49
Yãkóꞌbõ wi sụ̃sụ́ anzị ĩꞌdidrị̂ ꞌbanî
1 Yãkóꞌbõ umve ngọ́pịka kí pírí jó ĩꞌbaní, “Ĩmi atrá ĩmi áma andre gá, ma dó sĩ ĩminí ị́jọ́ drụ́zị́ drị́lẹ́ gâlé mụlépi ru idélépi ĩmi ụrụꞌbá gá rĩ kí iꞌda.
2 “Ĩmi atrá ĩmi áma andre gá mâ ngọ́pịka
ãzíla ĩmi are ị́jọ́ ĩmĩ átẹ́pị Ịsịrayị́lị̃ ꞌbã jọlé rĩ ꞌi.
3 “Rụ́bẹ̃nị̃ mi ngọ́tị́ mádrị́ kãjãní mání sĩ bõdõ ụ̃nị̃jó rĩ ꞌi,
mi ũkpõ mádrị́ kãrị̃lẹ̃ drị̂ iꞌdalépi rĩ ꞌi,
mí alị ꞌbá ãzí ꞌdĩ kí ũkpõ sĩ ãzíla ãrútáŋá sĩ rá.
4 Mi cécé ị̃yị́ galépi tré drị̃ ụtrị́lé ku rĩ áni, mí icó ãrútáŋá kãjãnĩ drị̂ ịsụ́lé ku,
míní ándrá tụjó mí átẹ́pị drị́ gbọ́lọ́ sị́ gá,
sĩ mî ụ́kụ́pị drị̃ izajó rĩ sĩ.
5 “Sị̃mọ́nị̃ kí ádrị́pị̃ Lẹ́vị̃ be ají kí ru ị́jọ́ ngaŋá sĩ ãlu;
kí ménéŋá ĩꞌbadrị̂ kí ayú sĩ ãlí idéjó sĩ ãꞌdị́ ꞌdịjó.
6 Lẽ áfi ị́jọ́ amáŋá ĩꞌbadrị̂ agá ku,
lẽ má icí tị ĩꞌba abe ãlu sĩ ị́jọ́ itújó ku,
ãꞌdusĩku ụꞌdị́ kí ꞌbá ũmbã ĩꞌbadrị̂ sĩ rá
ãzíla ụlị́ kí vâ tị́ ꞌbã ị́sụ́ pá gá use rĩ kí sĩ avájó.
7 Áwã ũmbã ĩꞌbadrị́ ãcí ꞌdĩ rá
ãzíla ũmbã ĩꞌbadrị̂ ũnzí-ũnzí,
ma kí iré Yãkóꞌbõ agá ꞌdâ
ãzíla kí awa ndú-ndú Ịsịrayị́lị̃ agá ꞌdâ.
8 “Yụ́dã, mî ádrị́pịka kí rú ími ịcụ́-ịcụ̂;
ími drị́ la adru mẹ́rọ́ꞌbá mídrị̂ kí imbe gá;
mí ádrị́pịka kí rú drị̃ su míní vụ̃rụ́.
9 Yụ́dã! Mi kẹ̃mị̃mvá;
mi ãgõ angájó ĩzá ciŋá gâlé mâ ngọ́tị̂.
Mi ãngũ va sĩ ími lajó vụ̃rụ́ cécé kẹ̃mị̃ áni,
mi kẹ̃mị̃ andre rĩ áni, ãꞌdi la ími aló nĩ yã?
10 ꞌBá ãzí icó gbéréke ũpĩ drị̂ palé ími drị́ gá ku,
túré ũpĩ drị́ ími pálé gá rĩ be,
kpere úpí gbéréke ꞌdị́pị ꞌbã acá agá,
ãzíla sụ́rụ́ pírí ꞌbaní ãrútáŋá fẽ agá ĩꞌdinî.
11 Ĩꞌdi kãyĩnõ ĩꞌdidrị̂ gĩ zãbíbũ ife gá,
ĩꞌdi mváŋá la gĩ zãbíbũ ife ũniyambamba rĩ gá,
ãzíla ĩꞌdi bõngó ĩꞌdidrị̂ kí ũjĩ
zãbíbũ sụ́ ika ãrí áni rĩ sĩ.
12 Mịfị́ la kí ka ndẽ wáyĩnĩ rá,
ãzíla sị́ la kí mve ndẽ lẹ́sụ́ rá.
13 “Zãbụ̃lọ́nị̃ la ri ị̃yị́tị gá
ãzíla ĩꞌdi ị̃yị́tị íꞌbó ꞌbã kí sĩ pá tujó rĩ ꞌi.
Ãngũ ĩꞌdidrị̂ la ca kpere Sị̃dọ́nị̃ gá.
14 “Ĩsãkárĩ ꞌi ĩꞌdi kãyĩnõ ũkpó
ru lalépi tẹ́rị́ ĩꞌdi ꞌbã ꞌdụlé rĩ kí drĩdríŋĩ gá rĩ.
15 Drĩ ãngũ avị́jó rĩ ndre ãlá ru
ãzíla ãngũ lékõ drĩ ĩꞌdiní ãyĩkõ fẽ rá,
ĩꞌdi ru ũngúkú ꞌbã sĩ tẹ́rị́ ujíjó
ãzíla ĩꞌdi ãzị́ ĩꞌdi ũŋmĩjó ũkpó sĩ rĩ nga rá.
16 “Dánĩ la rú ị́jọ́ lịŋá pịrị rĩ fẽ ꞌbá ĩꞌdidrị̂ ꞌbaní
cécé sụ́rụ́ ãlu Ịsịrayị́lị̃ drị̂ ꞌbã ãzí áni.
17 Dánĩ la ru co ị̃nị̃ rú gẹ̃rị̃ tị gá,
galaꞌbá gẹ̃rị̃ agá
kãyĩnõ kí ĩníŋá agalépi rĩ rú,
ị́jọ́ ꞌdĩ sĩ ꞌbá cẹ̃lépi kãyĩnõ drị̃ gá rĩ ꞌba aꞌdé rû sĩ ụ̃lị̃-ụ̃lị rú.”
18 ꞌDã ꞌbã ũngúkú gá Yãkóꞌbõ zị Ãdróŋá ꞌi,
“Úpí! Ma patáŋá mídrị̂ tẽ.”
19 ꞌDã ꞌbã ũngúkú gá Yãkóꞌbõ jọ ngọ́pịka ꞌbaní,
“ꞌBá ꞌbá ralépi rĩ kí amụ́ ũꞌbí ru Gádĩ tị celé sĩ ĩꞌdi rajó,
wó ĩꞌdi ꞌde kí ĩníŋá gá sĩ kí ndẽjó rá.
20 “Ásẹ̃rị̃ ꞌbã ãngũ la adru ãkónã ní úsã rú,
ĩꞌdi rú ãkónã ãjị́ ambamba úpí ní icólé nalé rá rĩ kí ũfũ nĩ.
21 “Nãfũtálĩ ĩꞌdi lẽza trũlé rá
mvaka tịlépi ũniyambamba rĩ ꞌi.
22 “Yụ̃sụ́fụ̃ ĩꞌdi zãbíbũ ífí
kalépi kũlũ kídí tị gá rĩ ꞌi,
kénĩ la kí dị Bõrõ drị̃ gâsĩ.
23 Mẹ́rọ́ꞌbá ĩꞌdidrị̂ atrá kí ru ĩꞌdi celé ụ́sụ sĩ;
kí ĩꞌdi gbẹ ásị́ ị̃gbẹ̃ kóru.
24 Wó ụ́sụ ĩꞌdidrị̂ bábá
ãzíla úꞌbã drị́ ĩfã ĩꞌdidrị̂ kí ũkpó ru
ãzãkoma Ãdróŋá Ũkpó ꞌDị́pị Yãkóꞌbõ drị̂ drị̂ sĩ,
ãꞌdusĩku ĩꞌdi ꞌbá ꞌbá ucélépi rĩ ãzíla ũkpõ Ịsịrayị́lị̃ drị̂ ꞌi.
25 Ĩꞌdi Ãdróŋá mí átẹ́pị ꞌbadrị́ ími ãzã kolépi rĩ ꞌi,
Ũkpó ꞌDị́pị míní sụ̃sụ́ wilépi
rĩ ꞌbã wi míní sụ̃sụ́ uzogó, ị̃tụ́ ãlá ꞌbụ̃ gá rĩ drị̂ trũ,
ꞌbã wi míní sụ̃sụ́ ãko ụ̃nọ́kụ́ ị̃ndụ́ gá mgbi rĩ ꞌbadrị̂
ãzíla ꞌbã wi míní sụ̃sụ́ ĩbã sụ́ ãzíla mvájólé drị̂ kî abe.
26 Lẽ sụ̃sụ́ mí átẹ́pịka ꞌbadrị̂ ꞌbã adru cécé ꞌbê áni,
ꞌbã ndẽ ꞌbé údu rĩ kí rá, sụ̃sụ́ wilé ꞌdĩ ꞌbã tra kí ru pírí Yụ̃sụ́fụ̃ drị̃ gá.
Ími androko ꞌbã indré mí ádrị́pịka kí agá
ꞌdâ ndú míní adrujó úpí mvá rĩ sĩ.
27 “Bénzãmĩnĩ ĩꞌdi ụ̃bọ̃gụ̃ ãko ucílépi ŋmãrụ̃-ŋmãrụ̃ rĩ ꞌi,
ụ̃ꞌbụ́tị sĩ ĩꞌdi ĩzá ĩꞌdiní ucílé rĩ kí na,
ĩndró sĩ ĩꞌdi ĩzá ĩꞌdiní ralé rĩ kí awa.”
28 ꞌDĩ kí sụ́rụ́ mụdrị́ drị̃ ị̃rị̃ Ịsịrayị́lị̃ drị̂ kí, ị́jọ́ ꞌdĩ dó átẹ́pị̃ ꞌbã sĩ azịjó ãzíla sụ̃sụ́ wijó ĩꞌbanî rĩ ꞌi, ngọ́tị́ŋá ãlu-ãlu ní úfẽ sụ̃sụ́ icólépi ĩꞌdi sĩ rá rĩ sĩ.
Yãkóꞌbõ ꞌbã drãjó rĩ
29 ꞌDã ꞌbã ũngúkú gá Yãkóꞌbõ azị ĩꞌbaní, “Ma dó ãni rú mụjó mâ átẹ́pịka ꞌba rụ́ mâ áyị́pịka abe, ĩmi ị̃sị̃ ma mâ átẹ́pịka kí abe ụ̃jị́gọ́ gá ámvụ́ Ífĩrõnĩ ꞌbá Hị́tị̃ rú rĩ drị̂ agá. 30 ꞌDĩ ụ̃jị́gọ́ ámvụ́ Mãkĩpélã drị̂ agá ãni rú Mãmírẽ Kãnánĩ gá rĩ gá ándrá Ịbụrahị́mụ̃ ꞌbã ĩgbãlé Ífĩrõnĩ Hị́tị̃ rú rĩ drị́ ámvụ̂ trũ ãngũ sĩ ꞌbá ị̃sị̃jó rĩ rú rĩ ꞌi. 31 Ị̂sị̃ ándrá Ịbụrahị́mụ̃ kí ũkû Sárã be, Ĩsákã kí ũkû Rẽbékã be ãzíla ị̂sị̃ vâ Léyã ꞌi alagá ꞌdãá. 32 Ámvụ̂ kí ụ̃jị́gọ́ ala gá rĩ kí abe îgbã ándrá kí angájó ꞌbá Hị́tị̃ rú rĩ ꞌbadrị́.” 33 Yãkóꞌbõ la mụ ị́jọ́ ĩꞌdidrị̂ kí delé azịlé ngọ́pịka abe ꞌbo, la dó ru vúlé gbọ́lọ́ sị́ gâlé ãzíla drã dó rá.