1 ꞌTuꞌtu dilu danu, a ngwurꞌdal ngwanni ngwuru ngweleny na mbumbunga na ngwoorta ngwudi yobo na ngwämrä ꞌdar ꞌdïꞌrï aar giki ngwujaꞌri aar gekaji Yicungalu aar ape aar ätädä delenya dani Bilatij.

2 A Bilatij otacalu ngwuci, “Nga gwuru Deleny didi Ngwüyäwüde?”

A Yicu ci, “Yäy, yiru gu anaku ara gu.”

3 A ngwurꞌdal ngwanni ngwuru ngweleny üpäcï yiꞌral nono yonyadu. 4 A no, oꞌre a deleny dani Bilatij otacalu mana ngwuci, “Nga gwäꞌtüdï gwadi ondaji ngwujaꞌri ngwere? Nga gwaꞌti änggädï ngwüjü anaku üpäcärä gu yiꞌral nono giyee yonyado?”

5 Aaꞌti be Yicu ondaja ngwujaꞌralu ngwere ngwulemanu ꞌdi a ngwaalu elalu Bilatij gwe.

6 A läbräjä gu giyomon yidi yïꞌrïnyïnä yegen, ndi ari ati aar je gwäꞌdäcä dïjälü deꞌte pu giyirna danni dibupaar. 7 Gur geꞌte gani Barabaj gijaar korkon ngwüjï ngwe ngwunyurtanu aar ꞌrinyidi ngwüjänü ngwüꞌdïꞌrü yärä.

8 A ngwüjï ngwonyadu allu ndi Bilatij aar otacalu ndi ari ngwuje ärrïjï yiꞌral yanni yati ärrïnï gïdïdlä.

9 A je Bilatij otacalu ngwuje ci, “Ngaa lïmïnä nda je gwäꞌdäcä Delenyalu didi Ngwüyäwüde?” 10 Ndi ari nginde gwani Bilatij gwülïngïdï ndi ari ngwurꞌdal ngwanni ngwuru ngweleny gwätädäär Yicung yïꞌdünyü ꞌdogo. 11 A be ngwurꞌdal ngwanni ngwuru ngweleny gwogaji ngwüjü ndi ari aar bupi Bilatijing gwuru deleny ngwuje gwäꞌdäcä Barabajingalu.

12 Oꞌre a je Bilatij otacalu, “Ngaa lïmïnä nga je ärrïjï ngindeng ange gwanni gwucanga Deleny didi Ngwüyäwüd?”

13 Aar ürrï dula aar ci, “Pädï küꞌrï.”

14 A je Bilatij otacalu, “Ange gwuru yiru ange yanni yärrüng je?”

Aar be ürrï dula gwulleny aar ci, “Pädï küꞌrï.”

15 A je Bilatij gwäꞌdäcä Barabajingalu nunnu aaꞌti la kanu. Ngwube ape Yicung aar pï lacal le aar gwe ele ndi pä küꞌrï.

16 A gwuꞌtulu ape aar gwe änï ngwuꞌdun ngwudi yeleny aar urnida giꞌdu gidi gwuꞌtulu. 17 Aar giki direda duri didi yeleny aar ꞌräjï ngwügä aar je giki kiꞌra nono giꞌriba gidi yeleny. 18 Aar urnidi aar ari, “Agannar Delenya didi Ngwüyäwüd!” 19 Ati aar pï guura ge kiꞌrala aar gwonynya ngwäyänü. Ati aar jürbäjälü aar kwucalu yirku ye. 20 Anni ma aar gu ärrï yïdäpängä ꞌdi aar medaji, aar gwallada direda ndoo duri didi yeleny, aar be giki ngwureda ngwüngün aar okta aar gwe ele poor ndi pä küꞌrï.

21 A gur geꞌte ngwaalu ngwani Giruwan gani Jamaan giru mbumbu gwudi Älïjïkändär na Räbüj gïndï ꞌdunu gadi ele kündär, aar üpïyï güüꞌrï yiima ye. 22 Aar apa Yicung aar gwe ila ngwaalu ngwani Jüljüjä, ngwani ngwaalu ngwudi guya gidi giꞌra gidi dïjï. 23 Aar be ätädä diꞌrica dïlägänänü ngwuuwa ngwe ngwuꞌri nunnu ngwuje ïyï ngwuje be ꞌdonya. 24 Aar pä küꞌrï. Aar gigini ngwuredanu ngwüngün aar je ape aar je gu gatada yuꞌru nunnu aar ombaji ngwanni ngwadi je dïjï ape.

25 Gaji ganni gima aar ge pä Yicung küꞌrï, lingen lïndï be ꞌdi ngwuru tudini kwoꞌrongo (9) dilu danu. 26 Yiꞌral yanni yigekejajaar gu yullaar je küꞌrälä yaru nu, DELENY DIDI NGWÜYÄWÜD.

27 Aar je pä gïyüꞌrï ngwuꞌram ngwe rom. Deꞌte kaama na deꞌte kängïr. 28 (No a ngwujaꞌri ngwanni ngwüllïnä kitabanu aar ätï ngwäyänü ngwanni ngwaru, “Gwuma aar äcïdï ngwuꞌram ngwe.”) 29 A ngwüjï ngwanni ngwumillidu kayalu nggoo lo, aar ci yiꞌra kwoꞌroꞌdong, “Yäy ꞌda! Nga gwanni gwaru a gwa kiyi gobo nga be ꞌdïꞌrïyälü giyomon täꞌrïl, 30 üllädälü küꞌrälä nga gïlängïdïyï ligoꞌro lunga!”

31 A gu ngwurꞌdal ngwanni ngwuru ngweleny na ngwoorta ngwudi yobo ondaji yïdäpängä ꞌto aar ari, “Nginde gwügïlängïdïyä ngwüjü ngwuꞌter a be ligoꞌro lüngün, ngwuꞌti be burna ndi gïlängïdïyï. 32 Nggwee Gwubrutaar yeleny, Deleny ndee didi Yïjïräyïl, ngwuꞌdi üllädälü gweneno küꞌrälä aar engga nunnu ar gwe ämnï!” A ngwuꞌram ngwoo rom ngwüpädäär je ngwe gïyüꞌrälä, lo ꞌto.

33 Gilingen lïdünälä, a dïrïm elalu mogeny ken ꞌdar ꞌdi a lingen ele ngwuru täꞌrïl (3). 34 Anni ma lingen ele ngwuru täꞌrïl (3), a Yicu geꞌte dula gwulleny ngwari Yärmïyängä, “Eloye, Eloye, lama jabaktani.” Yani ndi ari, “Ngwaalu ngwüny, Ngwaalu ngwüny, a gwuma arra miny gatani?”

35 Anni ma ngwüjï ngwoko ngwanni ngwuju ndi dünï ngeno gito gito ꞌdingini ngwujaꞌri ngwe, aar ari, “ꞌDinginar, nginde gwurnida Ïlïyäng.”

36 A gur geꞌte gwalajanu ngwapa lïbä ngwurtiyi giyaanu yula ngwugekaji gidirula ngwudingaci nunnu ngwïyï. Ngwari, “Gäbïcär ꞌdi gwenene ar engga manari Ïlïyä gwadi ila ngwülläjälü.”

37 A Yicu geꞌte dula gwulleny a lïgïꞌrïm ꞌtü ꞌdünggüngün.

38 A dired didi gobo danni dati ji gidiliganu, ngwüdïrïtïnänü ꞌtuꞌtu allu nggwe ꞌdi ngwobani koralu ngwuranu rom.

39 Anni ma kumndan gidi gwuꞌtulu küüꞌrï tudini (100), gïdünäcä Yicungalu engga Yicung gwugeꞌta dula ngwengga gwayu awa, ngwari, “ꞌDidanu gur nggee giru Gïjï gidi Ngwaalu!”

40 Ngwaw ngwoko ngwuju ꞌto ngeno aar dünï ngwaalu ngwolanu ndi ombajidi. Märïyäm gwani Mäjïdälïyä gwuju na Märïyäm nanni gwudi Yagub gwanni gwookana na Yüjä, na Jälümä. 41 Lanni ligwujana Yicung ngwaalu ngwani Jälïl ati aar äpïjï yiiru. A ngwaw ji ngwonyadu mana ngwanni ngwïndäär le aar elada Üräjälïm.

42 Digera dalu ndoo, gomon giru gidi Jaꞌrimani (gomon giru gidi gweneng a be bïgänü gwudi gomon Kwoꞌra täꞌrïl). No anni ma gaji ila gadi ru digera, 43 a Yüjïb gwudi Ramang ila gwuru dïjï dïdïnyädäär ngwämrä ngwudi Ngwüyäwüd nginde gwuru dïjï dïdünïcä yelenya yidi Ngwaalu ngwuꞌranu ngwüꞌdïꞌrï ngwele ndi Bilatij gwuru deleny ngwuci gwunana ngwangina ngwudi Yicu. 44 A Bilatij allalu ndïr ndi ꞌdingini ndi ari Yicu gwuma ayi be. Ngwurnidi kumndan gidi gwuꞌtulu küüꞌrï tudini (100) ngwotacalu ndi ari manari Yicu gwuma ayi be. 45 Anni ma kumndan ondaci ndi ari yiru gu, ngwügäbïcïjï Yüjïbïng ngwangina ngwuje ape. 46 A Yüjïb illa direda diru lari diyang ngwülläjä ngwanginalu ngwudi Yicu küꞌrälä ngwuje pä direda nono aar änïjï gidimomanu dïpïdäär koꞌrr. Ngwüdätïꞌrïyä goꞌrralu gipa ngwügwüꞌrübä kïyï gidi dimomo.

47 Märïyäm gwani Mäjïdälïyä na Märïyäm nanni gwudi Yüjä lenge ngwaalinga ngwanni ngwuma aar gu geꞌte Yicung.