22
Úngó Dãwụ́dị̃ ꞌbã sĩ Úpí ịcụ́jó rĩ
1 Dãwụ́dị̃ ngo dó Úpí ní úngó ꞌdĩ ꞌi sáwã Úpí ꞌbã ĩꞌdi anzéjó mẹ́rọ́ꞌbá ĩꞌdidrị̂ kí drị́ gá pírí ꞌbo rĩ gá ãzíla ĩꞌdi anzéjó Sáwụ̃lọ̃ ꞌbã drị́ gá ꞌbo rĩ sĩ. 2 Ngo dó:
“Úpí ĩꞌdi ũkpó mádrị̂ ꞌi, ꞌbá áma tãmbalépi ãzíla áma palépi rĩ ꞌi,
3 Ãdróŋá ĩꞌdi ũkpó mádrị́ mání sĩ áma zị̃jó ala gá rĩ,
ma apá áma zị̃lé ĩꞌdi agá.
4 Ma Úpí sịlépi sĩ ãrútáŋá fẽjó ĩꞌdiní rá rĩ umve,
pa ma mẹ́rọ́ꞌbá mádrị̂ kí drị́ gá rá.
5 “Drã ị̃yị́ umvúlépi umvú-umvû rĩ áni rĩ ce áma andre trộkị́lịrị,
lị́kị̃ ị̃yị́ umvúlépi umvú-umvû rĩ drị̂ fẽ mání ụ̃rị̃.
6 Ĩbáká drã drị́ ꞌbá agụlépi ꞌbụ́ gá rĩ ce ma trộkị́lịrị;
úꞌbe mání ímbá drã drị̂.
7 Ũcõgõ mádrị̂ agá má umve Úpí ꞌi;
má umve Ãdróŋá mádrị̂ ꞌi sĩ áma ãzã kojó.
Jó ĩꞌdidrị́ ãlá rĩ gá are áma ụ́ꞌdụ́kọ́ rá;
áwáŋá mádrị̂ ca ĩꞌdi bị́lẹ́ gá rá.
8 “ꞌDã ꞌbã ũngúkú gá, ụ̃nọ́kụ̂ aya dó ru ãzíla ũyãkĩyã aya dó ãngũ kĩnzí-kĩnzí,
ꞌbụ̃ ꞌbã ị̃ndụ́ aya ru,
aya ru íni la Ãdróŋá ꞌbã acájó ũmbã sĩ rĩ sĩ.
9 Ãcíkã ãfũ ũmvu la gâsĩ ngajó ụrụgá;
ãcí lị́kị̃ ajílépi rĩ ãfũ ĩꞌdi tị gá,
ãcí ĩdra ũfũlépi ãcíkúlú agá rĩ ãfũ tị la gá nĩ.
10 Nzị̃ ꞌbụ̃ rá ãzíla asị́ dó sĩ vũ gá ꞌdõlé;
ụ̃rụ́ꞌbụ̃ ịnị rĩ ándrá ĩꞌdi pálé gá.
11 Tụ rilé kẹ̃rụ́bị̃ drị̃ gá sĩ ngajó,
nga cécé ãlụ́kụ́kụ̃ áni.
12 Aku ru andre ãngũ ịnị ĩꞌdi andre gá rĩ sĩ cí,
ụ̃rụ́ꞌbụ̃ uzogó drị́ ịnị rĩ sĩ.
13 Ãngũ ĩꞌdi andre gá dị̃lépi dị̃-dị̃ rĩ gá,
ãcí idraká ri velé nĩ.
14 Úpí kpẹ̃ dó ãvi áni angájó ꞌbụ̃ gâlé;
ụ́ꞌdụ́kọ́ Ãdróŋá ụrụgá ãndânĩ rĩ drị̂ ụ re,
15 gbẹ ꞌé ĩꞌdidrị̂ kí ãzíla mẹ́rọ́ꞌbá apá kí dó sĩ rá,
adro kí ãvi sĩ.
16 Ụ́ꞌdụ́ ꞌdã sĩ gẹ̃rị̃ mĩrĩ agá rĩ iꞌda kí ru rá,
ãzíla ụ̃nọ́kụ́ ị̃ndụ́ iꞌdá dó sĩ tọndọlọ,
Úpí ní uzájó kí drị̃ gá rĩ sĩ,
ãlụ́kụ́kụ̃ ãfũlépi ũkpó trũ ává ãfũlépi ĩꞌdi ꞌbã ũmvu gâsĩ rĩ sĩ.
17 “Úpí ĩjũ ru drị́ angájó ꞌbụ̃ gâlé sĩ áma rụjó,
anzé ma ị̃yị́ kị́rị́ rĩ agá.
18 Pa ma mẹ́rọ́ꞌbá mádrị́ ũkpó rĩ kí drị́ gá,
ꞌbá áma ngụ̃lépi ũnzí rĩ kí drị́ gá,
ãꞌdusĩku ndẽ kí ma ũkpó sĩ rá.
19 Sáwã ị́jọ́ ꞌbã kí áma ĩkpãjó rĩ gá, mẹ́rọ́ꞌbá amụ́ kí áma celé,
wó Úpí fẽ mání ãtị̃táŋá nĩ.
20 Anzé ma ꞌbãlé ãngũ múké rĩ gá;
pa ma rá ãꞌdusĩku uꞌá mâ sĩ ãyĩkõ sĩ.
21 “Úpí ũfẽ ma mání ị́jọ́ pịrị rĩ kí ngajó rĩ sĩ;
wi mání sụ̃sụ́ mání ị́jọ́ ãzí ũnzí la ngajó ku rĩ sĩ.
22 Ámba ãzị́táŋá Úpí drị̂ kí tã rá;
má uja ma Ãdróŋá mádrị̂ rụ́ sĩ ị́jọ́ ũnzí vú bĩjó ku.
23 Ãzị́táŋá ĩꞌdidrị̂ kí má ũbĩ kí vú pírí rá;
má aꞌbe ãzí ãlu la ku.
24 Ma Ãdróŋâ drị̃lẹ́ gá ũnzĩkãnã kó ru,
ámba áma tã sĩ ị́jọ́ ũnzí ngajó ku.
25 Úpí ũfẽ ma ị́jọ́ múké mání ngalé rĩ ꞌbã vúŋá sĩ,
ị́jọ́ ãlá mání ngalé ĩꞌdi ꞌbã drị̃lẹ́ gá rĩ ꞌbã vúŋá sĩ.
26 “ꞌBá ãꞌị̃táŋá trũ rĩ ꞌbaní mi ãꞌị̃táŋá mídrị̂ iꞌda,
ꞌbá ũnzĩkãnã kó ru rĩ ꞌbaní mi ũnĩ mídrị̂ iꞌda,
27 ꞌbá ãlá rĩ ꞌbaní, mi mũkẽ mídrị̂ iꞌda,
wó ꞌbá ũnzí rĩ ꞌbaní mi ádrã iꞌda.
28 Mi ꞌbá ru irilépi vụ̃rụ́ rĩ kí pa,
wó mịfị́ mídrị̂ ĩꞌdi ꞌbá ãfó ru rĩ kí drị̃ gá sĩ kí ịsị́jó vụ̃rụ́.
29 Úpí mi tárã mádrị̂ ꞌi,
Úpí uja ị́nị́ mádrị̂ dị̃zã rú.
30 Ãzãkoma mídrị̂ sĩ má icó mẹ́rọ́ꞌbá mádrị̂ kí ndẽlé rá;
Ãdróŋá mádrị̂ ꞌbã ũkpó sĩ má icó mvulé bõrõ ꞌbã drị̃ gâsĩ rá.
31 “Gẹ̃rị̃ Ãdróŋá drị̂ ꞌbãngá pịrị;
ị́jọ́ Úpíꞌbã azịlé rĩ kí ru nga rá,
ĩꞌdi ꞌbá pírí apálépi ru zị̃lépi ĩꞌdi agá ị́jọ́ mgbã ngalépi rĩ kí tãmba rá.
32 Ãdróŋá ãzí dó Úpí ꞌbã bụ́lụ́ gá rĩ dó ãꞌdi ꞌi?
ꞌBá la ãzí dó ãma tãmbalépi Ãdróŋá ãmadrị̂ áni rá rĩ dó ãꞌdi ꞌi?
33 Ãdróŋá la mání ũkpó fẽ nĩ,
fẽ gẹ̃rị̃ mání acị́jó rĩ ní adrujó ị́jọ́ ũnzí kó ru.
34 Fẽ áma pá ní acájó cécé mũcé drị̂ áni,
ĩꞌdi áma fẽ pá tujó ꞌbé drị̃ gá nĩ.
35 Ãdróŋá la áma imbá sĩ ãꞌdị́ ꞌdịjó nĩ,
ĩꞌdi áma drị́ ꞌbã ũkpó ru sĩ ụ́sụ idélé bũrônzĩ sĩ rĩ gbẹjó.
36 Úpí ímba áma tã múké sĩ ãꞌdị́ ndẽjó,
ãzãkoma mídrị̂ fẽ mání acájó ãmbógó ru.
37 Ínzị̃ gẹ̃rị̃ mání sĩ acị́jó rĩ mgbọ rú,
áma pá icó dó sĩ ĩtrĩlé ku.
38 “Má adro mẹ́rọ́ꞌbá mádrị̂ kí vú ãzíla má ị̃lị̃kị̃ kí rá,
má ị̃lị̃kị̃ kí pírí rá ká má ãgõ ĩndõ.
39 Má ịꞌị́ kí pírí, icó kí angálé ku,
uꞌde kí vũ gá áma pálé gá.
40 Ífẽ mání ũkpó sĩ ãꞌdị́ ꞌdịjó rá,
ãzíla mí iri mẹ́rọ́ꞌbá mádrị̂ kí áma drị̃lẹ́ gá ꞌbo.
41 Ífẽ mẹ́rọ́ꞌbá mádrị̂ ꞌbaní ũngúkú ujajó sĩ apájó,
ãzíla má ị̃lị̃kị̃ ꞌbá áma ngụ̃lépi ũnzí rĩ kí rá.
42 Awá kí sĩ ãzãkoma ịsụ́ jó, wó ꞌbá ãzí kí palépi la ꞌdáyụ,
umve kí Úpí ꞌi, wó umvi kí ku.
43 Áni kí fúfú ru cécé pụ́trụ́ vũ gá rĩ áni;
ásị̃ kí ãzíla má atu kí kócõ gẹ̃rị̃ tị gá rĩ áni.
44 “Mí apá ma ꞌbá mvulépi má rụ́ ꞌdâ rá rĩ kí drị́ gá rá;
ímba áma tã má ace dó sĩ drị̃lẹ́ ru sụ́rụ́ kí drị̃lẹ́ gá,
ꞌbá mání nị̃lé ku rĩ nga kí ãzị́ mání.
45 ꞌBá ãmị́yọ́ŋá ru rĩ kí mụ ị́jọ́ arelé áma drị̃ gá ꞌbo,
cọtị iri kí ru vụ̃rụ́ áma drị̃lẹ́ gá.
46 Ásị́ mbaŋá ĩꞌbadrị̂ ukó rá;
ãfũ kí ụ̃jị́gọ́ kí agâlé ụrụꞌbá yãŋá trũ.
47 “Úpí ĩꞌdi ídri! Ãma ịcụ́ kí ꞌbá ãma tãmbalépi rĩ ꞌi!
Înga Ãdróŋá mádrị̂ ụrụgá, ĩꞌdi ꞌbá áma tãmbalépi rĩ ꞌi, ꞌbá áma palépi rĩ ꞌi!
48 Ĩꞌdi Ãdróŋá ãrígó tị ũfẽlépi ꞌbá ị́jọ́ ngalépi má rụ́ ũnzí rĩ ꞌbarụ́ rĩ ꞌi;
ĩꞌdi sụ́rụ́ kí ꞌbã áma pálé gá,
49 anzé ma mẹ́rọ́ꞌbá mádrị̂ kí drị́ gá rĩ sĩ nĩ.
Mí inga ma mẹ́rọ́ꞌbá mádrị̂ kí drị̃lẹ́ gá ụrụgá,
ípa ma ꞌbá ãgọ̃bị̃ ũnzí rĩ kí drị́lẹ́ gá.
50 Ị́jọ́ ꞌdĩ sĩ Úpí, ma ími rụ́ ịcụ́ sụ́rụ́ kí ĩsélé gá,
ma úngó sĩ ími rụ́ ịcụ́jó rĩ kí ngo.
51 Ĩꞌdi úpí ĩꞌdidrị̂ ní patáŋá ãmbógó rĩ fẽ,
ĩꞌdi lẽtáŋá ukólépi ku rĩ iꞌda ꞌbá ĩꞌdiní sĩ ãdu ũsũjó drị̃ la gá rĩ ní,
Dãwụ́dị̃ ní ãzíla anzị ĩꞌdidrị́ mụlé tịlé drị̃lẹ́ gâlé rĩ kí abe jãꞌdâ.”