46
Yãkóꞌbõ mụ dó Mị̃sị́rị̃ gá
1 Yãkóꞌbõ ko dó drị̃ mụlé Mị̃sị́rị̃ gá ãko ĩꞌdidrị̂ kí abe pírí. Ĩꞌdi mụ calé Bẹ̃rị̃sẹ́bã gá ꞌbo, idé ídétáŋá Ãdróŋá ĩꞌdi ꞌbã átẹ́pị̃ Ĩsákã drị̂ nî. 2 Ị́nị́ ágágá Ãdróŋá jọ ị́jọ́ ĩꞌdiní urobí agâ sĩ umve ĩꞌdi, “Yãkóꞌbõ, Yãkóꞌbõ!” Yãkóꞌbõ ãꞌị̃, “Ma cí.” 3 Ãdróŋá jọ ĩꞌdiní, “Ma Ãdróŋá mí átẹ́pị Ĩsákã drị̂ ꞌi. Mí idé ụ̃rị̃ sĩ mụjó ándrá Mị̃sị́rị̃ gâlé ku, ãꞌdusĩku ma ími fẽ acálé sụ́rụ́ ãmbógó la rú. 4 Ma mụ Mị̃sị́rị̃ gâlé mi be, ãzíla ma ãndá-ãndá ru anzị mídrị́ mụlé tịlé drị̃lẹ́ gâlé rĩ kí uja vúlé ꞌdõlé rá, ãzíla sáwã míní drãjó rĩ sĩ Yụ̃sụ́fụ̃ la drụ́zị́ ími mịfị́ kí ụ̃pị̃ nĩ.”
5 ꞌDã ꞌbã ũngúkú gá Yãkóꞌbõ aꞌbe dó Bẹ̃rị̃sẹ́bã ꞌi ãzíla anzị ĩꞌdidrị̂ agụ kí dó ĩꞌdi, ꞌdụ kí dó anzị ĩꞌbadrị̂ kí ũkúka kí abe gãlĩgãlĩ Fãráwũ ꞌbã ãfẽlé sĩ kí agụjó rĩ kî sĩ. 6 Yãkóꞌbõ kí anzị ĩꞌdidrị̂ kí abe pírí ꞌdụ kí ĩꞌbã ãnãkpá kí ãko ĩꞌbã kí ịsụ́lé ãngũ Kãnánĩ drị̂ gá ꞌdãá rĩ kî trũ sĩ mụjó Mị̃sị́rị̃ gá. 7 Yãkóꞌbõ ꞌdụ anzị ĩꞌdidrị̂ kí, anzị ĩꞌdidrị̂ ꞌbã izonziŋá kí ngọ́pịka ĩꞌdi umvelépi áyị́pị rĩ kí abe mụ dô sĩ ꞌbá ĩꞌdidrị̂ kí trũ pírí Mị̃sị́rị̃ gâlé.
8 ꞌDĩ kî dó rụ́ anzị Yãkóꞌbõ drị́ Ịsịrayị́lị̃ ꞌbã ũri rú mụlépi ĩꞌdi be Mị̃sị́rị̃ gá rĩ kî:
Ngọ́tị́ŋá ĩꞌdidrị́ kãjãní rĩ ĩꞌdi Rụ́bẹ̃nị̃ ꞌi.
9 Anzị Rụ́bẹ̃nị̃ drị̂ kí rụ́:
Hãnókĩ ꞌi, Pálụ̃ ꞌi, Hẽzĩrónĩ ꞌi ãzíla Kãrị́mị̃ ꞌi.
10 Anzị Sị̃mọ́nị̃ drị̂ kí rụ́:
Yẹ̃mụ̃wẹ́lị̃ ꞌi, Yãmínĩ ꞌi, Ũhádĩ ꞌi, Yãkínĩ ꞌi, Zõhárĩ ꞌi ãzíla Sáwụ̃lụ̃ andre la ꞌbã sĩ adrujó Kãnánĩ ízó rú rĩ ꞌi.
11 Anzị Lẹ́vị̃ drị̂ kí rụ́:
Gị́rị́sọ̃nị̃ ꞌi, Kõhátĩ ꞌi ãzíla Mẽrárĩ ꞌi.
12 Anzị Yụ́dã drị̂ kí rụ́:
Ị́rị̃ ꞌi, Ũnánĩ ꞌi, Sélã ꞌi, Pẹ̃rẹ́zị̃ ꞌi ãzíla Zérã ꞌi, (wó Ị́rị̃ kí Ũnánĩ be ũdrã kí Kãnánĩ gâlé).
Anzị Pẹ̃rẹ́zị̃ drị̂ kí:
Hẽzĩrónĩ kí Hãmụ́lị̃ be.
13 Anzị Ĩsãkárĩ drị̂ kí rụ́:
Tólã ꞌi, Pụ́vã ꞌi, Yãsụ́bụ̃ ꞌi ãzíla Sị̃mị̃rọ́nị̃ ꞌi.
14 Anzị Zãbụ̃lọ́nị̃ drị̂ kí rụ́:
Sẹ̃rẹ́dị̃ ꞌi, Ị̃lọ́nị̃ ꞌi ãzíla Yãlẹ́lị̃ ꞌi.
15 ꞌDĩ kí anzị Léyã ꞌbã tịlé Yãkóꞌbõ ní Mẽsõpõtámĩyã gá rĩ kî; ĩzóŋá la ala gá rĩ Dị́nã ꞌi, kí pírí rĩ gá kãlị́ na drị̃ na.
16 Anzị Gádĩ drị̂ kí rụ́:
Zị̃fụ̃yọ́nị̃ ꞌi, Hágĩ ꞌi, Sụ́nị̃ ꞌi, Ị̃zị̃bọ́nị̃ ꞌi, Ị́rị̃ ꞌi, Hãrọ́dị̃ ꞌi ãzíla Ãrẹ́lị̃ ꞌi.
17 Anzị Ásẹ̃rị̃ drị̂ kí rụ́:
Ímũnã ꞌi, Ị̃sị́vã ꞌi, Ị̃sị́vị̃ ꞌi, Bẽríyã ꞌi ãzíla ámvọ́pị ĩꞌbadrị̂ Sérã ꞌi.
Anzị Bẽríyã drị̂ kí:
Hẹ̃bẹ́rị̃ kí Mãlị̃kẹ́lị̃ be.
18 ꞌDĩ kí anzị Zị̃lị́pã ándrá Lábãnĩ ꞌbã fẽlé Léyã be rĩ ꞌbã tịlé Yãkóꞌbõ ní rĩ kî. Anzị ĩꞌdidrị̂ kí pírí rĩ gá mụdrị́ drị̃ la ázíyá.
19 Anzị Yãkóꞌbõ ꞌbã ũkú Rãkẹ́lị̃ drị̂ kí:
Yụ̃sụ́fụ̃ kí Bénzãmĩnĩ be. 20 Mị̃sị́rị̃ gâlé Ãsĩnátã Pọ̃tị̃fẹ́rã átáló uwiŋá uwilépi Hẹ̃lị̃pọ́lị̃ gá rĩ ꞌbã ị̃zẹ́pị tị Yụ̃sụ́fụ̃ ní Mãnásẽ kí Ịfụrayị́mụ̃ be.
21 Anzị Bénzãmĩnĩ drị̂ kí rụ́:
Bélã ꞌi, Bẽkérĩ ꞌi, Ãsị̃bẹ́lị̃ ꞌi, Gérã ꞌi, Nãmánĩ ꞌi, Íhĩ ꞌi, Rọ́sị̃ ꞌi, Mũpímũ ꞌi, Hụ̃pị́mụ̃ ꞌi ãzíla Árị̃dị̃ ꞌi.
22 Anzị Rãkẹ́lị̃ ꞌbã tịlé Yãkóꞌbõ ní rĩ kí pírí rĩ gá mụdrị́ drị̃ la sụ.
23 Ngọ́tị́ŋá Dánĩ drị̂ rụ́:
Hũsímũ ꞌi.
24 Anzị Nãfũtálĩ drị̂ kí rụ́:
Yãzẹ́lị̃ ꞌi, Gụ́nị̃ ꞌi, Yẹ̃zẹ́rị̃ ꞌi ãzíla Sĩlémũ ꞌi.
25 Bílĩhã ãtíꞌbó Lábãnĩ ꞌbã fẽlé ị̃zẹ́pị̃ Rãkẹ́lị̃ ní rĩ tị Yãkóꞌbõ ní anzị kí pírí rĩ gá ázị̂rị̃.
26 Anzị mụlépi Mị̃sị́rị̃ gá ãfũlépi Yãkóꞌbõ ꞌbã ụrụꞌbá gá rĩ kí pírí rĩ gá kãlị́ ázíyá drị̃ la ázíyá. Úlã ngọ́pịka ꞌbã ũkúka kí gẹ̃rị̃ sĩ ku. 27 Yụ̃sụ́fụ̃ tị vâ anzị kí Mị̃sị́rị̃ gâlé ị̃rị̃; ꞌbá Yãkóꞌbõ drị́ko gá Mị̃sị́rị̃ gâlé rĩ kí pírí rĩ gá kãlị́ ázị̂rị̃.
28 Yãkóꞌbõ pẽ dó ngọ́pị̃ Yụ́dã tị Yụ̃sụ́fụ̃ rụ́ drị̃ gâlé sĩ mụjó gẹ̃rị̃ mụlépi Gõsénĩ gá rĩ zịjó. Kí dó mụ calé Gõsénĩ gâlé pírí ꞌbo, 29 Yụ̃sụ́fụ̃ itú gãlĩgãlĩ ĩꞌdidrị̂ kí bábá mụ dó sĩ drị̃ ụfụlé átẹ́pị̃ be Gõsénĩ gá. Yụ̃sụ́fụ̃ la mụ ru iꞌdalé ĩꞌdi drị̃lẹ́ gá ꞌbo, amvu dó átẹ́pị̃ gbũrúkã gá kpãrã ãzíla awá dó sĩ ãyĩkõ sĩ sáwã ãzo rú.
30 Yãkóꞌbõ jọ dó ngọ́pị̃ Yụ̃sụ́fụ̃ ní, “Ma dó bábá drãjó ãꞌdusĩku ándre dó mi drĩ ídri rĩ gá ꞌbo.”
31 ꞌDã ꞌbã ũngúkú gá Yụ̃sụ́fụ̃ jọ dó ádrị́pịka ꞌbaní ꞌbá átẹ́pị̃ drị́ko gá rĩ abe, “Ma dó mụ jọlé la Fãráwũ ní, ‘Má ádrị́pịka kí ꞌbá má átẹ́pị drị́ko gá rĩ kí abe, ãzíla ãko pírí ĩꞌbadrị̂ kî trũ iyá kí má rụ́ ꞌdõlé ꞌbo angájó Kãnánĩ gâlé. 32 ꞌBá mádrị́ ꞌda kí ꞌbá ãnãkpá tãmbalépi la, ají kí ãnãkpá ĩꞌbadrị̂ kí ãzíla ãko pírí ĩꞌbadrị̂ kí ĩndĩ.’ 33 Fãráwũ drĩ ĩmi umve jó agâlé, drĩ zị la, ‘Ãzị́ ĩmidrị̂ ãꞌdu yã?’ 34 Ĩmi umvi ĩꞌdiní, ‘Ãma ꞌbá ãnãkpá tãmbalépi la iꞌdójó ãnzị̃rị̃ŋã sĩ ándrá ãmã átẹ́pịka ꞌbadrị̂ áni.’ Ĩdrĩ jọ la íni, ĩꞌdi ãꞌị̃ ĩminí uꞌájó ãngũ Gõsénĩ gá rá, ãꞌdusĩku ꞌbá Mị̃sị́rị̃ gá rĩ ꞌbã kí ꞌbá ãnãkpá tãmbalépi rĩ kí ngụ̃jó ũnzí rĩ sĩ.”