27.66)
7. ꞌDïꞌrï na ꞌtädälü gwudi Yicu (28.1–20)
1
Dimooꞌra didi ngwügüürnä ngwudi Yicu
(Luka 3.23–28)
1 Dimooꞌra didi ngwügüürnä ngwudi Yicu Kirictu gïjï gidi Däwüd gwuru gïjï gidi Äbräyïm.
2 Äbräyïm gwanni gwülïngïtï Ijaaging
na Ijaag gwanni gwülïngïtï Yagubing
na Yagub gwanni gwülïngïtï Yäwüdängä je ngwenggen ngwe.
3 Na Yäwüdä gwanni gwülïngïtï Parijing na Jera ndi nanni gwani Tamar
na Parij gwanni gwülïngïtï Ajiruning.
Na Ajirun gwanni gwülïngïtï Raming
4 na Ram gwanni gwülïngïtï Aminadabing
na Aminadab gwanni gwülïngïtï Najuning,
na Najun gwanni gwülïngïtï Jalimuning
5 na Jalimun gwanni gwülïngïtï Buwajing nanni gwüngün gwani Riyab
na Buwaj gwanni gwülïngïtï Obeding nanni gwüngün gwani Räwüj
na Obed gwanni gwülïngïtï Yicing
6 na Yici gwanni gwülïngïtï Däwüdïng gwuru deleny.
Na deleny dani Däwüd gwanni gwülïngïtï Jilimaning nanni gwüngün gwägïnä gwerre kur gani Uriya.
7 Na Jiliman gwanni gwülïngïtï Rabaaming
na Rabaam gwanni gwülïngïtï Äbïyäng
na Äbïyä gwanni gwülïngïtï Ajang.
8 Na Aja gwanni gwülïngïtï Yüjäpädïng.
Na Yüjäpäd gwanni gwülïngïtï Yuraming
na Yuram gwanni gwülïngïtï Yüjïyäng
9 na Yüjïyä gwanni gwülïngïtï Yujaming
na Yujam gwanni gwülïngïtï Aajing
na Aaj gwanni gwülïngïtï Äjäkïyäng.
10 Na Äjäkïyä gwanni gwülïngïtï Manajing
na Manaji gwanni gwülïngïtï Amuning
na Amun gwanni gwülïngïtï Yojeyang.
11 Na Yojeya gwanni gwülïngïtï Yukinayang gwenggen gwe gaji ganni gima je ge güwän gegen apada ken gani Babil.
12 Na anni ma aar ji ken gani Babil,
a Yukinaya lengeta Jälätïlïng
na Jälätïl gwanni gwülïngïtï Jirubabiling.
13 Na Jirubabil gwanni gwülïngïtï Äbïyüdïng
na Äbïyüd gwanni gwülïngïtï Aliyakiming
na Aliyakim gwülïngïtï Ajuring.
14 Na Ajur gwanni gwülïngïtï Jädügïng
na Jädüg gwanni gwülïngïtï Akiming
na Akim gwanni gwülïngïtï Ïlïyüdïng.
15 Na Ïlïyüd gwanni gwülïngïtï Aliyajiring
na Aliyajir gwanni gwülïngïtï Mataning
na Matan gwanni gwülïngïtï Yagubing.
16 Na Yagub gwanni gwülïngïtï Yüjïbïng gwanni gwagu Märïyämïng gwanni gwuma gu Yicu lïngïnï gwanni gwuma aar ci Gwubrutaar yelenya.* 1.16 Ngwürïny ngwani Kirictu Yïgïrïyängä, aar ani Micaya Yïbrïyängä ꞌdün ngwani gwanni Gwubrutaar yelenya.
17 A kimaad ꞌdar ꞌtuꞌtu ndi Äbräyïm ꞌdi ngwobani ndi Däwüd, gimaad giru ꞌdï na kwoꞌrongo (14). Na ndi Däwüd ꞌdi ngwobani kaji ganni gima aar ge apada Ngwüyäwüd ken gani Babil, gimaad giru ꞌdï na kwoꞌrongo (14). Na gaji ganni gima ge Ngwüyäwüd ji Babil ꞌdi ngwobani kaji gidi Yicu gwanni Gwubrutaar yelenya, gimaad giru ꞌdï na kwoꞌrongo (14).
Lïngïnï gwudi Yicu Kirictu
(Luka 2.1–7)
18 A be lïngïnï gwudi Yicu Kirictu gwuru no, gaji ganni gïmïnä ge Yüjïb gaga ndi nanni gwüngün gwani Märïyäm, a Märïyäm mbüjïnï gwuma ji lari le laꞌtina acidu. Lari lïndï Lïgïꞌrïm le lanni Lijuꞌru. 19 A be Yüjïb gwuru dur düngün, gwuru dïjï dïdünälü ngwuꞌti jädï ndi ꞌtäjï Märïyämïngälü nda gu ngwüjï lenge. Ngwugeꞌte yiꞌral giligoranu ndi ari ngwugeꞌte kay nyïm. 20 A be anni mung ïrïyï yiꞌral ngwäy nono, a gïꞌrr gidi Ngwaalu ꞌtäcälü dilingidu ngwuci, “Gwani Yüjïb gïjï gidi Däwüd, aaꞌti yedeny ya ang eny ndi ape Märïyämïng gwuru daw dunga. Ndi ari gwuju lari le lïndï Lïgïꞌrïm le lanni Lijuꞌru. 21 Gwadi lingeta gïjü ga ang ätädä ngwürïny ngwani Yicu, nunnu nginde gwuru gwadi gïlängïdïyï ngwüjü ngwüngün giyiꞌral yegen yanni yiki.”
22 Yiꞌral giyee ꞌdar yiju nunnu a ngwujaꞌri ngwudi Deleny diru Ngwaalu ätï ngwäyänü ngwanni ngwondaja ngwe dïjïr ndi ari, 23 “Guꞌtaar gaji ga ji lari le ga lingeta gïjü giru dur ga aar ätädä ngwürïny ngwani Ämänäwïl.” Ngwani, “Ngwaalu ngwo aar le.”
24 Anni ma Yüjïb ꞌdïꞌrälü giyar, ngwärrï yiꞌral gwani ngwujaꞌri ngwanni ngwuma ngwe gïꞌrr gidi Deleny diru Ngwaalu ci. Ngwape Märïyämïng nggwe ele ꞌdunu ngwuru daw düngün. 25 Aar ꞌti be acidu ꞌdi ngwulingeta gïjü giru dur ngwätädä ngwürïny ngwani Yicu.
*1:16 1.16 Ngwürïny ngwani Kirictu Yïgïrïyängä, aar ani Micaya Yïbrïyängä ꞌdün ngwani gwanni Gwubrutaar yelenya.