Ngwujaꞌri ngwanni ngwullu je Bulij
Tïtüj
Änï kitabanu
Tïtüj gwuru dïkïrïjïn diru damal ngwuru dïjï diru Garany. Gwapaar Bulij gwe yiiru ndi ondaci ngwüjü ngwujaꞌri ngwanni ngwujaw (2 Küründüj 7.6–7; Galatiya 2.3). Tïtüj gwuju ngwaalu giyaanu ngwani Kïrïd ndi geꞌte ngwüjü aar ru yiꞌra yidi yiꞌdoonga yidi Ngwaalu. A be Bulij üllïjï ngwujaꞌri ngwee ngwudiwayiniyi yiꞌral ye yïbüpïnä nda je dïjï diru giꞌra gidi giꞌdoonga gidi Ngwaalu ätï, na ndi ari yiru ange yanni yading je enggaci ngwïkïrïjïnä ngwuru yimaadanu rung rung.
Bulij gwülädï Tïtüjïng ndi ondaci ngwïkïrïjïnä aar adatalu aar gäbïcï garnating na üꞌrïꞌtïdänü kiꞌdoonga gidi Ngwaalu. Ngwugirinya Tïtüjïng ꞌto gwani ngwoorta ngwuru ngwuꞌduru ngwanni ngwududiya ngwüjü ngwonyadu ngwujaꞌri ngwe ngwanni ngwäꞌtüdï ꞌdidanu. Ngwujaꞌri ngweꞌte ngwanni ngwuru gora ngwügwäꞌrïꞌtäjï je Bulijalu ngwujaꞌranu ngwee ngwullung je ku, ngwani “Ärrï yiꞌral yanni yijaw.” Ngwondaci Tïtüjïng ngwulenge ndi ari a elelle gwüngün ru gora gijaw ngwïkïrïjïn ngwuꞌter aar gwuji.
Yajang yidi ngwujaꞌri
1. Änï ngwujaꞌranu na aganni Tïtüjïng (1.1–4)
2. Ola gwani lanni liru yiꞌra yidi giꞌdoonga (1.5–16)
3. Yiiru yidi dïjï deꞌte deꞌte kiꞌdu kiꞌdoonga gidi Ngwaalu (2.1–15)
4. Ärrï yiꞌral yanni yijaw (3.1–11)
5. Mïꞌrä gwudi aganni (3.12–15)
1
1 Ngwujaꞌri ngwee ngwïndï ꞌdünggüny äny gwani Bulij gwuru dïnäd nyi ru dooꞌra dükäjäär didi Yicu Kirictu lükäjïny ndi gataji ngwüjü düwä ndi ämnï Ngwaalu ngwanni ngwäbrä je Ngwaalu. Na ndi nje enggaci aar bebere giyiꞌral yanni yiru ꞌdidanu yanni yati nje apada gïdrü didi Ngwaalu. 2 Ämnï Ngwaalu nggwee na bebere nggwee nggwo ndi geꞌtaji gwudi midi gwudi gwurꞌtaling, gwanni gwaru gwe Ngwaalu ngwanni ngwäꞌtüdï diꞌduru, ꞌtuꞌtu anaku ädï gu gajalu. 3 Na gwani gegeꞌte gwe yaji ngwapa ngwujaꞌri ngwüngün ngwuje ꞌtäjälü giburalu ondaji gwe ngwujaꞌri ngwanni ngwujaw ngwätädäär nje ükäjï gwe gwudi Ngwaalu ngwuru Gilang gwege.
4 Ngwükäcï nje Tïtüjïng gwuru gïjï güny ꞌdidanu ämnï gwe Ngwaalu gwege.
Ara gu yïmïꞌrü na adatalu ji gwudi Ngwaalu ngwuru Papa na Yicu Kirictu gwuru Gilang gwege.
Yiiru yidi Tïtüj ngwaalu ngwani Kïrïd
5 Yiꞌral yanni yïgäbïcïny nga be gatana ngwaalu ngwani Kïrïd, gwani Tïtüj, yiru ndi ari nga gegeꞌte yiꞌral mama yanni yaꞌti medana nga geꞌte mbumbung je giyiꞌdoonga yidi Ngwaalu gïyündär ꞌdar anaku enggaca gu. 6 A mbumbu ru gwanni gwujaw nono, ngwuru dur didi daw deꞌte pu, a yïjï yüngün ru yanni yämnä Ngwaalu aaꞌti ya ye ngwüjï ondaji ndi ari yiki drü aar nyurtanu. 7 Anni ätädäär dangida yiiru yidi Ngwaalu, ngwube ru dïjï danni jaw nono, aaꞌti da piyi ligoꞌro lüngün, ngwuꞌre ngwäy. Aaꞌti da ru dïjï dati rlälï, ngwuru däärä, aaꞌti da übïjï bilenganu gwudi yuꞌram. 8 Ngwube ru dïjï didi yïrnü, ngwämnï yiꞌral yanni yijaw, ngwümäätä ligoꞌro lüngün, ngwüdünälü, ngwujuꞌri, ngwujayi drü. 9 Ngwümätïnälü ꞌdïꞌdäny ngwujaꞌri ngwanni ngwädï ꞌdidanu anaku enggacaar je gu, nunnu ngwätï yiima ngworꞌtemaji ngwüjü ngwuꞌter ngwujaꞌri ngwe ngwïndï kayalu nunnu aar dünäjï ngwüjü ngwanni ngwübïnä ngwujaꞌralu ngwanni ngwïndï kayalu.
10 Ndi ari gilo lonyadu linyurtanu, lati dudiyi ngwüjü ngwujaꞌri ngwe ngwuru ꞌtur, gwece gwece ngindenga lanni lati ari a ngwüjï üꞌrïꞌtänï. 11 Längïtäjär je ngwünyü ngwudi ngwulem ngwegen, ndi ari ngwujaꞌri ngwe ngwegen ngwuma geraji ngwüjälü ꞌdar giyubanu ngwujaꞌri ngwe ngwegen ngwanni ngwaꞌti ïndï kayalu nunnu aar gu bila giyuꞌram. 12 Dïjïr deꞌte degen dondaju ngwari, “Ngwüjï ngwudi Kïrïdïng ngwuru ngwuꞌduru giyomonalu ꞌdar, ngwuru nono ngwäng ngwudi pooring ngwuki drü, aar ru ngworony, aar ubi ngwamanu.” 13 Ngwujaꞌri ngwee ngwaru ngwe dïjïr degen ngwätï ngwäyänü. Yäy gu no, rïmïtï je gwälü gwulleny, nunnu a ämnï Ngwaalu gwegen ele kayalu 14 aaꞌti la ji ndi geraci lütülütü gwudi dïmürä didi Ngwüyäwüd ngwänï na ngwujaꞌri ngwudi ngwüjï ngwanni ngwati obe ngwujaꞌri gora ge ngwanni ngwuru ꞌdidanu. 15 Ngwüjï ngwanni ngwujuꞌru, ngwong ꞌdar ngwujuꞌru ꞌdenggen, a be ngwüjï ngwanni ngwuki ngwaꞌti ämnä Ngwaalu, yaꞌti yere yijuꞌru ꞌdenggen. ꞌDidanu, yaꞌrany na yigor yegen yiki. 16 Ngindenga lati ari lïlïngïdï Ngwaalinga, a be yiiru yegen inggidi ndi ari ngwaꞌti aar je lïngïdï. Ndi ari ngindenga liki ngwüjü ngwäy, linyurtanu laꞌti ädï giyiꞌral yere yanni yijaw.