27
Keno tyër ï wi Kidi Ebal
1 Muca ëka edong më Icarael okobo gïnï both jïï nï, “Gwök unu cïk ni kïbëc na an tin atye ka mïöwu. 2 Ï nïnö na un ibino ngölö kï kulo Jordan më dönyö ï lobo na Rwoth Obangawu bino mïöwu, un ibino cicibo kite na thwon cë ipu unu komgï kï rangi na tar. 3 Cöö köp kïbëc më cïk ni ï komgï ka ipoth unu yo löka më dönyö ï lobo na Rwoth Obangawu tye ka mïöwu, lobo na mio na cak kï möö kic möl kï ïë, kite na Rwoth, Obanga ka kwerewu, öcïkërë kodwu. 4 Ka dong ïngölö unu kulo Jordan, cicibo unu kite ni ï wi Kidi Ebal kit na an atye ka cïköwu ködë tin. Myero ipu unu komgï kï rangi na tar. 5 Gër unu keno tyër n'ëyübö kï kite both Rwoth Obangawu kunön. Kür itii unu kï nywenyo mörö më paögï. 6 Myero ïgër unu keno tyër ka Rwoth Obangawu kï kite na lül ëka ïryëd unu tyër awanga ï wie both Rwoth Obangawu. 7 Ngöl unu thon tyër më kuc nakun ïcamö unu kunön, kanya un ibino bedo kï yom cwiny ï nyim Rwoth Obangawu. 8 Un myero ïcöö na bër köp kïbëc më cïk ni ï kom kite ni na un icicibo.”
Alem kï ï Kidi më Ebal
9 Cë Muca ëka ëlamdhök n'obedo Elebi okobo both jö Icarael kïbëc nï, “Lïng unu moth, un jö Icarael, ëk iwiny unu köp! Un dong ïdökö jö ka Rwoth Obangawu. 10 Pï manön, un myero dong iwiny unu köp ka Rwoth Obangawu ëk ïlüb unu cïk mërë kïbëc na an atye ka mïöwu tin.”
11 Ï nïnö nön kikokome Muca öcïkö jïï nï:
12 Ka ïngölö unu kulo Jordan, kaka ka Cimeon, Lebi, Yuda, Icakar, Yocepu ëka Benjamin bino cung gïnï ï wi Kidi Gerijim më lamö gum ï kom jïï. 13 Ëka kaka ka Reuben, Gad, Acer, Jabulon, Dan, ëka Naputali bino cung gïnï ï wi Kidi Ebal më lamö cen ï kom jïï.
14 Cë jö Lebi bino redo gïnï rwök both jö më Icarael kïbëc nï:
15 “Cen myero ömak dhanö mörö na bino yübö cal jwök n'ëpaö apaa onyo nywenyo n'ëlïö—n'obedo gin më kwer both Rwoth, n'adïrü öyübö kï cïngë—ëka ocibo ï müng më awöra.”
Cë jö kïbëc bino gamö nï, “Amën!”
16 “Cen myero ömak dhanö mörö na ba bino wörö apap mërë ëka aya mërë.”
Cë jö kïbëc bino gamö nï, “Amën!”
17 “Cen myero ömak dhanö mörö na bino cwarö kidi më wang ngöm k'awodhe.”
Cë jö kïbëc bino gamö nï, “Amën!”
18 “Cen myero ömak dhanö mörö na bino mïö athöö wang lübö yoo na path.”
Cë jö kïbëc bino gamö nï, “Amën!”
19 “Cen myero ömak dhanö mörö na bino balö pido k'arok, athïn kic onyo dha thöö ëka mïö köp löö.”
Cë jö kïbëc bino gamö nï, “Amën!”
20 “Cen myero ömak dhanö mörö na bino buto kï cii apap mërë, pïën nwongo ën oketho lewic ï kom apap mërë.”
Cë jö kïbëc bino gamö nï, “Amën!”
21 “Cen myero ömak dhanö mörö na bino buto kï lee mörö këkën.”
Cë jö kïbëc bino gamö nï, “Amën!”
22 “Cen myero ömak dhanö mörö na bino buto k'amïn mërë, onyo amïn mërë më babö onyo amïn mërë n'aya mërë önywölö k'ëcwö nökënë.”
Cë jö kïbëc bino gamö nï, “Amën!”
23 “Cen myero ömak dhanö mörö na bino buto kï marö mërë.”
Cë jö kïbëc bino gamö nï, “Amën!”
24 “Cen myero ömak dhanö mörö na bino neko awodhe ï müng.”
Cë jö kïbëc bino gamö nï “Amën!”
25 “Cen myero ömak dhanö mörö na bino gamö lïm më wïlönë ï müng ëk enek kï dhanö na ba öbalö.”
Cë jö kïbëc bino gamö nï, “Amën!”
26 “Cen myero ömak dhanö mörö na ba bino moko ëka lübö köp kïbëc na tye ï cïk ni.”
Cë jö kïbëc bino gamö nï, “Amën!”