15
Úngó Mụ́sã ꞌbã ngolé rĩ
1 Mụ́sã kí ꞌbá Ịsịrayị́lị̃ drị̂ kí abe ngo kí úngó ꞌdĩ Úpí nî:
“Ma úngó ngo Úpí ní, ãꞌdusĩku ndẽ ãꞌdị́ rá înga rú la ụrụgá.
Fãrásĩ kí ꞌbá cẹ̃lépi drị̃ la gá rĩ abe uꞌbé kí ị̃yị́ agá.
2 Úpí ĩꞌdi ũkpõ mádrị̂ ꞌi ãzíla ma úngó ngo ĩꞌdinî;
Ĩꞌdi ꞌbá áma palépi rĩ ꞌi.
Ĩꞌdi Ãdróŋá mádrị̂ ꞌi, ma ĩꞌdi ịcụ́ jã ꞌdâ,
Úpí má átẹ́pị drị̂, ãzíla ma ãmbõgõ ĩꞌdidrị̂ ungo.
3 Úpí ĩꞌdi ꞌbá ãꞌdị́ ꞌdịlépi rĩ;
rụ́ la Úpí ꞌi.
4 Fãráwũ ꞌbã gárĩ ãꞌdị́ drị̂ kí ãsĩkárĩ abe
uꞌbé kí ị̃yị́ agá.
Ãsĩkárĩ ãmbogo Fãráwũ drị́ múké ãndânĩ rĩ kí
ịmvụ́ kí Mĩrĩ Ika rĩ agá.
5 Ị̃yị́ kị́rị́ rĩ aku kí drị̃ cí;
ꞌDe kí ị̃yị́ ị̃ndụ́ gâlé cécé írã áni.
6 Úpí, ími drị́ ãndá rĩ,
iꞌda ũkpõ mídrị́ ãmbógó rĩ ꞌi.
7 Ũkpõ mídrị́ ãmbógó rĩ sĩ
mí uꞌbé ꞌbá ími lẽlépi ku rĩ kí vụ̃rụ́.
Ínzị̃ ũmbã mídrị́ ãcí ru rĩ kí drị̃ gá;
Ivé kí rúmú-rúmú ásé áni.
8 Ũlí míní vúlé ũmvu sĩ rĩ
tra ị̃yị́ ụrụ gá.
Ị̃yị́ umvúlépi tũlãtũlã rĩ tra ru ãzíla tu pá Bõrõ áni;
ị̃yị́ ị̃yị́ ꞌbã ágádrị̃ gá kị́rị́ rĩ tra ru ulílé ũkpó ru.
9 Mẹ́rọ́ꞌbá ịpị́ kí ru,
‘Ma kí vú bĩ, ma kí arụ́ rá.
Ma ãko ĩꞌbadrị́ mání arálé rĩ kí awa;
Áma ꞌa la aga kî sĩ.
Ma ménéŋá mádrị̂ anzé,
ma kí ị̃lị̃kị̃ ĩꞌdi sĩ.’
10 Wó ívu kí ũlí ími ũmvu gá rĩ sĩ,
ãzíla ị̃yị́ aku kí drị̃ rá.
ꞌDe kí ị̃yị́ ị̃ndụ́ gâlé
cécé írã ꞌbã ꞌdelé ị̃yị́ ũkpó agá rĩ áni.
11 Úpí, ãꞌdi ꞌi ãdroŋa kí agá mî áni la nĩ yã?
Ãꞌdi ꞌi mî áni rĩ gá nĩ?
Dị̃zã rú ãzíla ãlá ru,
Ãzị́ míní ngalé rĩ ụ̃sụ̃táŋá ru
12 Mí ĩjũ ími drị́ ãndá rĩ
Vũ uti mẹ́rọ́ꞌbá kí rá.
13 Lẽtáŋá mídrị́ aꞌdélépi ku rĩ sĩ,
íꞌde ꞌbá míní anzélé rĩ kí drị̃.
Ũkpõ mídrị̂ sĩ mi kí andre tẽ,
ãngũ ãlá míní sĩ uꞌájó rĩ gá.
14 Sụ́rụ́ drĩ kí are la ãzíla kí yã-yã;
ũcõgõ la ꞌbá Fị̃lị̃sị̃tị́nị̃ gá rĩ kí rụ cí.
15 Drị̃lẹ́ Ídõmũ gá rĩ kí idé ụ̃rị̃ sĩ,
Drị̃lẹ́ Mụ̃wábụ̃ gá rĩ kí ụ̃rị̃ la kí rụ yãŋá trũ,
ꞌbá Kãnánĩ drị̂ kí aká ralé sụ́sụ́ ru;
16 ụ̃rị̃ ãmbógó la fi kí ásị́ gá nĩ.
Drĩ kí drị́ ũkpó mídrị̂ ndre
kí pá tu ãvẹ̃vị̃ kóru ụ̃rị̃ sĩ
kpere ꞌbá mídrị̂ ꞌbã kí alị agá, Úpí,
kpere ꞌbá míní apálé rĩ ꞌbã kí alị agá.
17 Mi kí ají ãzíla mi kí iri
ꞌbé mídrị̂ drị̃ gá,
ãngũ míní idélé míní sĩ uꞌájó rĩ gá Úpí,
ãngũ ãlápítí, Úpí míní idélé drị́ mídrị̂ sĩ rĩ ꞌi.
18 Úpí mi adru Úpí ru jã ꞌdâ.”
Úngó Mị́rị́yãmũ ꞌbã ngolé rĩ
19 ꞌBá Ịsịrayị́lị̃ drị̂ ꞌbã kí alịjó ị̃yị́ agá ãngũ ãꞌí rĩ drị̃ gâsĩ rĩ sĩ, Fãráwũ ꞌbã fãrásĩ kí, gárĩ ãꞌdị́ drị̂ kí, ꞌbá cẹ̃lépi la rĩ kí abe fi kí ị̃yị́ agâlé, Úpí ají ị̃yị́ kí drị̃ akulé mũꞌdũ. 20 Nábị̃ ũkú ru Mị́rị́yãmũ Ãrọ́nị̃ ꞌbã ámvọ́pị aꞌdụ́ kụ́lịmvá drị́ gá, ãzíla ũkú pírí bĩ kí ĩꞌdi vú, ãko ĩꞌbadrị́ úngó drị̂ trũ ãzíla úngó tuŋá trũ. 21 Mị́rị́yãmũ ngo úngó ĩꞌbanî
“Ma úngó ngo Úpí ní, ãꞌdusĩku ndẽ ãꞌdị́ rá înga rụ́ la ụrụgá.
Fãrásĩ kí ꞌbá cẹ̃lépi drị̃ la gá rĩ kí abe uꞌbé kí ị̃yị́ agá.”
Ị̃yị́ ụ̃jị́ rĩ
22 Ị́jọ́ ꞌdã ꞌbã vúlé gá Mụ́sã ꞌde dó ꞌbá Ịsịrayị́lị̃ drị̂ kí drị̃ Mĩrĩ Ika rĩ gá rĩ sĩ, mụ kí dó ãngũ kõtórõ ru Sụ́rị̃ gá. Acị́ kí ãngũ kõtórõ rú rĩ agá ụ́ꞌdụ́ na ịsụ́ kí ị̃yị́ ku. 23 Kí mụ acálé Márã gá ꞌbo, icó kí ị̃yị́ ꞌdãá rĩ mvụlé ku ãꞌdusĩku ị̃yị̂ ụ̃jị́-ụ̃jị́. (Ị́jọ́ ꞌdĩ bãsĩ ĩꞌbaní ãngũ ꞌdã ꞌbã rụ́ ꞌdajó Márã ꞌi ꞌdĩ.) 24 ꞌBá unu kí Mụ́sã ụrụꞌbá gá, jọ kí, “Ãma dó mụ ãꞌdu mvụlé?”
25 Mụ́sã ꞌbã mãmálá Úpí drị̃lẹ́ gá, ãzíla Úpí iꞌda ĩꞌdiní ife dụ́lụ́. ꞌBe ife ị̃yị́ agá, ãzíla ị̃yị̂ uja dó sĩ ru ãjị́-ambamba rú mvụlé mvụ-mvụ̃.
Ãngũ ꞌdã gá ꞌdãá Úpí azị ãzị́táŋá ĩꞌbaní, ãzíla ụ̃ꞌbị̃ sĩ kî. 26 Jọ ĩꞌbaní, “Ĩdrĩ Úpí Ãdróŋá ĩmidrị̂ tị are múké-múké, ãzíla ĩdrĩ ị́jọ́ áma mịfị́ gá múké rĩ kí idé áyụ, ĩdrĩ ásị́ ꞌbã ãzị́táŋá mání azịlé rĩ kí tãmbajó rá, Má icó ãyánĩ ándrá mání ajílé ꞌbá Mị̃sị́rị̃ gá rĩ kí drị̃ gá rĩ ajílé ĩmi drị̃ gá ku, ãꞌdusĩku ma Úpí ĩmi adrílépi rĩ ꞌi.”
27 ꞌBá ꞌdĩ mụ kí dó Ị̃lị́mụ̃ gá, ꞌdãá ị̃yị́ kídí ru rĩ kí mụdrị́ drị̃ ị̃rị̃, ãzíla káci kí kãlị́ ázị̂rị̃, ãzíla ri kí dó ị̃yị́ tị gá ꞌdãá ãni rú.