1 Jö Tecalonika
Köp na tye ï buk ka Jö Tecalonika më acël
Tecalonika onwongo obedo pacö na dit më lobo Macedonia na tye ï thë löc ka jö Roma. Paulo onwongo jö n'oye Kiricito ï kabedo nön kinge na ën öwëkö Pilipi. Cücüth kinge, pyem obedo tye ï kin Eyuda na tye gïnï kï cwiny na rac ï kom tïtö köp ka Paulo both jö na ba obedo Eyuda n'onwongo tye gïnï kï miti më lökërë ï dini k'Eyuda. Ëdïö Paulo më yaa ökö kï ï Tecalonika më cïdhö yo Berea. Kinge na dong ën othuno ï Korinti, Paulo onwongo köp kï both awodhe Timoteo na ën tio ködë ï kom köp na tye both jö n'oye Kiricito na tye ï Tecalonika.
Waraga ka Paulo më acël both jö Tecalonika onwongo ëcöö më cükö cwiny ëka më nïangö jö n'oye Kiricito na tye kunön. Ën mïö pwöc pï emuth ï kom yeegï ëka mar; Paulo po wigï ï kom kwö na ën ökwö ködgï ï karë na ën tye bothgï, ëka kï gamö peny n'onwongo tye both jö n'oye Kiricito na makö köp më dwogo ka Kiricito. Paulo ökwanyö karë ni më kobo nïgï më mëdërë kï tic anyim nakun kürö gïnï dwogo ka Kiricito kï gen.
1
1 Waraga ni öya kï both Paulo gïn kï Cilibwano*Cilibwano Baibul nökënë cwodo nï Cila. ëka Timoteo,
Both jö n'oye Kiricito na bedo gïnï ï Tecalonika na gïn ënë jö k'Obanga Apap ëka jö ka Rwoth Yecu Kiricito:
Kïca ëka kuc obed kodwu.
Yee ka jö Tecalonika
2 Wan ëmïö Obanga pwöc jwijwi pïrwu kïbëc nakun wan epo pïrwu ï lëgawa. 3 Wan epo kite na un iketho kï yeewu ï tic ï nyim Obanga Apap onu, ëka kite na un iyelere kï mar kanya acël kï kite na un ïdïö unu kï cwinywu, pï genwu ï Rwoth onu Yecu Kiricito.
4 Utmegowa n'Obanga marö, wan engeo nï Obanga öyëröwu dong ökö, 5 pïën Emuth na Bër na wan ëtïtö bothwu, ba ïgamö unu kï köp këkën ëntö kï tëkö ëka kï Tipo Naleng, nakun ödönyö na thuth ï cwinywu. Un ingeo na bër kite na wan ebedo ködë bothwu më könyöwu. 6 Un ibino iporo unu kitewa ëka kite ka Rwoth; kadï bed inwongo unu can na thwönë rwök, un ïgamö unu köp mërë kï yom cwiny na Tipo Naleng ömïö. 7 Man ömïö ïdökö unu apor na bër both jö kïbëc n'oye Yecu na tye gïnï ï Macedonia ëka Akaya. 8 Köp ka Rwoth owinyere pathï ï Macedonia ëka Akaya këkën— ëntö köp ï kom yeewu ï kom Obanga owinyere örömö kanya kïbëc. Pï manön wan ba dökï ërömö kobo gin mörö ïë, 9 pïën jö nön kïbëc odwongo köp ï komwa kite na un ïjölöwa ködë. Gïn thon okobo kite na un ïlökërë ködë both Obanga nakun ïwëkö unu wörö cal jwogi pï tio tic n'Obanga na kwö ëka n'adyer, 10 ëka më kürö dwogo ka Wode kï ï polo, na ën ocero kï ï kin jö n'öthöö—Yecu, n'ölarö onu kï ï akëmö k'Obanga na tye ka bino.