10
ꞌBá ꞌbã kí ásị́ ujajó rĩ
1 Ézĩrã ꞌbã dị̃ agâ Ãdróŋá zị sĩ, ị́jọ́ ũnzí iꞌda sĩ, áwá sĩ ãzíla ru uꞌbé sĩ vũ gá jó Ãdróŋá drị̂ ꞌbã drị̃lẹ́ gá ꞌdĩ gá ꞌdâ, ꞌbá ũꞌbí Ịsịrayị́lị̃ drị́ ãgọbị rú, ũkú ru ãzíla anzị nírí ru rĩ atrá kí dó ru ĩꞌdi andre gá ãzíla awá kí dó ãzákírílí ru. 2 ꞌDã ꞌbã ũngúkú gá, Sẽkãníyã Yẹ̃hị̃yẹ́lị̃ ngọ́pị ãfũlépi ũri Ị̃lámụ̃ drị̂ agá rĩ jọ Ézĩrã ní, “Ãma iza ị́jọ́ Ãdróŋá ãmadrị̂ rụ́ rá ãmaní izonzi sụ́rụ́ ãmã andre gá rĩ agá rĩ kí ꞌdụjó ãmaní ũkú ru rĩ sĩ. Wó ị́jọ́ ꞌdĩ kí drị̃ gâsĩ tí ásị́ ꞌbãŋá ãzí drĩ Ịsịrayị́lị̃ ní cí. 3 Úꞌdîꞌda, lẽ dó ãma icí kí tị Ãdróŋá ãmadrị̂ be sĩ ũkú ꞌdĩ kí drojó anzị ĩꞌbadrị̂ kí abe pírí rá. Ãma ũrãtáŋá míní fẽlé ãzila ꞌbá Ãdróŋá rulépi rá rĩ ꞌbaní fẽlé rĩ ꞌdụ sĩ ãzị́ ngajó. Lẽ ị́jọ́ ꞌdĩ ꞌbã nga ru ãzị́táŋá Ãdróŋá drị̂ ꞌbã lẽlé rĩ áni. 4 Mí angá, mi bãsĩ ị́jọ́ ꞌdĩ ꞌbã ãzị́ nga mi ꞌi. Ãma ími ãtị̃ rá, ími ásị́ ꞌbã mba sĩ ãzị́ ꞌdĩ ngajó.”
5 Ị́jọ́ ꞌdĩ sĩ Ézĩrã angá dó, fẽ dó drị̃lẹ́ ãtalo ꞌbadrị̂ ꞌbaní ꞌbá Lẹ́vị̃ drị̂ kí abe ãzíla ꞌbá Ịsịrayị́lị̃ drị̂ ꞌbaní pírí ũyõ nalé sĩ ị́jọ́ ándrá Sẽkãníyã ꞌbã jọlé rĩ ngajó. Na kí dó sĩ ũyõ rá.
6 ꞌDã ꞌbã ũngúkú gá, Ézĩrã aꞌbe dó ãngũ jó Ãdróŋá drị̂ ꞌbã drị̃lẹ́ gâlé ru rĩ rá, mụ dó sĩ filé jó Yẽhõhãnánĩ Ĩlĩyãsíbũ ngọ́pị drị̂ agá. Ĩꞌdiní adru agá ꞌdãá, na ãkónã ku ãzíla mvụ vâ ị̃yị́ ku ãꞌdusĩku ri awálé ị́jọ́ ũnzí ꞌbá ándrá ꞌdụlé ãtiꞌbo rú ãgõlépi ꞌdĩ ꞌbadrị̂ sĩ.
7 ꞌDã ꞌbã ũngúkú gá, úfẽ dó ụ́ꞌdụ́kọ́ ꞌbá ándrá rụlé ũkpó sĩ agụlé ãmị́yọ́ŋá ãngũ gá ãgõlépi Yụ́dã gá ãzíla Yẹ̃rụ́sãlẹ́mụ̃ gá ꞌdĩ ꞌbaní pírí sĩ ru atrájó Yẹ̃rụ́sãlẹ́mụ̃ gá. 8 ꞌBá amụ́lépi ụ́ꞌdụ́ na ꞌdã kí agá ku rĩ ála ãko ĩꞌdidrị̂ kí ꞌdụ pírí rá, ꞌdĩ ãzị́táŋá ꞌbá drị̃lẹ́ ru ãzíla ꞌbá ĩyõ ꞌbã kí ꞌbãlé rĩ sĩ ãzíla ála dó ĩꞌdi dro rá, icó dó sĩ adrulé ꞌbá ãgõlépi ꞌdi kí ꞌbã ãzí ru ku.
9 Ụ́ꞌdụ́ na ꞌdã kí agá, ꞌbá Yụ́dã drị̂ kí Bénzãmĩnĩ drị̂ kí abe atrá kí dó ru pírí Yẹ̃rụ́sãlẹ́mụ̃ gá rá. Ĩmbá úrômĩ ꞌbã ụ́ꞌdụ́ kãlị́ ị̃rị̃ sĩ, ꞌbá pírí ri kí dó ãngũ mgbọ jó Ãdróŋá drị̂ ꞌbã drị̃lẹ́ gá rĩ gá, ri kí yãlé yã yã ãꞌdusĩku ị́jọ́ ĩꞌbã kí sĩ ru atrájó ꞌdĩ ĩꞌdi ị́jọ́ ãzí sĩ ĩrẽ idéjó ku la ãzíla uzogó ri vâ ꞌdịlé ꞌdị-ꞌdị̃. 10 ꞌDã ꞌbã ũngúkú gá, átáló Ézĩrã angá ụrụgá, jọ dó ĩꞌbaní, “Ĩmi iza ị́jọ́ ũnzí la ĩminí izonzi ãmị́yọ́ŋá ru ꞌdĩ kí ꞌdụjó ĩminí ũkú ru rĩ sĩ, ĩfẽ dó sĩ ị́jọ́ ũnzí Ịsịrayị́lị̃ drị̂ tụ dó sĩ drị̃ gá. 11 Úꞌdîꞌda lẽ dó ĩmi uja ásị́ Úpî drị̃lẹ́ gá, ĩꞌdi Ãdróŋá ĩmĩ áyị́pịka ꞌbadrị̂ ꞌi ãzíla ĩnga ị́jọ́ ĩꞌdi ꞌbã lẽlé rĩ kí áyụ. Ĩmi awa ĩmi ꞌbá ãmị́yọ́ŋá ru ĩmi andre gá ꞌdĩ kí abe ãzíla ũkú ãmị́yọ́ŋá ru ĩminí ꞌdụlé ꞌdĩ kí abe rá.”
12 ꞌDã ꞌbã ũngúkú gá, ꞌbá pírí ru tralépi ꞌdã umvi kí dó ị́jọ́ ụ́ꞌdụ́kọ́ ụrụgá sĩ: “Ãma mụ ị́jọ́ ꞌdĩ ngalé cécé míní lũlé ãmaní ꞌdĩ áni. 13 Wó ꞌbá ꞌbã kí adrujó ũꞌbí ru ãzíla uzogó ní ꞌdịjó amba mba rĩ sĩ, ãma icó dó pá tulé ãmvé ku. ꞌDĩ adru vâ ị́jọ́ ãzí lú ngalé ụ́ꞌdụ́ ãlu jõku ị̃rị̃ íni la ku ãꞌdusĩku ị́jọ́ ũnzí ãmaní idélé rĩ ꞌbã úmgbó dó amba mba. 14 Lẽ Ãmbogo ãmadrị̂ ꞌbã tu kí dó pá ũꞌbí kí kẹ̃jị́ gá. ꞌBá ãlu ãlu táwụ̃nị̃ ãmadrị̂ kí agá ũkú ãmị́yọ́ŋá ru rĩ kí ꞌdụlépi rá rĩ ꞌbã amụ́ kí ꞌbá ĩyõ ãzíla ꞌbá ị́jọ́ lịlépi táwụ̃nị̃ pírí kí agá rĩ abe sáwã ꞌbãlé rĩ gá kpere ãdrã Ãdróŋá ãmadrị̂ drị́ ị́jọ́ ũnzí ꞌdĩ sĩ ãma ụrụꞌbá gá rĩ ꞌbã ukó agá.” 15 ꞌBá ị́jọ́ ꞌdĩ gãlépi úmgbé rĩ kí lú Yónãtãnĩ Ãsãhẹ́lị̃ ngọ́pị kí Yãzẹ̃yị́yã Tĩkívã ngọ́pị be. ꞌBá kí ũngúkú ãtị̃lépi rĩ kí ꞌbá Lẹ́vị̃ rú Mẹ̃sụ̃lámụ̃ kí Sãbẽtáyĩ be.
16 Ị́jọ́ ꞌdĩ sĩ ꞌbá ándrá ꞌdụlé ãtíꞌbó ru ãgõlépi rá ꞌdĩ nga kí dó ị́jọ́ kí cécé ꞌbãlé ꞌdĩ ꞌbã áni. Átáló Ézĩrã ũpẽ dó ꞌbá drị̃lẹ́ ru rĩ kí angájó drị̃lẹ́ ínátị drị̂ kí agá sĩ ãzị́ ngajó ĩꞌdi be ãzíla ũsĩ dó kí rụ́ vụ̃rụ́. Ụ́ꞌdụ́ drị̃drị̃ ĩmbá mụdrị́ drị̂ sĩ, ꞌbá ꞌdĩ iꞌdó kí dó ị́jọ́ ꞌdĩ kí ị̃ndụ́ ndrụ̃lé. 17 Ĩꞌdi dó mụ calé ĩmbá ãlu ꞌbã ụ́ꞌdụ́ ãlu ílí úꞌdí rĩ drị̂ sĩ, de kí dó ị́jọ́ ꞌbá ũkú ãmị́yọ́ŋá ru rĩ kí ꞌdụlépi rĩ ꞌbadrị̂ kí rá.
Ãgọbị ũkú ãmị́yọ́ŋá ru rĩ kí ꞌdụlépi rĩ kî
18 Anzị ãfũlépi ũri ꞌbá ãtalo rú rĩ ꞌbadrị̂ kí agá, ũkú ãmị́yọ́ŋá ru rĩ kí ꞌdụlépi rĩ kí ꞌba rụ́ kí ꞌdĩ:
Ínátị Yésũwã Yõzãdákĩ ngọ́pị drị́ ĩꞌdi ꞌbã ádrị́pịka kí abe rĩ gá: Mãsẽyíyã ꞌi, Ị̃lị̃yãzárị̃ ꞌi, Yãrị́bụ̃ ꞌi, ãzíla Gẽdãlíyã ꞌi. 19 Na kí ũyõ sĩ ũkú ĩꞌbadrị̂ kí drojó rá, kí ãlu ãlu fẽ kí dó sĩ kãbĩlógó ídétáŋá ru sĩ ị́jọ́ ũnzí ĩꞌbadrị̂ kí idéjó.
20 Anzị ínátị Ị̃mẹ́rị̃ drị̂ gá rĩ kí;
Hãnánĩ kí Zẽbãdíyã be.
21 Anzị ínátị Hãrị́mụ̃ drị̂ gá rĩ kí;
Mãsẽyíyã ꞌi, Ĩlíyã ꞌi, Sẽmãyíyã ꞌi, Yẹ̃hị̃yẹ́lị̃ ꞌi ãzíla Ụ̃zị́yã ꞌi.
22 Anzị ínátị Pãsị̃hụ́rị̃ drị̂ gá rĩ kí;
Ẽlĩyõnáyĩ ꞌi, Mãsẽyíyã ꞌi, Ịsụmayị́lị̃ ꞌi, Nẹ̃tãnẹ́lị̃ ꞌi, Yọ̃zãbádị̃ ꞌi ãzíla Ĩlásã ꞌi.
23 ꞌBá Lẹ́vị̃ rú rĩ kí agá;
Yọ̃zãbádị̃ ꞌi, Sị̃mẹ́yị̃ ꞌi, Kẽláyã (vâ umvelé Kẽlítã rĩ ꞌi), Pẽtãhíyã ꞌi, Yụ́dã ꞌi ãzíla Ị̃lị̃yãzárị̃ ꞌi.
24 ꞌBá úngó ngolépi rĩ kí agá;
Ĩlĩyãsíbũ ꞌi.
ꞌBá jó Ãdróŋá drị̂ andre tẽlépi rĩ kí agá;
Sãlụ́mụ̃ ꞌi, Tẹ̃lẹ́mụ̃ ꞌi ãzíla Ụ́rị̃ ꞌi.
25 ꞌBá Ịsịrayị́lị̃ drị́ ãzí ĩndĩ rĩ kí;
Ínátị Pãrọ́sị̃ drị̂ agá Rãmíyã ꞌi, Ĩzíyã ꞌi, Mãlĩkíyã ꞌi, Mĩyãmínĩ ꞌi, Ị̃lị̃yãzárị̃ ꞌi, Mãlĩkíyã ꞌi ãzíla Bẽnáyã ꞌi.
26 ꞌBá ínátị Ĩlámũ drị̂ gá rĩ kí;
Mãtãníyã ꞌi, Zẽkãríyã ꞌi, Yẹ̃hị̃yẹ́lị̃ ꞌi, Ábị̃dị̃ ꞌi, Yẹ̃rẹ̃mọ́tị̃ ãzíla Ĩlíyã ꞌi.
27 Anzị ínátị Zátụ̃ drị̂ gá rĩ kí;
Ĩlĩyõnáyĩ ꞌi, Ĩlĩyãsíbũ ꞌi, Mãtãníyã ꞌi, Yẹ̃rẹ̃mọ́tị̃ ꞌi, Zãbádĩ ꞌi ãzíla Ãzízã ꞌi.
28 Anzị ínátị Bẽbáyĩ drị̂ gá rĩ kí;
Yẽhõhãnánĩ ꞌi, Hãnãníyã ꞌi, Zãbáyĩ ꞌi ãzíla Ãtĩláyĩ ꞌi.
29 Anzị ínátị Bánĩ drị̂ gá rĩ kí;
Mẹ̃sụ̃lámụ̃ ꞌi, Mãlụ́kị̃ ꞌi, Ãdãyíyã ꞌi, Yãsụ́bụ̃ ꞌi, Sẽyálĩ ꞌi ãzíla Yẹ̃rẹ̃mọ́tị̃ ꞌi.
30 Anzị ínátị Pãhãtĩ Mõwábũ drị̂ gá rĩ kí;
Ádĩnã ꞌi, Kẽlálĩ ꞌi, Bẽnáyã ꞌi, Mãsẽyíyã ꞌi, Mãtãníyã ꞌi, Bẹ̃zãlẹ́lị̃ ꞌi, Bĩnúwĩ ꞌi ãzíla Mãnásẽ ꞌi.
31 Anzị ínátị Hãrị́mụ̃ drị̂ gá rĩ kí;
Ị̃lị̃yãzẹ́rị̃ ꞌi, Ĩsíyã ꞌi, Mãlĩkíyã ꞌi, Sẽmãyíyã ꞌi, Sị̃mị̃yọ́nị̃ ꞌi, 32 Bénzãmĩnĩ ꞌi, Mãlụ́kị̃ ꞌi ãzíla Sẽmãríyã ꞌi.
33 Anzị ínátị Hãsụ́mị̃ drị̂ gá rĩ kí;
Mãtẽnáyĩ ꞌi, Mãtátã ꞌi, Zãbádĩ ꞌi, Ị̃lị̃fẹ̃lẹ́tị̃ ꞌi, Yẽrẽmáyĩ ꞌi, Mãnásẽ ꞌi ãzíla Sị̃mẹ́yị̃ ꞌi.
34 Anzị ínátị Bánĩ drị̂ gá rĩ kí;
Mãádĩ ꞌi, Ãmũrámũ ꞌi, Ụ̃wẹ́lị̃ ꞌi, 35 Bẽnáyã ꞌi, Bẽdíyã ꞌi, Kẹ̃lụ́hị̃ ꞌi, 36 Vãníyã ꞌi, Mẹ̃rẹ̃mọ́tị̃ ꞌi, Ĩlĩyãsíbũ ꞌi, 37 Mãtãníyã ꞌi, Mãténĩ ꞌi ãzíla Yãásũ ꞌi.
38 Ínátị Bĩnúwĩ drị̂ gá rĩ kí;
Sị̃mẹ́yị̃ ꞌi, 39 Sẽlẽmíyã ꞌi, Nátãnĩ ꞌi, Ãdãyíyã ꞌi, 40 Mãkĩnãdẽbáyĩ ꞌi, Sãsáyĩ ꞌi, Sãráyĩ ꞌi, 41 Ãzãrẹ́lị̃ ꞌi, Sẽlẽmíyã ꞌi, Sẽmãríyã ꞌi, 42 Sãlụ́mụ̃ ꞌi, Ãmãríyã ꞌi ãzíla Yụ̃sụ́fụ̃ ꞌi,
43 ꞌBá ínátị Nébõ drị̂ gá rĩ kí;
Yẹ̃hị̃yẹ́lị̃ ꞌi, Mãtĩtíyã ꞌi, Zãbádĩ ꞌi, Zẹ̃bị́nã ꞌi, Yãdáyĩ ꞌi, Yọ́wẹ̃lị̃ ꞌi ãzíla Bẽnáyã ꞌi.
44 Ãgọbị ꞌdĩ ꞌdụ kí ándrá pírí izonzi ãmị́yọ́ŋá ru ꞌdĩ kí ĩꞌbaní ũkú ru. Ĩꞌbã ãzí rĩ utị kí ándrá anzị kí ũkú ꞌdĩ kí abe rá.