18
Ïꞌdï gwudi Babil
1 Anni ma yiꞌral ele giyee, nyi be engga gïꞌrrä giꞌter güllü kerala gätï yelenya yipa a buri gwudi näjï gwüngün oꞌrra dïyängälü. 2 Ngwurnidi dulu de gwulleny ngwari,
“Gwuma ïꞌdï! Babil gwanni gwupa gwuma ïꞌdï!
Gwuma ru ngwuꞌdun ngwudi ngwujegoꞌrr
a gwuma ru ngwubang ngwudi ngwüꞌrïllä ꞌdar
na yïꞌrä yanni yïrngü yiru yïläng.
3 Ndi ari ngwüjï giyen ꞌdar ngwïyü diꞌrica
didi amiꞌra gwudi yïjïn yüngün.
Ngweleny ngwudi dïyängälü ngwucidaar ngwe,
na ngwüjï ngwanni ngwati illidi ngwudi dïyängälü ngwünänü
ïrälü gwe gwudi ubanu gwüngün.”
4 Nyi be ꞌdingini dula diꞌter mana kerala ngwari,
“ꞌTüdär gu lani ngwüjï ngwüny
nunnu aaꞌti ngaa lacajidi ndi ke gwüngün
ara je dimdi mbuji.
5 Ke gwüngün gwuma gendadi ꞌdi gwuma obana kerala,
a Ngwaalu ngwaꞌti dodana gimra güngün ganni gapung.
6 Ärrär gu anaku ärrä je gu rerajar manni mama gwani ärrï gwanni gwärrärä je
na giny ganni gïcärä je, ïcär gu yomonanu rom.
7 Ängïꞌrïyär ngwäy nga runiyi
anaku näjïng gu ligoꞌro lüngün ngwarri yayu
ndi ari dica ligor lüngün nu,
‘Äny gwujalu gwuru daw diru deleny
nggwaꞌti rüdï dedel a runi gwaꞌti gwunyi mbuji aꞌtur.’
8 Yäy gu no, gwa dimdi ndee mbuji gomon geꞌte pu,
yiꞌrany, runi, ngwamu na da üꞌdïnï lïgä le,
ndi ari Deleny diru Ngwaalu ngwanni ngwureraja, ngwuru yiima.”
9 Gwa ngweleny arada ngwudi dïyängälü gwa aar rünïjï ngwanni ngwümïꞌrïdäär ngwe ngwäyänü aar ngwe acidi giyayu yüngün ma aar engga dïlü didi uꞌdi gwüngün. 10 Ngwa dünï ngwaalu ngwolanu yedenyo ndi angiꞌri ngwäy gwüngün ngwari,
“Wäjäj bi! Wäjäj bi gwani güündär ganni gipa,
Gwani Babil, gwuru güündär giru yiima!
Kaji geꞌte pu geradalu gwunga gwuma ji.”
11 Gwa ngwüjï arada gwa aar rünjï ngwanni ngwati illidi ngwudi dïyängälü, ndi ari ngwong ngwudi ellang ngwaꞌta be ngwa je dïjï dere ellang 12 ngwong ngwanni ngwuru dab na buta na yiꞌrigar yiru yoꞌrr na yoora yiru yoꞌrr na ngwured ngwuju miꞌreny, ngwuranu diꞌroker aar ru arir na ngwanni ngwuri, yüꞌrï yanni yami düwä, na ngwong ꞌdar ngwanni ngwügïꞌtïnä yojeꞌrr ye yiru ngwad ngwudi ngwungur na ngwanni ngwügïꞌtïnä yüꞌrï ye yiru ngwumra, na ngwanni ngwügïꞌtïnä buta gwe na ngwanni ngwügïꞌtïnä ngwaaba ngwe na ngwanni ngwügïꞌtïnä yimur ye, 13 na ngwong ngwuru ngwuuwa ngwanni ngwami düwä, na ngwong ngwuru yilun, ngwuuwa, na gwuduꞌrul, ngwong ngwuru diꞌrica na yila yidi yïmïnïtï, ngwülä ngwanni ngwujuꞌru, na ngwudi yon na goola giru yooꞌra, na ngwumirta na ngwürïmbïl, ngwïnäd na ngwüjï ngwumidu.
14 Ngwadi ari, “Yima ang doda yanni yämïꞌrädï ligor lunga, nänü ꞌdar na arri yelenya ꞌdar yima ang abri ngwäyälü na yaꞌti ya je mbuji.” 15 Na ngwüjï ngwanni ngwati ella ngwony ngwee aar ngwe nänü, ngwa dünï ngwaalu ngwolanu yedenyo gwudi yiꞌrendeny yüngün ngwa ari ngwa runi 16 na ngwari,
“Wäjäj bi! Wäjäj bi! Gwani gündär ganni gipa,
gigenna ngwureda ngwuju miꞌreny, ngwuranu diꞌroker aar uuri,
ngwugenne dab nono, ngwugenne yiꞌrigara na yoora!
17 Yeleny giyee ꞌdar, kaji geꞌte pu, yima aar je gerajalu.”
Na ꞌdar lanni liru yiꞌra yidi ngwübälükä na ngwüjï ngwanni ngwati ele ngwübälükä ngwe na lanni lati ruyi ngwübälükä na ngindenga ꞌdar lanni lati mbuji enying bile gwe giyaanu, la dünä ngwaalu ngwolanu, 18 ma aar engga dïlü lidi uꞌdi gwüngün ngwürrï dula ngwari, “Gündär gïndï ne giru nono gündärä nggee gipa.” 19 Na la ürränï dïyäng giyiꞌrala yegen la ari la runi la ürrï dula la ari,
“Wäjäj bi! Wäjäj bi! Gwani gündär ganni gipa!
Lanna ꞌdar lanni lätï ngwübälükä giyaanu
lanni lima nänü goola ge güngün!
Kaji geꞌte pu ꞌdogo gima aar gerajalu!
20 Jayanu gwani gere!
Jayaranu lanni lijuꞌru na ngwooꞌra ngwükäjäär je na ngwïjïr!
Ndi ari dima de Ngwaalu obalu anaku ärrär je gu.”
21 A gïꞌrr gojema nono apa goꞌrralu gipa giru nono lille ngwugatu giyaanu ngwari,
“Yiima ye giyee no,
gündär gidi Babiling ganni gipa ga aar gu gatu no
gaꞌti ga mbüjïnï ba be.
22 Deelnga didi ngwüjï gwanni ngwati mïꞌrï ngwümbärä lanni lati elnge na ngwüjämbïr
na lanni lati ärï yuulla na lanni lati ärï yiil,
laꞌti la aar je ꞌdingini ꞌdunggunga mana aꞌtur.
Dïjï didi yiiru yere
daꞌti da mbüjïnï ꞌdunggunga mana aꞌtur.
Aranu gwudi ngwaaba ngwürüdï
gwaꞌti gwa ꞌdïngïnïnï ꞌdunggunga mana aꞌtur.
23 Buri gwudi lamba gwaꞌti gwa enyanu ꞌdunggunga mana aꞌtur.
Dïïyä didi gur gagu na gera gägïnä
daꞌti da ꞌdïngïnïnï ꞌdunggunga mana aꞌtur.
Ngwüjï ngwunga ngwanni ngwati illidi ngwuru ngwüjï ngwupa gïdïdlä.
Yuꞌriny ye yunga yüktä ye ngwüjü ꞌdar giyen aar je dudiyi.
24 ꞌDunggunga, yïn yïrädï gwälü yidi ngwïjïr na yidi ngwüjï ngwujuꞌru
na ꞌdar lanni lïꞌrïnyïtäär je gïdïyängälü.”