1 Diwayiniya ngwengga ndi ari aar ꞌdengenaci ngwelenya, a lanni lati ruyi yelenya aar je ꞌdengenaci, aar ji ꞌdïꞌdäny ndi ärrï yiꞌral yanni yijaw. 2 Aaꞌti la lo dïjü dere ngwujaꞌri ngwe ngwanni ngwuki a be adatalu ji, a ätäjïdï guꞌru ji, a jïlï ji ꞌdidanu ngwüjï ꞌdar.

3 Ndi ari gwerre ꞌto a liru ngweꞌrr ar nyurtanu, aar nje dudiyi, aar nje yamil na amiꞌra ꞌdar ruji ngwïnäd. Ar ru ngwuꞌrinya, ar ru ngwüꞌdüny, a nje ngwüjï ke ngwäy ar kajidi ngwäy. 4 A be anni ma jayi liguri gwudi Ngwaalu ngwuru Gilang gwege na ämnï gwüngün gwanni gwämnï nggwe ngwüjü ꞌtädälü, 5 ngwuminje be gïlängïdïyï. Gwaꞌti nje gïlängïdïyä gwani dünälü gwere gwärrär, aar be ani ïnä gwüngün. Ngwuminje be gïlängïdïyï uyi gwe keng gwege gwani lïngïnï mana gwanni gwuyang aar nje gwäꞌräjälü liyang Lïgïꞌrïm le 6 lanni Lijuꞌru lanni lima aar nje bäläjä nono Yicu Kirictu gwe gwuru Gilang gwege. 7 Nunnu anni ma aar nje dünïyälü yïmïꞌrü ye yüngün, gwuma ar le emadi giyuꞌrinanu na ndi geꞌtaji gwudi midi gwudi gwurꞌtaling. 8 Ngwujaꞌri ngwee ngwuru ꞌdidanu. A nggwubupanga nga pälü ngwujaꞌri ngwe ngwee, nunnu a ngwüjï undi ngwäy ngwanni ngwuma ämnï Ngwaalu aar arngani yigoꞌro yegen aar je geꞌtaji ndi ärrï yiꞌral yanni yijaw. Yiꞌral giyee yijaw aar ru bile gwudi ngwüjï ꞌdar.

9 Nga be gatani garnating gwudi yeꞌrr na ngwujaꞌri ngwani utiti ngwügürnä ngwürïny, garnati na kadadi giyobo yidi Ngwüyäwüd, ndi ari yiꞌral giyee yati ꞌti apu bileng gwere aar be ru ꞌtur. 10 Gwanni gwati dugidiyi ngwüjü, gïrïnyädï gwene nga oꞌre nga girinya mana. Nga be gäbïcï aaꞌti gwa gwe apajidi yiꞌral yere. 11 Nga gwa gu lenge ndi ari dïjï danni diru gu no, didudu dima ke, dima obalu ligoꞌro le lüngün.

12 Manari nggwuma ang ükäcä Artemajing walla Tiyakuj no, aaꞌti be nga gwerne ndi nyi ïlïjä puprang kündär gani Nikupulij. Ndi ari äny gwuma ari nggwa ji ngenone digo de. 13 Ju ꞌdïꞌdäny giyiꞌral ꞌdar nga gataji Jinajing düwä gwanni gwurucida na Abulujing gïdïlä degen nga je ombaji ndi ari gilo limbuju yiꞌral ꞌdar yanni yibupaar je. 14 Lanni gilo lacajidar le, aar lenge ndi gwuji yiiru yanni yijaw aar ye gataji ngwüjü düwä ngwanni ngwaꞌti ätï nunnu aaꞌti elelle gwegen gwa ru gwudi yamiꞌri.

15 Lanni gilo nyii le ngene ꞌdar, lagannaga. Aganna ngwumaada ngwege ndi ämnï Ngwaalu. A yïmïꞌrü ji ꞌdanggalu ꞌdar.