33
Mụ́sã ꞌbã sụ̃sụ́ wijó sụ́rụ́ Ịsịrayị́lị̃ drị̂ ꞌbaní rĩ
1 ꞌDĩ sụ̃sụ́ nábị̃ Ãdróŋá drị́ Mụ́sã ꞌbã wilé anzị Ịsịrayị́lị̃ drị̂ ꞌbaní ꞌdĩ sĩ drã drĩ ku rú rĩ:
2 “Úpí amụ́ angájó ꞌBé Sĩnáyĩ gâlé
ãzíla agá cécé ị̃tụ́ áni Ídõmũ drị̃ gâ sĩ;
ãzíla fẽ dị̃zã ĩꞌdidrị̂ ní dị̃jó ꞌbá ĩꞌdidrị̂ kí drị̃ gá angájó ꞌBé Pãránĩ gá.
Amụ́ mãlãyíkã álĩfũ-álĩfũ abe,
ãcí velépi la trũ ĩꞌdi ꞌbã drị́ ãndá rĩ gá.
3 Úpí lẽ ꞌbá ĩꞌdidrị́ ãlá rĩ kí rá;
ãzíla ĩꞌdi ꞌbá ĩꞌdidrị̂ kí tã mba nĩ.
Ị́jọ́ ꞌdĩ sĩ ãma ãvụ̃ kí ĩꞌdi ꞌbã pálé gá
ãzíla ãma ũbĩ kí ãzị́táŋá ĩꞌdidrị̂ kí vú.
4 Ãma ũbĩ kí ãzị́táŋá ándrá Mụ́sã ꞌbã fẽlé ãmaní rĩ kí vú,
ꞌdĩ málĩ ãmbógó tã mbalé ꞌbá Yãkóꞌbõ drị̂ ꞌbaní rĩ ꞌi.
5 Úpí acá úpí ru ꞌbá ĩꞌdidrị́ Ịsịrayị́lị̃* Bụ́kụ̃ ãzí rĩ kí rụ́ Ịsịrayị́lị̃ ꞌdĩ umve Yẹ́sụ̃rụ̃nị̃ ꞌi. kí drị̃lẹ́ gá,
sáwã drị̃lẹ́ ꞌbá ꞌbadrị̂ ꞌbã kí ru trajó,
sụ́rụ́ Ịsịrayị́lị̃ drị̂ kí abe rĩ sĩ.”
6 Mụ́sã jọ ị́jọ́ sụ́rụ́ Rụ́bẹ̃nị̃ drị̂ drị̃ gá,
“Lẽ ꞌbá sụ́rụ́ Rụ́bẹ̃nị̃ drị̂ ꞌbã ũdrã kí ku,
jõku kí kãlãfe ꞌbã adru were rú ku.”
7 Mụ́sã jọ ị́jọ́ sụ́rụ́ Yụ́dã drị̂ drị̃ gá,
“Úpí, mí are Yụ́dã ꞌbã áwáŋá ĩꞌdiní ãzãkoma aꞌị́ agá mídrị́.
Mí icí kí sụ́rụ́ Ịsịrayị́lị̃ drị̂ kí abe ꞌbá ãlu rụ́ ị̃dị́,
ífẽ ĩꞌdiní ũkpó sĩ mẹ́rọ́ꞌbá kí ndẽjó.”
8 Mụ́sã jọ ị́jọ́ sụ́rụ́ Lẹ́vị̃ drị̂ drị̃ gá,
“Tãmímũ mídrị̂ kí Ụ̃rị́mụ̃ mídrị̂ abe kí ꞌbá mídrị́ lẽlé lẽlẽ rĩ ꞌbãni,
mí ụ̃ꞌbị̃ ándrá kí Másã gá
ãzíla mí ãwã ándrá ĩꞌba abe ị̃yị́ Mẹ̃rị́bã gá ꞌdãá.
9 ꞌBá Lẹ́vị̃ drị̂ ãꞌị̃ kí ándrá ị́jọ́ mídrị̂ rá
ãzíla mba kí ándrá tị icíma mídrị́ ĩꞌba abe rĩ tã rá.
Kí ándrá ãrútáŋá ru ími ụrụꞌbá gá
ndẽ ĩꞌbaní iꞌdalé ĩꞌbã átẹ́pịka ꞌbaní ádrị́pịka abe,
jõku anzịŋá ĩꞌbadrị̂ ꞌbaní rĩ rá.
Ũbĩ kí ãzị́táŋá mídrị̂ kí vú ãꞌị̃táŋá sĩ.
10 Kí Yãkóꞌbõ imbá ị́jọ́ lịŋá mídrị̂ sĩ;
ãzíla Ịsịrayị́lị̃ imbá ãzị́táŋá mídrị̂ kí sĩ.
Kí lũbánĩ ivélé ivé-ívẽ rĩ ꞌbã ími drị̃lẹ́ gá
ãzíla ídétáŋá ivélé ivé-ívẽ rĩ abe ãlĩtárĩ mídrị̂ drị̃ gá.
11 Úpí, íwi sụ̃sụ́ sụ́rụ́ Lẹ́vị̃ drị̂ ꞌbaní sĩ zojó ũkpó ru;
mí adru ãyĩkõ sĩ ị́jọ́ ĩꞌbaní idelé ĩꞌbã drị́ sĩ rĩ kî sĩ.
Mí ịꞌị́ mẹ́rọ́ꞌbá ĩꞌbadrị̂ kí,
ífẽ ꞌba angá kí ị̃dị́ ku.”
12 Mụ́sã jọ ị́jọ́ sụ́rụ́ Bénzãmĩnĩ drị̂ drị̃ gá,
“ꞌDĩ sụ́rụ́ Úpí ní lẽlé
ãzíla tã mbalé nĩ rĩ ꞌi;
ĩꞌdi kí ãzã ko ụ́ꞌdụ́ pírí sĩ
ãzíla ĩꞌdi adru kí drĩdríŋĩ gá cí.”
13 Mụ́sã jọ ị́jọ́ sụ́rụ́ Yụ̃sụ́fụ̃ drị̂ drị̃ gá,
“Úpí ꞌbã wi sụ̃sụ́ ụ̃nọ́kụ́ ĩꞌdidrị̂ drị̃ gá
uzogó ũnĩ ambamba ꞌbụ̃ gá
ãzíla ị̃yị́ ụ̃nọ́kụ́ ị̃ndụ́ gá vụ̃rụ̂lé rĩ sĩ;
14 ꞌBã wi sụ̃sụ́ ị̃tụ́kã ãlá rĩ sĩ
ãkónã ꞌbaní sĩ kajó áyi ãlu-ãlu sĩ;
15 ꞌBã wi sụ̃sụ́ ꞌbé áyị́pịka ꞌbadrị̂ kí drị̃ gá
ãzíla ãkónã ꞌbã ka kí sĩ ĩꞌbaní nĩ jã ꞌdâ;
16 Lẽ ụ̃nọ́kụ́ ĩꞌbadrị̂ ꞌbã ga pírí ị́jọ́ múké sĩ,
Úpí ꞌbã sụ̃sụ́ mũkẽ ĩꞌdidrị̂ wijó ĩꞌdiní ị́jọ́ jọjó angájó mị̃rị́ velépi ãcí sĩ rĩ agâlé rĩ áni,
sụ̃sụ́ ꞌdĩ ꞌba amụ́ rilé sụ́rụ́ Yụ̃sụ́fụ̃ drị̂ drị̃ gá,
ãꞌdusĩku ĩꞌdi drị̃lẹ́ ádrị́pịka ꞌbadrị̂ ꞌi.
17 Ãmbõgõ sĩ Yụ̃sụ́fụ̃ ĩꞌdi cécé mọ́nị̃gọ́ kãjãní rĩ áni;
újéke ĩꞌdidrị̂ kí cécé Ụ̃drụ́ ásé agá rĩ drị̂ áni,
újéke ĩꞌdidrị̂ kí ãsĩkárĩ álĩfũ-álĩfũ Mãnásẽ drị́
ãzíla Ịfụrayị́mụ̃ drị́ álĩfũ mụdrị́ rĩ áni.
Kí ꞌbá ĩꞌbã jĩránĩ rú rĩ kí iré
ãzíla dro kpere ụ̃nọ́kụ́ ị̃ndụ́ ꞌbã ãsị̃ agá.”
18 Mụ́sã jọ ị́jọ́ sụ́rụ́ Zãbụ̃lọ́nị̃ drị̂ kí drị̃ gá sụ́rụ́ Ĩsãkárĩ drị̂ be,
“Zãbụ̃lọ́nị̃ ĩmi adru drị̃lẹ́ba rú bĩsírã sĩ ĩminí acị́ agá ị̃yị́ drị̃ gá ꞌdâ
ãzíla Ĩsãkárĩ ꞌbaní málĩ ꞌbã ga ĩmidrị́ lị́cọ́ agá tré.
19 Kí ꞌbá kí umve ĩꞌba rụ́ ꞌbé agâlé
ãzíla kí fẽtáŋá ídétáŋá ru múké rĩ kí fẽ;
kí málĩ ịsụ́ angájó ị̃yị́ agá
ãzíla cínákí agá ị̃yị́ tị gâ sĩ.”
20 Mụ́sã jọ ị́jọ́ sụ́rụ́ Gádĩ drị̂ drị̃ gá,
“Ĩmi ịcụ́ Ãdróŋá ꞌi, ĩꞌdi ꞌbá ãngũ ĩmidrị̂ nzị̃lépi ãmbógó ru rĩ ꞌi!
Gádĩ mi adru cécé kẹ̃mị̃ áni
ꞌbá kí drị́ jõku drị̃kã ucíjó.
21 ꞌDụ ụ̃nọ́kụ́ ãlá ãndânĩ rĩ ĩꞌdinî;
sáwã drị̃lẹ́ka Ịsịrayị́lị̃ drị̂ ꞌbã kí ru trajó ãngũ ãlu gá rĩ gá,
úfẽ ĩsélé ãngũ drị̃lẹ́ drị̂ ĩꞌbadrị́
ĩꞌdi ị́jọ́ lịŋá pịrị Úpí drị̂ nga
ãzíla ĩꞌdi ãzị́táŋá fẽlé Ịsịrayị́lị̃ ní rĩ kí tã mba.”
22 Mụ́sã jọ ị́jọ́ sụ́rụ́ Dánĩ drị̂ drị̃ gá,
“Dánĩ ĩꞌdi cécé kẹ̃mị̃ mváŋá áni;
ĩꞌdi amvú ãmvé angájó Básãnĩ gá rĩ sĩ.”
23 Mụ́sã jọ ị́jọ́ sụ́rụ́ Nãfũtálĩ drị̂ drị̃ gá,
“Úpí ꞌbã ásị́ ị̃gbẹ̃ ĩꞌdi sụ́rụ́ Nãfũtálĩ drị̂ drị̃ gá,
fẽ ĩꞌbaní drị̃lẹ́ba sĩ;
ãngũ angájó ándrá kpere ị̃yị́ Gãlị́lị̃ gá rĩ ꞌdụjó.”
24 Mụ́sã jọ ị́jọ́ sụ́rụ́ Ásẹ̃rị̃ drị̂ drị̃ gá,
“Drị̃lẹ́ba ãndânĩ rĩ Ãdróŋá ꞌbã fẽ ꞌba adru anzị Ásẹ̃rị̃ drị̂ ꞌbanî,
ádrị́pịka ꞌbã lẽ kí ĩꞌdi pírí lẽlẽ,
lẽ úsu ĩꞌdi ãdu Mị̃zẹ̃yị́tụ̃ drị̂ agá.
25 Táwụ̃nị̃ mídrị̂ ꞌbã kẹ̃jị́tị ꞌbã adru ũkpó ru aya sĩ ãzíla bũrônzĩ sĩ,
mi dó sĩ ími andre ũtẽ ũkpó ru ụ́ꞌdụ́ pírí sĩ.”
26 “Ĩmi ꞌbá Ịsịrayị́lị̃ drị́ ꞌdĩ, ãdróŋá ãzí cécé Ãdróŋá ĩmidrị̂ áni,
cẹ̃lépi ꞌbụ̃ gâ sĩ ĩmi ãzã kolépi ũkpó ĩꞌdidrị̂ sĩ,
ụ̃rụ́ꞌbụ̃ agâ sĩ rĩ áni la ꞌdáyụ.
27 Ãdróŋá ĩꞌdi ꞌbá ĩminí sĩ apájó ĩmi zị̃jó ĩꞌdi rụ́ rĩ ꞌi,
ãzíla aja ĩꞌdi ꞌbã drị́ ĩmi drị̃ gá sĩ ĩmi tã mbajó jã ꞌdâ.
Ĩꞌdi mẹ́rọ́ꞌbá kí adro ĩmi drị̃lẹ́ gá rĩ sĩ rá jọjó la,
‘Ĩmi ụꞌdị́ kî!’
28 Ị́jọ́ ꞌdĩ sĩ Yãkóꞌbõ la dó sĩ uꞌá ásị́ ị̃gbẹ́ agá ị́jọ́ kóru,
kídí Yãkóꞌbõ drị̂ lú ĩꞌdi ãni áꞌdụ̂sĩ
ãngũ múké ãná trũ ãzíla wáyĩnĩ trũ,
ꞌbụ̃ ꞌbã sĩ andrẹlị́ ũsũjó drị̃ la gá rĩ gá.
29 Drị̃lẹ́ba ĩminî, ĩmi ꞌbá Ịsịrayị́lị̃ drị́ ꞌdĩ, ꞌbá ãzí ĩmi áni la cí yã?
ꞌBá ãzí cécé ĩmi áni Úpí ꞌbã tã mbalé nĩ la ꞌdáyụ.
Úpí ĩꞌdi gọ́bẹ́rẹ́ ãzíla ménéŋá ĩmidrị̂ ꞌi
ĩꞌdi ĩmi tãmba ãzíla ĩmi fẽ ãꞌdị́ ndẽlé.
Mẹ́rọ́ꞌbá ĩmidrị̂ kí amụ́ mãmálá ꞌbãlé ĩmi rụ́ sĩ ásị́ ị̃gbẹ̃ ịsụ́jó
ãzíla ĩmi kí ndẽ rá.”