2
Yónã ꞌbã Ãdróŋá zịjó rĩ
1 ꞌDã ꞌbã ũngúkú gá, Yónã zị dó Úpí Ãdróŋá ĩꞌdidrị̂ angájó ị̃ꞌbị agâlé. 2 Jọ dó,
“Ũcõgõ mádrị́ ãmbógó rĩ agá má umve Úpí ꞌi ãzíla umvi ma rá.
Má umve mi angájó ĩnádrị̃ agâlé sĩ áma ãzã kojó
ãzíla mí are ma rá.
3 Íꞌbe ma ị̃yị́ kị́rị́ rĩ ꞌbã ágá gá vũ gâlé,
mĩrĩ ꞌbã ágádrị̃ gâlé,
ãzíla ị̃yị́ ãlụ́kụ́kụ̃ trũ rĩ iti ma ágá gá;
ị̃yị́ mídrị́ umvúlépi umvú-umvû rĩ,
alị pírí áma drị̃ gâsĩ.
4 ꞌDã ꞌbã ũngúkú gá, ájọ dó, ‘Údro dó ma mí rụ́ ꞌdâ rá
údro ma angájó ími drị̃lẹ́ gá,
wó tí ma mụ ãngũ ndrelé
jó mídrị́ ãlá rĩ agâlé ị̃dị́.’
5 Ị̃yị́ áma itilépi rĩ fẽ áma úríndí ní mvulé,
ị̃yị́ kị́rị́ rĩ ce ma agá gá,
ásé ị̃yị́ agá rĩ ĩkãlã áma drị̃ pírí cí.
6 Áꞌde mgbi ꞌbé ị̃ndụ́ ꞌbã iꞌdó agâ vũgâlé,
ụ̃nọ́kụ́ aku áma tị cí nzị̃ŋá kóru jãꞌdâ,
wó mí anzé ma ꞌbụ́ agâlé rĩ sĩ ídri rú,
Úpí Ãdróŋá mádrị̂.
7 Sáwã mání drãjó drã drã rĩ gá,
má agá ị́jọ́ Úpí ími drị̃ gá,
ị́jọ́ mání zịlé rĩ ca mí rụ́,
jó Ãdróŋá mídrị́ ãlá rĩ gá rá.
8 ꞌBá ãdroŋa ĩnzõ rú rĩ kí ị̃nzị̃lépi rĩ,
kí lẽtáŋá mídrị́ uyaŋá kóru rĩ ãvĩ rá.
9 Wó ma úngó ãwãꞌdĩfô fẽŋâ ãni la ngo,
ãzíla ma ídétáŋá idé míní,
ma ũyõ mání nalé rĩ ꞌbã ị́jọ́ nga rá.
Patáŋá la angá Úpí drị́!”
10 ꞌDã ꞌbã ũngúkú gá, Úpí fẽ dó ãzị́táŋá ị̃ꞌbị̂ ní, ị̃ꞌbị̂ agbẹ́ dó sĩ Yónã ị̃yị́ tị gá ãmvé.