1 Kaji nggoo a deleny dani Yïrüdïj ꞌdingini ngwujaꞌri ngwudi Yicu. 2 Ngwuci ngwïnädä ngwüngün, “Yuwana Almamadan gwuru nggwäꞌdï gwuma ꞌdïꞌrälü giyiꞌranyanu! Yiru yanni yïgäbïcä a be yiima äpïnï nginde gwe.”

3 Gwerre, Yïrüdïj gwümätï Yuwanang ngwugiki korkon gwani daw dani Yïrüdïyä didi gwenggen gwani Bïlïpüj. 4 Ndi ari gwati Yuwana ci, “Yaꞌti gu jaw ngwäyänü Ngwaalu ndi ang agu.” 5 A be Yïrüdïj mïnï gay gading ge ꞌrinye Yuwanang, a be yedeny eny ngwüjï ndi ari ngwüjï ngwänggädï Yuwanang ngwäyänü ꞌdenggen gwuru dïjïr.

6 A be gaji geꞌte gomon gidi pï käy gidi lïngïnï gwudi Yïrüdïj, a je gera gidi Yïrüdïyä rïtïjï ngwärä. Aar gäbïcï Yïrüdïjïng ngwujayanu gwulleny. 7 Ngwümïꞌrïcï yiꞌrany nding ätädä gony gere ganni ging mïnï. 8 A gera ele ngwondaca nanning gwüngün a nanni gwüngün ïcäjä ngwuci delenya, “Äpïjïny giꞌra gidi Yuwana Almamadan kiꞌramanu nggee.”

9 A Yïrüdïj ümï ligor, a be gwani yiꞌrany yanni yiming je mïꞌrï na gwani ngwïrnü gïyïꞌrïnyïnä yüngün, ngwudinga ngwujaꞌri ndi ari aar ärrïjï gera yiꞌral yanni yïmïnïng je. 10 A ngwüjï üꞌrïdädä Yuwanang giꞌralu gwuju korkon. 11 Aar äpïjä gera giꞌra kiꞌramanu aar ätädä, ngwäpïjï nanning gwüngün. 12 A ngwooꞌra ngwudi Yuwana ila aar apalu aar gatu. Aar ele aar ondaci Yicung.

13 Anni ma gu Yicu ꞌdingini, ngwele jücü ngwallu gïbälükälä ngwugatani ngwaalinga ngwoo ngwele ngwaalu poor. Anni ma gu ngwüjï ngwoo ngwonyadu ꞌdingini, aar ꞌtüdä kündär aar gwujani yora yalu. 14 Anni ma Yicu üllädälü kïmämü, ngwengga ngwüjü ngwonyadu, aar ïnädä ngwuje uꞌriyi dümdï nono degen.

15 Anni ma ngwaalu ru digera, a ngwooꞌra ilaci aar ci, “Ngwaalu ngwee poor, a lingen lima ele. Gätï ngwüjälü aar ele ngwuꞌdunanu aar illa ngwony ngwere ngwudi eny.”

16 A je be Yicu ci, “Yere yaꞌti yani yadi je gäbïcï aar ele. Ätädär je nga nga aar eny.”

17 Aar ci, “Änyängä lätï ꞌdogo yona tudini na ngwuum rom.”

18 Ngwuje ci, “Äpïjï nje ngene.” 19 Ngwuci ngwüjü jaralu giyanyalu. Ngwape yona giyoo tudini na ngwuum ngwoo rom, ngwüꞌdïꞌrïyï ngwäy ngwombajidi kerala ngwuci Ngwaalinga yäy ꞌtu ngwuje üꞌränü. Ngwuje be ätädä ngwoꞌra ngwüngün aar je gegenaci ngwüjü.

20 A ngwüjï eny ꞌdar ꞌdi aar pe. A yanni yima jalu yüꞌrïꞌtïnänü, aar je ürrä giyiꞌramanu aar je ape yiꞌramanu ꞌdï na rom. 21 Ngwüjï ngwanni ngwïtï, ngwuru ngwüüꞌrï tudini (5,000) ngwanni ngwuru ngwur, aar ꞌti be düꞌrädï ngwayu yïjï yänü.

22 Puprang no, a Yicu dinga ngwoꞌra ngwüngün gïbälükänü aar madini aar üꞌrü yaanu aar dambu kïmämü ngene gwe, ngwube geꞌte ngwüjü kay ꞌdar aar ele. 23 Anni mung je geꞌte kay ꞌdar, ngwube allu kenala jücü ndi otaci Ngwaalingalu. Anni ma ngwaalu ru digera, ngwuji ngenone jücü, 24 ngwooꞌra ngwüngün ngwuma be ele bälükä gwe ꞌdi aar obani gidiliganu didi yaw. A be dudu määtä bälükä ngwärälü ndi ari bälükä gwügwümädï dirunanu.

25 Diligeny danu a je Yicu elaca gwïndï giyaala. 26 Anni ma ngwooꞌra ngwüngün engga gwïndï giyaala, a je yedeny eny aar ari, “Giboꞌrr giru.” Aar ari yedenyo.

27 Kaji nggoo no, a je Yicu ci, “Äny gwuru, ara je ꞌti yedeny ïtï.”

28 A Butruj ci, “Gwani Deleny manari nga gwuru, ondaciny nyi ila giyaala ang elaca!”

29 A Yicu ci, “Ila.”

A Butruj üllädälü gïbälükälä ngwele giyaala ngwelada ndi Yicu. 30 A be anni mung engga diruna, a yedeny eny ngwüllï gwadi ïꞌdätï, ngwürrï dula ngwari, “Gwani Deleny gätäjïny yaw.”

31 Kaji nggoo no a Yicu dinga guy ngwümätä ngwuci, “Ämnï Ngwaalu gwunga gwooko, a gwuma arra ma ang ümïmänü?”

32 Anni ma aar allu gïbälükälä, a dirun adatalu. 33 A be gilo liju gïbälükänü aar kwucalu yirku ye aar ci, “ꞌDidanu, nga gwuru Gïjï gidi Ngwaalu.”

34 Anni ma aar ele aar dambu dambal, aar üllälü ngwaalu ngwani Jenjerad. 35 Anni ma ngwüjï ngwudi ngwaalu ngwoo lengeda ndi ari Yicu gwuru, aar ükäjïdï ngwüjï gïyündär yanni yijicidar yalu aar äpïjä ngwüjü ꞌdar ngwanni ngwümä 36 aar päcälü ndi ari ngwuje gäbïcï ꞌdogo aar akani direl nono didi dired düngün, na ngwüjï ꞌdar ngwanni ngwakana nono, aar uꞌri nono.