11
A Yicu änï Üräjälïm yelenya
(Mätä 21.1–11; Luka 19.28–40; Yuwana 12.12–19)
1 Anni ma Yicunga ngwoꞌra ngwe ngwüngün ji gito gito Üräjälïm, aar ila kündär gani Bidbaji na kündär gani Bidaniya Gidotr gidi Ngwümïnïtï, a Yicu ükäjï ngwoꞌra ngwüngün rom 2 ngwuje ci, “Ïndär ngwuꞌdunanu ngwujica je gweere ma aang ji gito ladi änï, ngaa la mbuji gïndüꞌrï giru damal gigekannalu gaꞌti gu dïjï ändälä aꞌtur ngaa gwäꞌdädälü ngaa ge ila ngene. 3 Manari dïjï dere dima je otacalu nu, ‘Ngaa larra ma aang ärrï yiꞌral giyee?’ car, ‘Ginana Deleny ging be gwäꞌrä puprang.’ ”
4 Aar ele aar mbuji gïndüꞌrï giru damal gigekannalu gïlängïr poor anni ma aar ji ndi gwäꞌdälü, 5 a je ngwüjï otacalu ngwanni ngwuju ngwüdünü ngeno, “Ngaa larra ma aang gwäꞌdä gïndüꞌrälü?”
6 Aar je ondaci ngwujaꞌri anaku ca gu Yicu, a je ngwüjï gäbïcï aar ele. 7 Aar ape gïndüꞌrï giru damal aar ge ila ndi Yicu aar gu gillici ngwuredala ngwudi gennala ngwegen a gu Yicu allala. 8 Na ngwüjï ngwonyadu ꞌdïꞌrï aar gilici ngwuredalu ngwegen kayalu a ngwüjï ngwoko üꞌrïꞌtä ngwaaꞌri ngwurunyanu aar je gïlïcïjälü kayalu. 9 Ngwüjï ngwanni ngwumadina na ngwanni ngwïndï gwodan aar ürrï dula aar opepala aar ari,
“A Ngwaalu näjïnï!”*11.9 Ngwujaꞌri ngwee Yïbrïyängä ngwari, “Awosanna” ngwani gïlängïdïyï nje.
“Gwonjacaar gwanni ngwïndï ngwürïny ngwe ngwudi Deleny!11.9 Mäjïmür 118.25–26”
10 “Gwonjacaar gwanni gwïndï yeleny ye yidi dïgüürnä dege dani Däwüd!”
“A Ngwaalu näjïnï kerala!”
11 A Yicu änï Üräjälïm ngwele ngwänï ngwämrä ngwudi gobo. Anni mung ombajidalu ꞌdar, a be lingen lïndï be ꞌdi ngwuru digera, ngwüꞌtü aar ele ngwooꞌra ngwe ngwükäjäär je ngwüngün ngwuru ꞌdï na rom (12) kündär gani Bidaniya.
Yicu na dimnigor
(Mätä 21.18–19)
12 A dilu danu anni mung ji ndi gatani gündärä gidi Bidaniyang, a ngwamu enyanu. 13 Ngwengga dimnigora ngwaalu ngwolanu dinna ngwänï ngwila gwaadi gu mbuji yimnigora, anni mung obani, ngwuꞌti mbuju gony gere ngwube mbuji ngwänï ꞌdogo ndi ari gaji gaꞌtina rüdï gati ge yimnigor ꞌriꞌri.
14 A Yicu ci daaꞌri, “A gwaꞌti ba be gwa ꞌriꞌri aꞌtur ndi aar gu eny yimnigora.” A gu ngwooꞌra ngwüngün ꞌdingini nggu ari no.
A Yicu linynyi ngwüjü ngwämrä ngwudi gobo
(Mätä 21.12–17; Luka 19.45–48; Yuwana 2.13–22)
15 Obanar gu Üräjälïm, a Yicu änï ngwämrä ngwudi gobo ngwümätä ngwüjü ngwanni ngwati illidi ngenone ngwuje linynya ngwügwüꞌrübäjï ngwümbürälü ngwudi üpïyï ngwüꞌrïnyänü na yüüꞌrï yati gu ngwüjï jalu aar ellang amaam 16 ngwümïnïcï dïjü dere ndi üꞌrü ngwämränü ngwudi gobo dapu ngwony ngwudi ngwiliny. 17 A anni mung ji ndi enggaci ngwüjü ngwuje ci, “Yaꞌti üllïnä kitabanu ndi ari,
‘Ngwuꞌdun ngwüny ngwuru
ngwuꞌdun ngwudi otaci Ngwaalingalu ngwudi ngwüjï giyen ꞌdar’11.17 Ajaya 56.7?
Ngwuma je be ruji, ‘ngwubang ngwudi yuꞌram.’11.17 Ärmïyä 7.11”
18 A gu ngwurꞌdal ngwanni ngwuru ngweleny na ngwoorta ꞌdingini ngwujaꞌri ngwee, aar mïnï gay gadi aar ge ꞌrinye a je be yedeny eny ꞌdünggüngün ndi ari ngwüjï ꞌdar ngwuma dibi ngwujaꞌri ngwüngün.
19 Anni ma ngwaalu ru digera, aar ꞌtü aar gatani gündärä.
A dimnigor undi
(Mätä 21.20–22)
20 Dilu danu, aar ji ndi ele kayalu, aar engga dimnigora dima undi ꞌtuꞌtu ngwuuwalu. 21 A Butruj diwayini ngwuci, “Gwani Doorta, ombaja kuni dimnigora danni dïꞌtäjä gu ngwünyü lungge dima undi!”
22 A je Yicu ci, “Ämnär Ngwaalu, 23 nggwa je ci ꞌdidanu ndi ari, manari dïjï dere dima ci geno nggee, ‘ꞌDïꞌrü, gätïnä giyaw,’ ngwuꞌti be ümïmänü giligoranu lüngün ngwube ämnï Ngwaalu ndi ari ngwujaꞌri ngwanni ngwondajing je ngwa gu ru anaku arung gu, ngwa aar je ärrïjï.
24 Yäy gu no nggwa je ci ndi ari yere ꞌdar yanni yada ye otaci Ngwaalingalu, ämnä Ngwaalu ndi ari yima je mbuji na ya ru yunga. 25 Na manari nga gwuma dünälä ndi otaci Ngwaalingalu, manari nga gwümätïjä dïjü dere yiꞌralalu yere giligoranu, düdänïjänü nunnu Papa gwunga kerala gwa ang düdänïjänü ꞌto giyiꞌral yunga yanni yiki. 26 (Ma be ari ngaa lima ꞌti düdänïjä ngwüjänü ndi ke gwegen ꞌdanggalu, ara je mine Papa gwalu gwudi gerala düdänïjänü ꞌto awa ndi ke gwalu ꞌdünggüngün.”11.26 Mätä 6.15)
A Ngwüyäwüd utalu yeleny ye yidi Yicu
(Mätä 21.23–27; Luka 20.1–8)
27 Oꞌre aar obana Üräjälïm, anni ma Yicu ji ndi elellalu ngwämrä ngwudi gobo, a ngwurꞌdal ngwanni ngwuru ngweleny na ngwoorta ngwudi yobo na mbumbunga aar ila ꞌdünggüngün. 28 Aar otacalu aar ci, “Yeleny yïndï ne yanni yata ye ape yiꞌral giyee? Yärü gwanni gwätädä je ꞌdi ngaa ye ape yiiru giyee?”
29 A je Yicu ci, “Nggwa je otacalu ngwujaꞌri ngwe ngweꞌte pu, enggaciny nje nggwa je be enggaci ꞌto ndi ari yeleny yape nje ne yärrïny ye yiꞌral giyee. 30 Nyïnyïnï yaw ye gwudi Yuwana gwïndï Ngwaalu gwalla gwïndï ngwüjï ngwümnä? Ondaciny!”
31 Aar ondajidi aar ari, “Ma ar ari, ‘Gwïndï Ngwaalu,’ gwunje ci, ‘Ngaa mine arra ma aang ꞌti ämnäcä?’ 32 Manari a lima ari, ‘Gwïndï ngwüjï ngwümnä’ ngwüjï ngwunje ꞌdïꞌrä nono.” (A je be yedeny eny ngwüjï, ndi ari ngwüjï ꞌdar ngwümätï ngwujaꞌri ndi ari Yuwana gwuru dïjïr ꞌdidanu.)
33 No, aar gwäꞌräcï Yicunganu aar ci, “Gwaꞌti nyii gwe lïngïdï gwïndï ne.”
A je Yicu ci, “A mine äny ꞌto gwaꞌti gwa je enggaci ndi ari nggwati ärrï yiꞌral giyee yeleny ye yidi yärü.”