1 Ngwuje ci, “Aaꞌti ngaa la obalu ngwüjü ngwe nunnu aaꞌti la ji la je le obalu ꞌto. 2 Ndi ari obalu gwanni gwata gwe obalu ngwüjü ngwe ngwuꞌter, gwuru gwa ara gwe obalu ꞌto na giny ganni gata ge ätä dïjü diꞌter, giru ga ara ge ätä ꞌto. 3 Nga gwarra ati ang be enggadada gwanggalu gamuꞌru gïläy, nga ꞌti be änggädï güüꞌrï gïläy lunga? 4 Na awa nga be ci gwanggalu, ‘Ila ang brota gamuꞌru gïläy,’ a mine güꞌrï ji gïläy lunga yomon ꞌdar? 5 Dimurꞌtuny ndee, gwällï güüꞌrï gïläy lunga gwerre gwerre a gwa be ombajidalu mama ndi brota gwanggalu gamuꞌru gïläy. 6 Aaꞌti ngaa lätädä yinyeno gony ganni gijuꞌru na aaꞌti ngaa lägätïjï ngwüdrä gony ganni giru guꞌru gïdïyängälü. Ga aar roꞌtanu yora ye, na yinyen ya je ye gwurlanu ya je eny.”

7 “Utaralu la je ätädä. Mïnär ngaa la mbuji. Pïdär dïmbürä, la je ïgïtäcälü. 8 Ndi ari gwanni gwati utalu, gwati ape. Na gwanni gwati mïnï gwati mbuji. Na gwanni gwati pï dïmbürä, gwati aar ïgïtäcälü. 9 Gwïndï ne gwere ꞌdanggalanu gwanni gwati gïjï güngün ci, ätädïny gona ngwube ape goꞌrra ngwätädä? 10 Na mung ci, ätädïny duuma, ngwube ape düüngäyü ngwätädä? 11 Ma be ari nga nga lanni liki, lati lenge ndi ätädä yïjü yalu ätäng gwanni gwujaw, ya be ruꞌtana ndi Papa gwalu kerala ndi angidaci ngwüjü yiꞌral yanni yijaw ngwanni ngwati otacalu! 12 Yäy gu no, ärrïjä ngwüjü yiꞌral ꞌdar yanni yati ang jadanu ndi ara je ngwüjï ärrïjï, ndi ari yiru giyee yanni yondaja ye yobo na yïjïr.”

13 “Ändär gïlängïr lanni lïmänü, ndi ari längïr lanni longranu na gay ganni gongranu, giru gay gidi elada ndi dudi. A lonyadu lati gu änï. 14 A be längïr lanni looko lïmänü, liru gay gidi elada ndi midi a looko ꞌdogo liru lanni lati mbuji.”

15 Ngwuje ci, “Arnganar ngwïjïrä ngwanni ngwuru ngwuꞌduꞌru. Ngwata je ïlïjä ngwuru nono ngwangala poor, aar be ru ngwümüd ngïnäꞌdänü ngwuru ngwäärä. 16 Ngwa je lenge yiiru ye yegen. Ngwüjï ngwati aku yügïrï gidibeny na aar aku yimnigora kïꞌrïbe? 17 No, daꞌri danni dijaw dati ꞌriꞌri yuula yanni yijaw na daꞌri danni diki, dati ꞌriꞌri yuula yanni yiki. 18 Daꞌri danni dijaw dati ꞌti ꞌriꞌru yuula yiki na daꞌri danni diki dati ꞌti ꞌriꞌru yuula yijaw. 19 Daꞌri danni dati ꞌti ꞌriꞌru yuula yijaw dati aar üꞌrïdälü aar gatu gïlïgä. 20 No yuula ye yegen, la je lenge.”

21 Ngwuje ci, “Läꞌtüdï ꞌdar lanni latiny urnidi, ‘Deleny, Deleny,’ ladi änï giyelenyanu yidi gerala, aar be ru ꞌdogo lanni lati ärrï yiꞌral yanni yïmïnä je Papa gwüny ngwanni nggwo kerala. 22 Gomon nggäꞌdï, lonyadu liny urnidi, ‘Deleny, Deleny, nyii läꞌtüde lanni londaja yïjïrä ngwürïny ngwe ngwunga, na ngwürïny ngwe ngwunga nyii lïꞌtüyä ngwujegoꞌro na ngwürïny ngwe ngwunga nyii ape yiima yonyado?’ 23 Linje be ondacalu kibeny, ‘Nggwaꞌta je lïngïdï aꞌtur abriiny kayanu gilee lati ape yiiru yiki.’ ”

24 Ngwuje ci, “Yäy gu no, gwere gwanni gwa ꞌdingini ngwujaꞌri ngwüny ngwungwe ape yiiru, diny aniji nono guru gibebera güdädï ngwuꞌduna ngwüngün ngwurꞌdalu. 25 Anni ma gere ni, a däärä onyadi ngwubirta, a dirun ari a dudu obe ngwuꞌduna ngwo yaw ye aar ꞌti ïꞌdü ndi ari ngwodana giyidingo yiru ngwurꞌda. 26 A be gwere gwanni gwa ꞌdingini ngwujaꞌri ngwüny ngwungwe ꞌti be apu yiiru, gwa ru nono guru giru deꞌrr güdädï ngwuꞌduna gwüngün gïdïjïcïrälü. 27 Anni ma gere ni, a däärä onyadi ngwubirta, a dirun ari a dudu obe ngwuꞌduna yaw ye aar ïꞌdï ïꞌdïng gwupa.”

28 Anni ma Yicu medaji ondajing ngwujaꞌri ngwee, a ngwüjï dibi ngwujaꞌri ngwee ngwüngün 29 ndi ari gwondaja gwuru dïjï dätï yelenya yaꞌting je ondaja nono ngworta ngwegen ngwudi yobo.